BAŽ
Sudździ Andrej Šydłoŭski i Vieranika Barysava pryznali žurnalista vinavatym u niezakonnym vyrabie pradukcyi ŚMI. U pryvatnaści, dźviuch publikacyj, jakija sioleta ŭ lutym byli raźmieščanyja na sajcie belsat.eu. U milicejskich pratakołach paviedamlałasia, što materyjały aŭtar napisaŭ, «złoŭžyvajučy pravami i parušajučy abaviazki žurnalista».
Źmicier Kazakievič raspavioŭ, što adzin z artykułaŭ — heta historyja pra zvalnieńnie vykładčyka miedycynskaha ŭniviersiteta, jaki adbyŭ troje sutak pad aryštam za biełyja i čyrvonyja firanki ŭ svajoj kvatery. Druhi — pra sudovy praces nad žycharom Viciebska, u dačynieńni da jakoha raspačali kryminalnuju spravu za supraciŭ milicyjantam. Źviestki pra hetyja artykuły byli znojdzienyja padčas ahladu źmieściva noŭtbuka žurnalista, zabranaha milicyjantami padčas pieratrusu.
Źmicier Kazakievič admoviŭsia davać sudu tłumačeńni pa spravach. Kaža, što zrabiŭ heta na znak salidarnaści z kalehami:
— Mnie navat niajomka siabie baranić, kali maje kalažanki Darja Čulcova i Kaciaryna Andrejeva siadziać u turmie, kali inšych žurnalistaŭ trymajuć za kratami, kali ŭ krainie amal 300 palitźniavolenych. Ja admoviŭsia davać pakazańni na znak salidarnaści i pavahi da ich.
Žurnalist abmiežavaŭsia karotkim zvarotam da suda, dzie padkreśliŭ, što nie ličyć siabie vinavatym. I pracytavaŭ uryvak z ramana-antyŭtopii Džordža Orueła «1984» pra toje, što tolki tady žyćcio ŭ krainie možna ličyć narmalnym, kali dvojčy dva — heta čatyry, i nichto nie imkniecca davieści, što heta nie tak.
Hetuju knihu — pierakład ramana z anhlijskaj na biełaruskuju Siarhieja Šupy — Źmicier padaryŭ sudździ Andreju Šydłoŭskamu. Ale toj admoviŭsia ad padarunka, patłumačyŭšy, što sudździam heta zabaroniena i što jon ŭvohule nie čytaje pa-biełarusku.
