Z dapamohaj teatralnaha krytyka Alaksieja Strelnikava sabrali top aktualnych i cikavych śpiektaklaŭ i prajektaŭ, na jakija nie soramna zaprasić i maci, i kachanaha čałavieka.
Kupałaŭski anłajn
Kali vielmi sumujecie pa tym samym Kupałaŭskim teatry, jaki my viedali da sumnych padziej 2020 hoda, to raim padpisacca na ich jutub-kanał «Kupałaŭcy». Naŭprost ciapier tam možna pahladzieć novaje pračytańnie lehiendarnaj pjesy «Tutejšyja». A kali sačyć za raskładam, to pravieści adzin ź viečaroŭ za anłajn-pakazam śpiektakla pra dziacinstva «Ja» ci historyi maleńkaha čałavieka «Vojceka» ŭ režysury Ramana Padalaki.
Akramia taho, na kanale pastajanna dadajucca novyja biełaruskija vieršy ŭ vykanańni akcioraŭ.
Pravieranyja śpiektakli apošnich hod
«Pansijon Belvedere» (Teatr lalek)
Fota: puppet-minsk.com
Premjera hetaha śpiektakla, pastaŭlenaha italjanskim režysioram, adbyłasia jašče ŭ 2017 hodzie, ale jon lubimy publikaj i siońnia. Liryčnaja, kranalnaja zamaloŭka z žyćcia sastarełych ludziej pra sens isnavańnia i zdolnaść nie zdavacca, niahledziačy ni na što. Hałoŭnyja hieroi ŭ pramym sensie słova hladziać vačyma ŭ mahiłu, ale pry hetym zastajucca na pazityvie. Taki prykład zaražaje.
Najbližejšyja pakazy: 26 sakavika, 9 i 30 krasavika
«Šlub z vjetram» (RTBD)
Fota: rtbd.by
Śpiektakl, jaki Jaŭhien Karniah razam z Kaciarynaj Avierkavaj zrabili na asnovie etničnaj biełaruskaj muzyki. Vizualna aformleny ŭ vyhladzie zastolla na viasielle, i heta vielmi pryhoža. Pry ŭsioj vonkavaj pryvabnaści tvor raskryvaje dosyć žorstkija prablemy — pryrodu taksičnych stasunkaŭ i hvałtu.
Najbližejšyja pakazy: 27 sakavika, 8, 17 i 29 krasavika
Premjery
«Zapiski junaha lekara» (Teatr lalek)
Fota: puppet-minsk.com
Praciahvajučy temu z režysioram, jaki pa-mastacku ŭmieje pracavać ź ciełam (heta my pra Karniaha), raim źviarnuć uvahu na jaho premjeru ŭ Teatry lalek — «Zapiski junaha lekara», u asnovu jakoj loh cykł rańnich raskazaŭ Michaiła Bułhakava, a taksama frahmienty ź jaho miedyčnaj praktyki. Uščent raźbivaje stereatyp «dziciačaści» teatraŭ lalek. Toje ž samaje možna skazać pra surjoznuju psichałahičnuju pracu «Intervju ź viadźmarkami» ŭ hetym ža teatry, hetaha ž režysiora.
Najbližejšyja pakazy: 22 i 23 krasavika
«Zastacca nielha źjechać» (prastora Hide na Kastryčnickaj, 19)
Śpiektakl ad niezaležnaj teatralnaj kampanii HomoCosmos zrobleny Źmitrom Bahasłaŭskim, adnym z najlepšych maładych biełaruskich režysioraŭ. Tema haračaja: pracoŭnaja mihracyja. Aŭtar pjesy — ukrainski dramaturh Ihar Nasoŭski. I tym bolš kaštoŭny materyjał, što hrajuć u im akciory Novaha dramatyčnaha teatra, jakija zvolnilisia adtul paśla zabastoŭki.
Sama pa sabie pjesa vielmi iraničnaja i dynamičnaja, tak što śpiektakl taksama abiacaje być vielmi žyvym.
Najbližejšyja pakazy: 31 sakavika i 1 krasavika
Moładzievyja pracy
Teatralny krytyk upeŭnieny, što my pavinny padtrymlivać pačatkoŭcaŭ. Nie tolki tamu, što jany nie rynulisia zaniać miesca kupałaŭcaŭ u źniščanym teatry, ale i prosta tamu, što jany musiać być zapatrabavanymi paŭsiudna, dzie pracujuć.
«U viry» (Teatr imia Maksima Horkaha)
Fota: rustheatre.by
Mieładramatyčny i pry hetym vielmi aŭtarski prajekt pra strach i jaho pieraadolvańnie.
Heta dypłomnaja praca vypusknikoŭ-režysioraŭ Akademii mastactvaŭ, jakuju ŭziali ŭ repiertuar teatra letaś. Małady režysior Devid Razumaŭ sam napisaŭ pjesu, sam jaje pastaviŭ i sam syhraŭ razam z adnakurśnikami.
Najbližejšyja pakazy: 3, 20 krasavika
«Krejcarava sanata» (Teatr imia Maksima Horkaha)
Jašče adna praca, zroblenaja maładoj režysiorkaj — Maryjaj Matoch. Jany pryśviaciła jaje pamiaci narodnaha artysta Barysa Łucenki. Druhaja nazva śpiektakla, asnovaj jakoha staŭ viadomy tvor Tałstoha, — «Historyja adnoj pamyłki». Ale ci pra pamyłki i złačynstvy jon, ci pra śmiełaść — vyrašyć hledačam.
Najbližejšyja pakazy: 25, 27, 31 sakavika i 11 krasavika
Niezaležnyja teatralnyja prajekty
Kab sačyć za pakazami nastupnych tvorčych supołak, lepš padpisacca na ich u sacsietkach — tak vy dakładna nie prapuścicie niešta novieńkaje.
Dramatyčny teatr BDU «Na bałkonie»
Źjaŭleńnie art-prastory BDU na Kastryčnickaj, 10, dzie Andrej Saŭčanka rehularna vypuskaje novyja śpiektakli — adzin ź niešmatlikich pazityŭnych, śvietłych momantaŭ za apošnija miesiacy.
Zavitvać siudy možna amal kožny paniadziełak. A z najbližejšaha ŭ repiertuary:
- 22 sakavika — «Kastuś» — premjerny śpiektakl pa matyvach pjesy Uładzimira Karatkieviča;
- 27 sakavika — śpiektakl-impravizacyja «Harald», jaki stvarajecca naŭprost na vačach u hledača (temy zadaje taksama hość).
Čytki ŭ RTBD
Centr biełaruskaj dramaturhii pastajanna robić čytki biełaruskich dramaturhaŭ. I pužacca ich, kali vy nie ŭ temie, što heta, dakładna nie varta. Heta svojeasablivy eskiz mahčymych budučych śpiektaklaŭ. Za košt ekśpierymientalnaści — ničym nie horšy.
Z zapłanavanaha: 21 sakavika možna ŭbačyć čytańnie pjesy Maryi Bialkovič «Dabrabyt», jakaja, miž inšym, uvajšła ŭ šort-list fiestyvalu maładoj dramaturhii «Lubimaŭka-2019». Na scenie pierad vami razhorniecca historyja adnaho dnia, jaki pajšoŭ naŭskasiak z samaj ranicy.
Darečy, u farmacie śpiektakla hetuju ž pjesu možna pahladzieć u vykanańni akcioraŭ Biełaruskaha svabodnaha teatra. Sačyć za pakazami apošnich možna tut. Afiša ŭ teatra štomiesiac vielmi nasyčanaja (kali, kaniečnie, čarhovaha akciora nie zatrymajuć na sutki).
Fota z sacsietak BST.
Teatralny prajekt Anatola Hołuba
Śpiektakl «Kamiedyja» — heta aŭtarski prajekt viadomaha akciora Anatola Hołuba. Zrobleny pa pjesach daminikanskaha manacha Kaetana Marašeŭskaha «Kamiedyja» i Franciška Alachnoviča «Čort i baba». Lohki antrepryzny śpiektakl, jakija budzie kłasnym varyjantam baŭleńnia času dla amataraŭ biełaruščyny i kłasičnych pastanovak.
Najbližejšy pakaz: 28 sakavika
