18 sakavika ŭ Leninskim sudzie Mahilova nie zadavolili chadajnictva Siarhieja Piatruchina ab vystupleńni na pracesie z apošnim słovam. U im jon źbiraŭsia vykazać svaju pazycyju adnosna abvinavačańnia. Zvarot u sud Piatruchin dasłaŭ z karcara śledčaha izalatara, piša Radyjo Svaboda.

11 lutaha na pieršym sudovym pasiadžeńni za parušeńnie paradku jaho praviadzieńnia sudździa Volha Kraŭčanka vydaliła z zali abodvuch abvinavačanych. U dalejšym ich na praces nie dastaŭlali.

Siarhiej Piatruchin pra abvinavačańnie: «Absurdnaje, niezakonnaje, nie paćvierdžanaje nijakimi faktyčnymi dokazami i nie adpaviednaje rečaisnaści»

Piatruchin u chadajnictvie tłumačyŭ nieabchodnaść vystupić na sudzie tym, što padčas papiaredniaha śledztva admaŭlaŭsia davać pakazańni. A ahučyć ich na sudovym pracesie, na jahonuju dumku, «nieabchodna i vielmi važna». Adsutnaść na sudzie jon razhladaje jak pazbaŭleńnie «ŭsich pravoŭ, jakimi jaho nadzialiŭ zakon». Vystaŭlenaje abvinavačvańnie nazyvaje «absurdnym, niezakonnym, nie paćvierdžanym nijakimi faktyčnymi dokazami i nie adpaviednym rečaisnaści».

Viartańnie Piatruchina na praces padtrymali jahonaja advakatka i abaronca intaresaŭ Kabanava. Jany nastojvali, što tolki abvinavačanyja mohuć patłumačyć fakty i abstaviny, jakija źjaŭlajucca padstavaj dla kryminalnaha pieraśledu. Najaŭnaść ža kvalifikavanaha abaroncy nie zabiaśpiečvaje poŭnaha i ŭsiebakovaha razhladu spravy.

Suprać vystupiła pradstaŭnica dziaržaŭnaha abvinavačvańnia. Jana adznačała, što padobnyja zvaroty sud užo razhladaŭ. Na jaje dumku, taki zachad uździejańnia, jak vydaleńnie z zali padsudnych, byŭ užyty abhruntavana. Pavodle prakurora, abvinavačanyja «hruba parušali paradak na sudovym pasiadžeńni, złosna nie padparadkoŭvalisia zakonnym patrabavańniam jaho staršyni». Pazycyju pradstaŭnicy abvinavačańnia padtrymała sudździa.

Piatruchin paćvierdziŭ, što byŭ u karcary

Błohieram ź Bieraścia Siarhieju Piatruchinu i Alaksandru Kabanavu, jakich pravaabaroncy pryznali palitviaźniami, inkryminujuć arhanizacyju hrupavych dziejańniaŭ, jakija hruba parušajuć hramadzki paradak, a taksama źniavahu pradstaŭnika ŭłady ŭ suviazi z vykanańniem słužbovych abaviazkaŭ. Akramia taho, Piatruchina sudziać za abrazu sudździ. Abodvum pahražaje da 3 hadoŭ źniavoleńnia. Svajoj viny jany nie pryznajuć.

11 sakavika stała viadoma, što Siarhiej Piatruchin parezaŭ sabie vieny, pratestujučy suprać antysanitaryi ŭ kamery i kantynhientu, ź jakim musić u joj znachodzicca. Źniavolenaha adpravili ŭ karcar. U im jon mieŭsia znachodzicca da 17 sakavika.

U chadajnictvie ŭ sud Piatruchin paćvierdziŭ, što ŭ karcar trapiŭ 25 lutaha. Pra pryčyny nia zhadvaŭ. Pry hetym adznačyŭ, što 2 sakavika ad supracoŭnikaŭ Mahiloŭskaj turmy № 4 daviedaŭsia: pakul jon u karcary, jahonyja skarhi nia buduć rassyłacca adrasatam.

18 sakavika kiraŭniku abłasnoj arhanizacyi AHP Uładzimieru Šancavu ŭdałosia pieradać Piatruchinu pieradaču. Šancaŭ zrabiŭ z hetaha vysnovu, što Piatruchina vypuścili z karcaru.

Nastupnaje, dziasiataje sudovaje pasiadžeńnie pryznačanaje na 25 sakavika.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?