Prysud vynies sudździa Aleh Kalada. Dziaržabvinavačańnie padtrymała pamočnik prakurora Zavodzskaha rajona Kačanava. Advakat abvinavačanaha — Siarhiej Śližyk.

«Ažyćciaŭlaŭ hučnyja vopleski rukami»

Zhodna z pazicyjaj abvinavačańnia, 30 žniŭnia Kurhanaŭ «pryniaŭ aktyŭny ŭdzieł u niesankcyjanavanym masavym mierapryjemstvie z metaj publičnaha vykazvańnia svaich hramadska-palityčnych pohladaŭ». Taksama jon «hruba parušyŭ hramadski paradak» i «akazaŭ vidavočnaje niepadparadkavańnie zakonnym patrabavańniam suprcoŭnikaŭ u formie». Taksama abvinavačańnie ahučyła, što Jaŭhien pieraškadžaŭ ruchu hramadskaha transpartu, bo «znachodziŭsia na prajeznaj častki ŭ pieršych šerahach pratestoŭcaŭ, vykrykvaŭ łozunhi i ažyćciaŭlaŭ hučnyja vopleski rukami».

«Prajaŭlaŭ cikaŭnaść»

Jon raspavioŭ, što 30 žniŭnia byŭ u Minsku ź siamjoj — synam i žonkaj, — kab naviedać park Horkaha. Praz spynienieńnie ruchu mietro jany prajšlisia pieššu da płoščy Pieramohi. Jany praciahvali špacyr razam da Zybickaj, dzie muž i žonka pasvarylisia: Jaŭhien adzin nakiravaŭsia da HC «Halereja», ubačyŭ natoŭp ludziej ź simvolikaj i pajšoŭ pa tratuary. U Steły jon źniaŭ videa z kalučym drotam, kala Pałaca Niezaležnaści sfatahrafavaŭsia na fonie aŭtamabilej «Rubiež», u adkrytych krynicach jon nie publikavaŭ zdymki. 

Taksama jon patłumačyŭ, što kala Steły čuŭ abjavu praz hučnahavaryciel ad supracoŭnikaŭ milicyi, što mierapryjemstva niezakonnaje, ale nie moh vykazać zdahadku, što za mirnuju akcyju, jakaja nie pierarasła ŭ biesparadki, budzie takaja surovaja adkaznaść u vyhladzie kryminalnaj spravy. Jon byŭ bieź simvoliki, nie vykrykvaŭ łozunhi, a prosta prajaŭlaŭ cikaŭnaść. Taksama jon zapeŭniŭ, što nie bačyŭ u ŚMI infarmacyju, što 30 žniŭnia zabaroniena vychodzić na vulicy Minska praź niesankcyjanavanyja mierapryjemstvy.

Palitviazień taksama raspavieŭ, što nie pierakryvaŭ darohu, a vyjšaŭ na prajeznuju častku, tolki kali ŭpeŭniŭsia, što daroha ŭžo pierakrytaja «Rubiežom», i jamu ničoha nie pahražaje.

Druhi nik u telehram?

Pamočnik prakurora Kačanava začytała, što ŭ telehram-kanale «Adździeł hramadzianskaj samaachovy Biełarusi» vośmaha vieraśnia byŭ zarehistravany akaŭnt «IvanForestHuman», pryviazany da telefonnaha numara abvinavačanaha. Karystalnik z takim nikam «pisaŭ paviedamleńni z zaklikami da biezhvałtoŭnaha zachopu dziaržaŭnych budynkaŭ, raspaviadaŭ jak pravilna aformić palaŭničuju licenziju, zaklikaŭ banić inšych udzielnikaŭ kanała».

Jaŭhien Kurhanaŭ adznačyŭ, što zarehistravany ŭ telehram pad svaim imiem i proźviščam. Nijakich dokazaŭ suviazi numara ź jaho telefonam nie było pradjaŭlena, paviedamleńni na telefonie taksama nie byli vyjaŭlenyja: tolki fotazdymki i karotkija videazapisy sa Steły i «Rubieža».

Bilinh telefona abvinavačanaha dakazaŭ, što jon ruchaŭsia apisanym im maršrutam.

Pazoŭ na amal dziesiać tysiač rubloŭ

Taksama abvinavačanamu byŭ zajaŭleny pazoŭ ad «Minsktransa» u pamiery 9 tysiač 481 rubiel i 10 kapiejek. Advakat zaprasiŭ vyklikać supracoŭnika, jaki moh by patłumačyć raźliki. Pradstaŭnik arhanizacyi juryskonsult Rybak N.Ju. patłumačyła, što supracoŭnik, jaki pravodziŭ raźliki, zaraz u adpačynku. Siarhiej Śližyk zrabiŭ zaŭvahu juryskonsultu: pakolki heta jaje zona adkaznaści, pravavoje vytłumačeńnie pavinna była składać mienavita jana. Ale pazoŭ rychtavała prakuratura: joj «pytańni zadavać nielha».

Dva hady «kałonii»

Bok abvinavačańnia ŭpeŭnieny, što vina Jaŭhiena Kurhanava poŭnaściu dakazanaja. Jak dokaz vykarystoŭvajecca rapart načalnika adździeła HUBAZik, u jakim paviedamlajecca, što ŭstanoŭlenaja suviaź pamiž akaŭntam «IvanForestHuman» i telefonam abvinavačanaha. Taksama na telefonie abvinavačanaha vyjaŭlenyja videa, dzie jon ruchajecca ŭ arhanizavanaj hrupie asob pa prajeznaj častcy, što «pryviało da prypynku ruchu hramadskaha transpartu» i kvalifikujecca jak «błakavańnie darohi». Sa źmiakčalnych abstavinaŭ Kačanava adznačyła najaŭnaść małaletniaha dziciaci i paprasiła pakarać Kurhanava pazbaŭleńniem voli na dva hady ŭ kałonii ahulnaha režymu.

«Daroha ŭžo była pierakrytaja»

Advakat Siarhiej Śližyk adznačyŭ, što akaŭnt, jaki byŭ zarehistravany ŭ telehram tolki 8 vieraśnia, nielha razhladać jak dokaz viny za padziei 30 žniŭnia. Jon jašče raz padkreśliŭ, što nie była dakazanaja suviaź telefona abvinavačanaha z hetym akaŭntam, tamu jaho paviedamleńni nie datyčacca spravy.

Taksama jon źviarnuŭ uvahu, što pry dačy tłumačeńniaŭ abvinavačanym i vyvučeńni materyjałaŭ spravy nie było pradastaŭlena ni adnaho dokaza, što Jaŭhien Kurhanaŭ — arhanizatar čaho-niebudź. Chacia heta vynikaje z farmuliroŭki artykuła, jaki jamu inkryminujecca. «Kali pahladzieć videa ź jaho telefona, my ŭbačym zvyčajnaha raziavaku, jak pravilna adznačyŭ sud», — adznačyŭ advakat.

Jon adznačyŭ, što siarod dokazaŭ — mabilny telefon abvinavačanaha, niekalki zdymkaŭ, maršrut ruchu. «Što tut možna jašče pradjavić? — Ničoha», — miarkuje abaronca. Siarhiej Śližyk upeŭnieny, što viny ŭ abjomie, paznačanaj abvinavačańniem, u palitviaźnia niama.

Taksama advakat prasiŭ uličyć, što hałoŭnym pasyłam vyniasieńnia pakarańnia, źjaŭlajecca pieravychavańnie čałavieka. I što čałaviek užo pravioŭ 6 miesiacaŭ u SIZA, kab uśviadomić usiu vinu, a adzinaj vinoj dakazanaj abvinavaŭcam, źjaŭlajecca «niepadparadkavańnie»: abvinavačany za hety termin užo ŭśviadomiŭ, što treba «słuchacca ludziej u formie».

Palitviazień ŭ apošnim słovie skazaŭ, što vyjšaŭ u horad i udzielničaŭ ŭ mirnym šeści, darohu nie błakavaŭ: jana ŭžo była pierakrytaja.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?