Mahiloŭskuju žurnalistku Alinu Skrabunovu buduć sudzić za intervju, jakoje jana dała polskamu telekanału «Biełsat» paśla pieratrusu ŭ jaje kvatery, paviedamlaje BAŽ.
Supracoŭniki milicyi paličyli intervju pradukcyjaj ŚMI i skłali ŭ dačynieńni da Skrabunovaj administracyjny pratakoł.
Sudździa suda Kastryčnickaha rajona Mahilova Volha Kraŭčanka pryniała da razhladu pratakoł, składzieny majoram milicyi Vasilom Karnijenkam u dačynieńni da Aliny Skrabunovaj 22 sakavika. Da hetaha sudździa adpraviła na dapracoŭku anałahičny pratakoł hetaha ž milicyjanta, składzieny 10 sakavika. Pryčynaj viartańnia stała toje, što Karnijenka nie ŭkazaŭ najmieńnie pradukcyi ŚMI, jakuju nibyta niezakonna vyrabiła Skrabunova. U novym pratakole paznačanaja nazva siužetu ŭ navinavym vypusku «Biełsata» — «Pieraśled žurnalistaŭ u Mahilovie».
U intervju, jakoje doŭžyłasia kala chviliny, Skrabunova raspaviała pra pieratrus, jaki praviali milicyjanty ŭ jaje kvatery 5 sakavika. Tady ŭ žurnalistki zabrali ŭsiu techniku: sistemny błok kampjutar, dva noŭtbuki, dźvie videakamiery, telefony, fłeš-nazapašvalniki i h. d.
Sudovaje pasiadžeńnie pryznačana na 31 sakavika.
Z 7 sakavika Skrabunova znachodzicca za miežami Biełarusi, ale jaje praciahvajuć karać štrafami.
Niahledziačy na heta, tolki ŭ sakaviku žurnalistka była aštrafavanaja dziesiać razoŭ pavodle abvinavačvańnia ŭ niezakonnym vyrabie pradukcyi ŚMI (č. 3 art. 23.5 KaAP). Ahulnaja suma štrafaŭ skłała 7540 rubloŭ.
