Ilustracyjnaje fota Nadziei Bužan
Studentaŭ minskich VNU, vykładčycu BDUIR i vypusknicu mieduniviersiteta abvinavačvajuć u arhanizacyi dziejańniaŭ, jakija hruba parušajuć hramadski paradak i spałučanych ź vidavočnym niepadparadkavańniem zakonnym patrabavańniam pradstaŭnikoŭ ułady, što pryviało da parušeńnia pracy ŭstanoŭ i transpartu (častka 1 artykuła 342 KK).
Pakarańnie pa artykule praduhledžvaje štraf, aryšt, abmiežavańnie voli na termin da troch hadoŭ abo pazbaŭleńnie voli na taki ž termin.
Jak paviedamlaje prakuratura, adna z abvinavačanych — byłaja asistentka kafiedry adnoj z VNU. Vierahodna, havorka pra vykładčycu BDUIR Volhu Fiłatčankovu. Na dumku śledstva, jana kaardynavała dziejańni ŭdzielnikaŭ pratestaŭ «u častcy ich pieramiaščeńnia i minimizacyi zatrymańniaŭ, infarmavała pra miescaznachodžańnie supracoŭnikaŭ orhanaŭ unutranych spraŭ. Zajaŭlenaja pry hetym meta — «sabrać bolš ludziej i iści zryvać zaniatki»».
Astatnija 11 abvinavačanych — maładyja ludzi 1996-2001 hoda naradžeńnia, u tym liku studenty minskich univiersitetaŭ.
Jak śćviardžajecca ŭ paviedamleńni Hienprakuratury, abvinavačanyja vypracavali płan dla dasiahnieńnia «supraćpraŭnaha vyniku» i prymali miery da jaho realizacyi. U im byli nastupnyja punkty:
— pryciahnieńnie pradstaŭnikoŭ asobnych sacyjalnych hrup — studentaŭ i vykładčykaŭ ustanoŭ vyšejšaj adukacyi Biełarusi da ŭdziełu ŭ supraćpraŭnych dziejańniach;
— infarmacyjnaje zabieśpiačeńnie akcyj pratestu — ich nastupnaje šyrokaje aśviatleńnie ŭ vyhadnym dla siabie śviatle z metaj upłyvu na masavuju śviadomaść;
— arhanizacyja mierapryjemstvaŭ, jakija z ulikam rytmičnaści i paŭtaralnaści viali da vypracoŭki ŭ ich udzielnikaŭ psichałahičnych ustanovak na supraćpraŭnuju madel pavodzinaŭ, dapamahali farmavać pratesnuju aktyŭnaść, dazvalali aprabavać sposaby kiravańnia moładździu.
— Pry hetym raspracavany złačynny miechanizm praduhledžvaŭ pryciahnieńnie studentaŭ adnych navučalnych ustanoŭ da ŭdziełu ŭ masavych mierapryjemstvach u inšych ustanovach adukacyi. Meta — raspaŭsiudzić iłžyvuju infarmacyju ab kolkaści pratestoŭcaŭ, spryjać dasiahnieńniu vidavočnaha dla abvinavačanych supraćpraŭnaha vyniku: niepadparadkavańnia zakonnym patrabavańniam administracyi VNU, u jakim pravodzilisia akcyi pratestu, — piša Hienprakuratura.
Paśla vyvučeńnia materyjałaŭ spravy ŭ Hienprakuratury pryjšli da vysnovy ab abhruntavanaści vystaŭlenaha abvinavačvańnia. Usie fihuranty spravy zastajucca pad vartaj.
Tut.by nahadvaje, što dzieviać studentaŭ minskich VNU, vypusknicu BDMU Ałanu Hiebramaryjam i vykładčycu BDUIR Volhu Fiłatčankovu zatrymali 12 listapada 2020 hoda. Paźniej u listapadzie była zatrymanaja jašče adna studentka miechmata BDU. Z taho času — užo bolš za čatyry miesiacy — jany znachodziacca pad vartaj u SIZA № 1 na vulicy Vaładarskaha ŭ Minsku.
