Archiŭny tekst za 2021 hod.
30 sakavika 2021 hoda Puškina zabrali z pracoŭnaha miesca ŭ Žyličach Kiraŭskaha rajona, dzie mastak pracavaŭ nad restaŭracyjaj pałaca Bułhakaŭ, i advieźli ŭ hrodzienskuju turmu. Roŭna praz hod jaho asudzili pa artykule 130 č.3 «Raspalvańnie rasavaj, nacyjanalnaj ci relihijnaj varažniečy».
Usia sprava ŭ partrecie antysavieckaha padpolščyka Aŭhiena Žychara, jaki ŭ paślavajenny čas dziejničaŭ na terytoryi Pastaŭskaha rajona. Ułady ličać Žychara pamahatym nacystaŭ, a karcinu Puškina — reabilitacyjaj nacyzmu. Sam Puškin heta admaŭlaje.
Kali była zaviedzienaja kryminalnaja sprava, to mastak byŭ u Kijevie, ale viarnuŭsia, chacia i viedaŭ, što na radzimie jamu moža pahražać turma. U kamientary «NN» jon skazaŭ, što hatovy da realnaj baraćby, a nie virtualnaj. Heta ŭžo daloka nie pieršy vypadak, kali suprać mastaka zavodziać kryminalnuju spravu.
Atrymaŭ imia ad pamierłaha brata
Mikałaj i Hanna Puškiny ź dziećmi Alesiem i Śviatłanaj.
Puškin naradziŭsia ŭ 1965 hodzie ŭ miastečku Bobr u Krupskim rajonie. Baćka Mikałaj pracavaŭ elektrykam na Babroŭskim lesapilnym zavodzie. Maci amal nidzie nie pracavała, bo była invalidam druhoj hrupy. U adnym ź intervju Aleś zhadvaŭ, što ŭ časy vajny jahony 17-hadovy baćka pa zadańni nacystaŭ achoŭvaŭ most.
Pa vajnie Mikałaj Puškin pastupiŭ u Minski finansavy technikum, ale chutka pryjšła ananimka, što jon byŭ palicajem. U vyniku baćku spačatku sasłali ŭ Čytu, a potym na Sachalin. U pačatku 1990-ch Mikałaja Ivanaviča reabilitavali i navat zapłacili niejkija hrošy, bo admysłovaja kamisija vyśvietliła, što ni ŭ jakich zabojstvach i katavańniach ludziej jon nie ŭdzielničaŭ.
Puškin hanarycca, što minimum piać pakaleńniaŭ jahonaha rodu žyło i žyvie ŭ Babry, nikudy adtul nie źjazdžajučy. Tam ža žyvie i jahonaja starejšaja siastra Śviatłana. Darečy, u siamji byŭ užo adzin Alaksandr Puškin, ale pražyŭ usiaho adzin hod. Praz čatyry hady hetym samym imiem nazvali inšaha syna.
Słužba ŭ Afhanistanie
Padčas słužby ŭ Afhanistanie (źleva)
Malavać Aleś pačaŭ hadoŭ z šaści. A kali jamu było trynaccać, u Bobr pryjechali rekruciory sa škoły-internata pa muzycy i vyjaŭlenčym mastactvie imia Achremčyka. Tudy źbirali talenavitych dziaciej z usioj BSSR. Baćka pryniaŭ valavoje rašeńnie adpravić syna na vučobu ŭ Minsk. Ustanova heta była zakrytaj, za miežy vychodzić było amal niemahčyma. Tam Aleś pravučyŭsia vosiem hadoŭ.
Paśla čaho pastupiŭ na vučobu ŭ Biełaruski dziaržaŭny teatralna-mastacki instytut. Praŭda, vučobu daviałosia pierarvać słužbaj u vojsku. Pieršyja paŭhoda Aleś prabyŭ u vučebcy ŭ Kamyšynie, słužyŭ tam razam ź Jarasłavam Ramančukom, a nastupnyja paŭtara hoda adbyŭ u Afhanistanie, dzie słužyŭ miechanikam u viertalotnym pałku. Aleś zhadvaŭ, što nikoha bolš pasłuchmianaha za biełarusaŭ u vojsku nie sustrakaŭ.
Jon apaviadaŭ, jak načalnik haŭptvachty, praparščyk Bielski, pračytaŭ jahony dziońnik pa-biełarusku, paśla čaho dakłaŭ kiraŭnictvu. Toj pakaraŭ Puškina 10 sutkami haŭptvachty, Ahułam za słužbu Aleś adsiedzieŭ na «hubie» 28 sutak.
Adzin ź pieršych palitviaźniaŭ
U Biełarusi Aleś dałučajecca da «Tałaki», potym da BNF. U 1988 hodzie, pierad słavutaj akcyjaj na Dziady, Puškin kleić ulotki z zaklikam prychodzić na mierapryjemstva. U vyniku jaho zatrymlivajuć jašče da Dziadoŭ i dajuć 5 sutak aryštu, jaki jon adbyvaje ŭ izalatary na Akreścina.
25 Sakavika 1989 hoda Aleś Puškin vychodzić na vulicu ź pierakreślenym ściaham BSSR i płakatam, na jakim napisana «Dosyć sacyjalistyčnaj, adrodzim niezaležnuju Biełaruś». Tak jon chacieŭ prajści praz uvieś sučasny praśpiekt Niezaležnaści da Doma ŭrada, ale jaho zavincili jašče la Akademii navuk.
Byŭ sud, jaki pastanaviŭ pakarać mastaka 2 hadami ŭmoŭna, a taksama piaćciu hadami paražeńnia ŭ pravach. Pry hetym Alesia navat nie adličyli ź instytuta. Na sud mastak pryjšoŭ u vyšyvancy i na pytańni adkazvaŭ pa-biełarusku.
Aleś ź siabrami la suda.
U toj samy hod mastaka stali bambić u dziaržaŭnaj presie, maŭlaŭ, što Puškin maryć pra «Biełaruś biez žydoŭ i kamunistaŭ». Praź dziesiać hadoŭ Aleś skaža, što choča Biełaruś i z habrejami, i z kamunistami, kab u krainie było miesca ŭsim.
Pieršaja pryvatnaja halereja «Ŭ Puškina»
Pa raźmierkavańni Aleś pajechaŭ u Viciebsk. Kaža, što sam abraŭ hety horad praź jahonuju historyju, źviazanuju z žyvapisam — Šahał, Malevič. Pracavaŭ na mastackim kambinacie, mieŭ internat. Adnak hetaha Alesiu było mała, u chutkim časie jon adkryvaje pieršuju na toj momant u krainie pryvatnuju mastackuju halereju, jakuju ścipła nazyvaje «Ŭ Puškina». Mienavita tam adbyŭsia źjezd biełaruskich nacyjanalistaŭ, jaki inicyjavali Puškin i Słavamir Adamovič. Mierapryjemstva nakryła milicyja. Zakryć halereju daviałosia ŭ 1997 hodzie.
U Viciebsku ŭ listapadzie 1994 hoda Aleś pravodzić adzin z samych jarkich pierformansaŭ — basanož vychodzić pa pieršym śniezie na vulicy horada, kab prajścisia tymi ž ściežkami, što i ŭnijacki mitrapalit Jazafat Kuncevič. Potym Aleś siadzie ŭ čovien bieź viosłaŭ, jaki budzie spłaŭlacca pa Dźvinie.
Dźvie pazašlubnyja dački, dvoje dziaciej u šlubie
U maładości ŭ Alesia zdaryŭsia raman z rasijskaj biznes-vumen z Tambova. Jamu było 24, joj — 39. U vyniku naradziłasia dačka Hanna.
Kaliści Aleś šakavaŭ ludziej zajavaj, što nikoli b nie pabraŭsia šlubam z žančynaj, jakaja nie havoryć pa-biełarusku.
Potym u viciebski pieryjad byŭ jašče adzin raman, u vyniku jakoha naradziłasia dačka Daša. Pra jaje isnavańnie mastak navat nie viedaŭ doŭhi čas, i paznajomiŭsia z dačkoj, kali joj užo było 17 hadoŭ. Abiedźvie dački havorać pa-biełarusku.
Z žonkaj Janinaj. Fota Radyjo «Svaboda».
Šlubam Puškin pabraŭsia ŭ 1997 hodzie. Jaho abrańnicaj stała nastaŭnica z Staŭbcoŭskaha rajona Janina Demuch. Paznajomilisia jany ŭ Mahilovie, dzie Aleś pracavaŭ nad restaŭracyjaj kaścioła śviatoha Stanisłava. Varta pomnić, što Puškin ža nie tolki epatažny pierformier, ale i talenavity restaŭratar, aŭtar mnohich ikon.
Janina — katalička, Aleś — pravasłaŭny. U šlubie ŭ ich naradzilisia dzieci Mikołka i Maryla. Pieršynca čakali šeść hadoŭ, za hety čas było dva vykidyšy. Baćki adstajali prava, kab syn vučyŭsia ŭ škole pa-biełarusku.
Rośpis carkvy ŭ Babry
Adnoj z hałoŭnych spraŭ žyćcia Aleś nazyvaŭ rośpis carkvy ŭ rodnym miastečku Bobr. Hety słavuty siužet, dzie siarod hrešnikaŭ na strašnym sudzie byŭ adlustravany čałaviek, padobny da kiraŭnika krainy, taksama tam byli namalavanyja ludzi, padobnyja da vysokich pravasłaŭnych ijerarchaŭ. Tuju pracu Alesia daviałosia zamalavać, ale ŭsio adno carkva była raśpisana im. Pa niadzielach Puškin byŭ zvanarom u carkvie. U 2011 hodzie carkva ŭ Babry zhareła całkam, daviałosia adnaŭlać z nula.
Hnoj dla Łukašenki
Ale samy jarki pierformans Puškina — heta, biezumoŭna, tačka z hnojem, jakuju ŭ lipieni 1999 hoda jon prykaciŭ da Administracyi prezidenta. Čyrvonaja tačka, biełyja palčatki. Aleś raskidaŭ hnoj, a navierch devalvavanyja rubli i Kanstytucyju. I ŭsio heta prakałoŭ viłami. Jaho schapili milicyjanty, u pastarunku jon nie nazyvaŭ svajo imia, a nazyvaŭsia «čałaviekam z narodu». U vyniku jaho adpuścili pad padpisku, a praź niejki čas asudzili za chulihanstva znoŭ na tyja samyja dva hady ŭmoŭna.
Cikava, što ŭ 2015 hodzie mastak pryznavaŭsia, što chacieŭ by ŭ 2020 hodzie pryvieźci da Administracyi tačku z ružami, kali Biełaruś zastaniecca niezaležnaj dziaržavaj, ale ŭsio atrymałasia trochu nie tak.
Jašče adna kryminalnaja sprava na Puškina mahła być zaviedzienaja paśla festu «Aršanskaja bitva» ŭ vieraśni 2007 hoda. Mastaka razam z maładafrontaŭcami dastavili ŭ aršanski pastarunak, i kali pravaachoŭniki adviarnulisia, Puškin ściahnuŭ dziaržaŭny ściah i skinuŭ jaho z druhoha pavierchu. Mastaka chacieli sudzić za «drobny kradziež», sam na sudzie prasiŭ nie hańbić jaho takimi farmuloŭkami i zavieści paŭnavartasnuju kryminalnuju spravu. Ale ŭsio skončyłasia 10 sutkami aryštu.
I heta daloka nie ŭsie pryhody, jakija zdaralisia z mastakom. Jaho aryštoŭvali za toje, što ŭ telefonnaj razmovie kiepska adhukaŭsia pra staršyniu KDB Ściapana Sucharenku, bili za biełaruskuju movu, chacieli pryciahnuć da adkaznaści za vybuch, jaki adbyŭsia na siadzibie Alesia ŭ Kupalle-2013, kali haspadar varyŭ krupnik. Peŭna, takija historyi možna raskazvać dniami.
Aleś demanstruje siniaki pa vychadzie z Akreścina. Fota Radyjo «Svaboda».
U 2020 Puškina źbivali padčas vybarčych padziej, jon taksama pieraŭtvaryŭ heta ŭ pierformans, kali demanstravaŭ siniaki na žyvacie, śpinie, dupie. Mastak adsiedzieŭ troje sutak na Akreścina. Jon udzielničaŭ amal va ŭsich niadzielnych šeściach i nie tolki, niesučy z saboj ikonu.
Ciapier Puškina čakaje novaje vyprabavańnie.
