Śledstva pa kryminalnaj spravie, zaviedzienaj u dačynieńni da pravaabaroncy «Viasny» z Homiela Leanida Sudalenki pa art. 342 Kryminalnaha kodeksa, praciahnuta da 18 maja. Pra heta jon paviedamiŭ u adnym sa svaich listoŭ na volu, pišuć pravaabaroncy.

Leanid zastajecca pad vartaj u homielskim SIZA №3. Jon dvojčy abskardžvaŭ abranuju mieru strymańnia, adnak jamu admovili na padstavie taho, što pravaabaronca nibyta moža źbiehčy abo pieraškodzić śledstvu. Taksama ŭ Sudalenki źmianiŭsia advakat: pieršaja advakatka admoviłasia dalej zajmacca jaho spravaj biez tłumačeńnia pryčyn.

Pravaabaronca pavinšavaŭ usich z Dniom voli. Jon kaža, što atrymlivaje šmat listoŭ i ŭsio heta dla jaho «tut maje asablivy sens i značeńnie».

Nahadajem, Leanid Sudalenka byŭ zatrymany 18 studzienia pa darozie na ofis. Jaho advieźli na dopyt u Śledčy kamitet, kudy jaho advakat zmoh patrapić tolki bližej da viečara. Zatym jaho źmiaścili ŭ izalatar, a praź niekalki dzion pieraviali ŭ SIZA. Za dva tydni da zatrymańnia Sudalenki ŭ Hramadska-palityčnym centry na vuł. Paleskaj, 52, dzie znachodzicca ofis «Homielskaj viasny», prajšoŭ pieratrus, padčas jakoha byli vyniatyja dakumienty, jakija tyčacca dziejnaści pravaabaroncy (pastanovy sudoŭ, abskardžańni). 

Leanidu było pradjaŭlena abvinavačvańnie pa č. 1 i 2 art. 342 Kryminalnaha kodeksa (finansavańnie i arhanizacyja dziejańniaŭ, jakija hruba parušajuć hramadski paradak). Viadoma, što spravu Sudalenki pieradali z abłasnoha Śledčaha kamiteta ŭ Centralny aparat SK u Minsku.

Biełaruskaja pravaabarončaja supolnaść pryznała Sudalenku palityčnym źniavolenym.

Leanid Sudalenka — staršynia homielskaha adździaleńnia Pravaabarončaha centra «Viasna», pravaabaronca z 20-hadovym stažam akazańnia dapamohi ŭ adnaŭleńni parušanych pravoŭ hramadzianaŭ. Jon dapamahaŭ u padrychtoŭcy i nakiravańni šmatlikich indyvidualnych zvarotaŭ u Kamitet pa pravach čałavieka AAN suprać Biełarusi. 

Za svaju pravaabarončuju dziejnaść byŭ udastojeny prestyžnaj francuzskaj premii «Svaboda-Roŭnaść-Braterstva» ŭ 2019 hodzie. U tym ža hodzie biełaruskaj pravaabarončaj supolnaściu jon byŭ uznaharodžany Nacyjanalnaj premijaj za dasiahnieńni ŭ halinie pravoŭ čałavieka ŭ naminacyi «Pravaabaronca hoda».

Клас
Панылы сорам
Ха-ха
Ого
Сумна
Абуральна