Jaŭhien Makarevič.

Jaŭhien Makarevič.

Pra zvalnieńnie dyrektara škoły stała viadoma ŭčora. Ale kalehi i baćki školnikaŭ nie pahadžajucca z takim kadravym rašeńniem, paviedamlaje Rehijanalnaja hazieta.

Situacyja sa zvalnieńniem pačałasia jašče ŭ žniŭni. U škole №5 byŭ arhanizavany vybarčy ŭčastak. Na hetym učastku na 120 hałasoŭ kandydat Cichanoŭskaja apiaredziła kandydata Łukašenku. Jakija padziei adbyvalisia paśla hetaha, škoła nie kamientuje, ale praź niekalki dzion paśla vybaraŭ Makarevič padaŭ zajavu na zvalnieńnie.

Siarod maładziečancaŭ uźnikła chvala abureńnia — mnohija paličyli, što adstajać pasadu za Makarevičam — sprava honaru. Byli i takija vypadki, što baćki pieravodzili dziaciej ź inšych škoł u piatuju ŭ znak pavahi i davieru da kalektyvu i dyrektara. Tady źjaviłasia infarmacyja, što zvalniać Jaŭhiena Vasiljeviča nie buduć, a jaho zajava na zvalnieńnie naohuł zhubiłasia.

Adnak ŭ kancy sakavika piedahohu paviedamili, kab jon zabiraŭ dakumienty, a ad 1 krasavika ŭ škole — novy dyrektar. Zvalniajuć jaho pa toj žnivieńskaj zajavie «pa ŭłasnym žadańni». Kantrakt u piedahoha zakančvajecca ŭ žniŭni 2022 hoda.

Novaha dyrektara kalektyvu piataj škoły siońnia nie pradstaŭlali. Adnak na razmovu z zavučami pryjechała načalnik upraŭleńnia pa adukacyi Ina Drapieza z namieśnicaj Anžalikaj Chandzieckaj.

Jak nam paviedamlajuć piedahohi, u kalektyvie vielmi zasmučanyja zvalnieńniem dyrektara. Pad zajavaj praciahnuć jaho pracu na pasadzie padpisaŭsia 31 supracoŭnik z 67.

«Nie zasłuhoŭvaje takoj niepavahi»

My paprasili padzialicca ŭražańniami z nahody zvalnieńnia Jaŭhiena Makareviča hanarovuju hramadzianku Maładziečanščyny, byłuju nastaŭnicu škoły №5 Lidziju Kniazievu. Jana zasnavała i bolš za 30 hod kiravała kłubam «Pošuk», a niadaŭna vyjšła na adpačynak.

— Z-za hetaj situacyi ja vielmi pieražyvaju, chacia ŭžo i na piensii, — raskazvaje Kniazieva. — Z Makarevičam ja adpracavała bolšuju častku žyćcia. Jon vydatny piedahoh, daśviedčany ŭmieły kiraŭnik, Čałaviek ź vialikaj litary. Mienavita dziakujučy jaho kłopatu i padtrymcy stolki hod praisnavaŭ kłub «Pošuk», jaki adšukaŭ imiony viaźniaŭ Štałaha 342 i ich svajakoŭ. Jaŭhien Vasiljevič padtrymlivaŭ usie našy prajekty, vynikam jakich stała stolki dobrych i karysnych spraŭ. Jon nie zasłuhoŭvaje takoj niepavahi da siabie.

Ciapier kłub «Pošuk» uznačalvaje nastaŭnik pačatkovych kłasaŭ Hanna Karumnaja. Voś jak jana prakamientavała situacyju:

— Dahetul u šoku, nie čakała, što tak budzie. Situacyja vielmi chvalujučaja i tryvožnaja. I jak piedahoh, i jak kiraŭnik jon mudry i pa-baćkoŭsku kłapatlivy. Zaŭsiody daje karysnyja parady.

Psichołah Ina Šyjanok raskazvaje:

— Da zvalnieńnia staŭlusia ź nieparazumieńniem. Pracu dyrektara aceńvajuć pa dvuch paramietrach — jak śpiecyjalista i jak asoby. U Jaŭhienie Vasiljevičy ŭdała spałučajucca abodva — jon vydatna pakazaŭ siabie i jak prafiesijanał, i jak asoba. Pra heta śviedčyć toje, što ŭ škole niama značnych kanfliktaŭ. U nas nievialikaja škoła, i praca dyrektara ŭ tym liku — navidavoku. Pra toje, što ŭ kalektyvie ŭsio ŭ paradku, śviedčyć, što ŭ pieršy kłas da nas viaduć svaich dziaciej byłyja vypuskniki. Makarevič kiruje škołaj bolš za 20 hod. I taja padtrymka, jakuju jon ciapier atrymlivaje, śviedčyć, što mienavita jon sfarmiravaŭ u škole zdarovy kalektyŭ.

«Urok dla ŭsiaho horada»

Mnohija baćki aburanyja zvalnieńniem Jaŭhiena Vasiljeviča. Jany źbirajuć podpisy pad zvarotam na imia načalnika upraŭleńnia pa adukacyi Iny Drapiezy, u jakim prosiać zachavać pasadu dyrektara škoły №5 za Makarevičam.

My pasprabavali vyśvietlić u baćkoŭ školnikaŭ, čamu dla ich tak važna zachavać pasadu za Makarevičam.

U maładziečanki Jaŭhienii Pryhodzič dvoje dziaciej — Pavieł i Viera. Starejšy Pavieł spačatku chadziŭ u inšuju škołu, ale tam zusim nie spadabałasia, i pierajšli ŭ piatuju. I tady, jak kaža surazmoŭca, jašče nie viedali, «nakolki kruty Makarevič».

— Jon usich dziaciej škoły viedaje pa imieni, zaŭsiody sustrakaŭ ranicaj na ŭvachodzie, — raskazvaje žančyna. — U škole svaja asablivaja atmaśfiera.

Maci raskazvaje, što ŭ škole, dzie śpiarša vučyŭsia syn, pieršyja čatyry hady amal usio padabałasia. Pieršaja nastaŭnica apiakała dziaciej, jak rodnych, i ŭ kłasie byli i dobryja viedy, i pavodziny. Kali prapanoŭvali ŭstupać u pijaniery, bolšaść kłasa ŭstupiła. Pavieł admoviŭsia, i nichto nie nastojvaŭ.

Paśla ž stali zaŭvažnyja novyja i novyja niedachopy. U škole nie chapaje raspranalniaŭ, z-za hetaha pamiž dziećmi pastajannyja kanflikty.

— Mnohija mierapryjemstvy pravodziać dla hałački i pakazuchi. Naprykład, adnojčy paviesili abjavu ab praviadzieńni adkrytaha ŭroka dla baćkoŭ, — raskazvaje Jaŭhienija. — Mnie cikava było b pahladzieć, jak vučycca moj syn. Telefanuju nastaŭniku, kažu, što pryjdu. Jana adkazvaje: nu vy ž razumiejecie, što nam treba rychtavacca dla samastojnaj, a kali vy pryjdziecie, daviadziecca pracavać na publiku, tamu lepš nie treba. Ale na papiery adkryty ŭrok praviali.

Adnojčy ŭ škole ładzili kirmaš z prodažam damašniaj vypiečki. Pavieł zachacieŭ paŭdzielničać.

— Chtości z zavučaŭ skazaŭ, što kali jon nie pijanier, to nielha. Daviałosia telefanavać dyrektaru i vyśviatlać, što heta za dyskryminacyja. Čym nie pijanier horš za pijaniera?

Apošniaj kroplaj dla maci Paŭła staŭ kanflikt pamiž vučniami. Kali ŭ pačatkovaj škole nastaŭnik vyrašała kanflikty, raźbirała ich, to paśla ich vyrašali pavierchnieva. U vyniku ŭsio paŭtarałasia.

— Tam taki padychod — treba ŭsio zamiać, kab było cicha, — miarkuje Jaŭhienija. — U piataj ža škole zusim inšaja atmaśfiera — dušeŭnaja, damašniaja. Ad dyrektara da vachciora — usie viedajuć imiony kožnaha vučnia. Synu i dačce tam vielmi padabałasia. Nastaŭniki ŭsio rabili, kab dzieci ŭlilisia ŭ kalektyŭ. Paśla vybaraŭ kančatkova zrazumieła, što intuicyja mianie nie padmanuła, i ja zrabiła pravilny vybar.

Asobna adznačaje Jaŭhienija ŭmieńnie Makareviča zacikavić historyjaj. Dziakujučy jaho padychodu syn pačaŭ vyvučać histaryčnych asob, vykonvać tvorčyja zadańni.

— Byvaje, dyrektar kamuści padabajecca, kamuści — nie, — razvažaje žančyna. — U piataj škole dyrektara pavažajuć i lubiać usie biez vyklučeńnia. Moj znajomy niejak napisaŭ vielmi dakładna: Makarevič — Nastaŭnik ź vialikaj litary. Jon usiamu horadu padaŭ urok sumlennaści, spraviadlivaści i mužnaści.

«Absalutna na svaim miescy»

U maładziečanki Aksany Nikicinaj dvoje dziaciej naviedvajuć piatuju škołu.

— Jaŭhien Vasiljevič całkam zadavalniaje jak piedahoh i dyrektar škoły, — raskazvaje jana. — Jaho ščyra pavažajuć i vučni, i nastaŭniki. Čałaviek z mudraj i zrazumiełaj pazicyjaj — heta šmat čaho vartaje. Takimi vydatnymi kadrami raskidvacca nielha, dobryja piedahohi pavinny canicca. Pry našym dyrektary ŭ škole paradak. Makarevič — čałaviek, jaki absalutna na svaim miescy, i na hetym miescy jaho varta pakinuć.

— Vielmi sumna, kali Jaŭhien Vasiljevič sydzie sa škoły, — dzielicca maci vučniaŭ piataj škoły Ludmiła Barko. — Heta dyrektar, jaki viedaŭ usich nastaŭnikaŭ i amal usich baćkoŭ. Jašče padčas vučoby majho muža byŭ dyrektaram. Vielmi dobry, čuły, nikoli nie admaŭlaŭ u prośbach. Dzieci jaho zaŭsiody chvalać.

Клас
Панылы сорам
Ха-ха
Ого
Сумна
Абуральна