Pavieł Sieviaryniec pravioŭ analiz 1,5 tysiačy listoŭ, jakija atrymaŭ u SIZA, i praanalizavaŭ, jak źmianiałasia kolkaść biełaruskamoŭnych. Pra heta piša ŭ fejsbuku žonka palityka-palitviaźnia Volha.
Palityk pieraličyŭ bolš za 1,5 tysiačy listoŭ, jakija pryjšli za 7 miesiacaŭ, pavodle movy i viery.
Napačatku hoda suadnosiny biełaruskamoŭnych i ruskamoŭnych listoŭ byli blizkija da 50/50. A voś užo na 31 sakavika 70% listoŭ ź Minsku i 72% z rehijonaŭ — biełaruskamoŭnyja. Za apošnija try miesiacy bolš jak piaćdziasiat adrasataŭ pierajšli na biełaruskuju movu — u listach, akaŭntach dy časam i naohuł u žyćci. Za apošnija try dni z 33-ch atrymanych listoŭ pa-rusku tolki adzin.
Pa rehijonach najbolšaja dola biełaruskamoŭnych adrasataŭ na Haradzienščynie (82%), najmienšaja — na Homielščynie (59%), ale paŭsiul bolš za pałovu.
U absalutnaj kolkaści listoŭ na pieršym miescy Minsk (amal 700 štuk), za im Minščyna i Viciebščyna (kala 100 kožnaja), zatym Haradzienščyna i Bieraściejščyna, plus bahata zamiežnych.
50,2% listoŭ ź Minsku i 46,4% z rehijonaŭ — ad viernikaŭ. Z ahulnaj kolkaści adrasataŭ-chryścijanaŭ 36,5% składajuć ryma-katoliki, 6% hreka-katoliki, 27% pravasłaŭnyja, 16% pratestanty, 14,5% niavyznačanaj kanfiesii.
100% hreka-katolikaŭ, 94% ryma-katolikaŭ i 87% niavyznačanych biełaruskamoŭnyja, a voś siarod pravasłaŭnych i jevanhielskich viernikaŭ biełaruskamoŭnych usiaho kala pałovy.
