Fota Depositphotos.com
Kab vyraścić bavoŭnu, treba vializnaja kolkaść vady. Na adnu paru džynsaŭ — 10 tysiač litraŭ, piša Deutsche Welle.
Aralskaje mora kaliści było čaćviortym pa vieličyni ŭnutranym vozieram u śviecie. Ciapier ad jaho nie zastałosia amal ničoha — jano źnikła jašče ŭ časy SSSR, kali vody Amudarji i Syrdarji stali raźbirać dla arašeńnia ziamiel pad bavoŭnu ŭ Centralnaj Azii.
Štohod u śviecie pradajecca kala dvuch miljardaŭ par džynsaŭ. Z 1850-ch hadoŭ tryvałuju džynsavuju tkaninu ŭ ZŠA pačali vykarystoŭvać šachciory. Praz 100 hadoŭ džynsy stali modaj kontrkultury, a zatym stali nabyvać papularnaść va ŭsim śviecie.
Adnak ciapier vytvorčaść denimu stała častkaj ekałahičnaj prablemy.
Vytvorčaść džynsavaj tkaniny nie tolki patrabuje šmat vady, ale i mocna zabrudžvaje pavietra. Pa acenkach brenda Levi, pry vytvorčaści adnoj pary ich džynsaŭ u atmaśfieru vykidvajecca 33,4 kh CO2 — stolki ž, kolki siaredni aŭtamabil vykidvaje ŭ atmaśfieru za 1000 kiłamietraŭ darohi. Reč u tym, što džynsavaja tkanina vyrablajecca ŭ Kitai i Indyi, a tam vuhal źjaŭlajecca asnoŭnaj krynicaj elektraenierhii dla pradpryjemstvaŭ.
Firmovy sini koler džynsaŭ atrymlivajecca z dapamohaj sintetyčnaha farbavalnika, jaki maje ŭ składzie takija taksičnyja chimičnyja rečyvy, jak cyjanid, viadomy svaim vykarystańniem u atrutach. U vyniku hetyja chimikaty apynajucca ŭ rekach.
Bolš za toje, praca na džynsavych fabrykach časta vielmi niebiaśpiečnaja. Apracoŭka denimu strumieniami piasku, kab nadać džynsam znošany vyhlad, dla rabotnikaŭ stanovicca strašnym udaram pa zdaroŭi. Drobnyja čaścicy piasku, jakija ŭdychajuć rabočyja, vyklikajuć zachvorvańnie lohkich, viadomaje jak silikoz.
Inšaja biada — kali džynsy zroblenyja ź sintetyčnych vałoknaŭ abo ź miełanžu bavoŭny i sintetyki, jany nie pierahnivajuć paśla vykidańnia.
Niekatoryja brendy reahujuć na heta i inviestujuć u alternatyŭnyja varyjanty. Naprykład, Tencell — bijaraskładalnaja tkanina, jakaja vyrablajecca z celułozy, užo maje kantrakty z papularnymi džynsavymi brendami.
Italjanskaja kampanija Candiani stvaryła ełastyčny denim z naturalnaha kaŭčuku, jaki bijałahična raskładajecca za 6 miesiacaŭ i nie pakidaje taksinaŭ u hlebie. Pradstaŭniki kampanii miarkujuć, što takaja technałohija moža źmianić usiu džynsavuju industryju.
Varta adznačyć, što nie tolki džynsy, luboje adzieńnie z bavoŭny heta ekałahičnaja nahruzka na Ziamlu, a luboje adzieńnie ź sintetyki — heta niebijaraskładalnaje śmiećcie.
U suviazi z hetym hałoŭnaje, što treba pamiatać, kali havorka pra ekałohiju i źbieražeńnie płaniety, — treba vučycca spažyvać mienš. Nie kuplajcie novaj pary džynsaŭ, pakul nie znasili papiaredniaj.
