Uładam Indyi kazali pra vysokuju zaraznaść novaha štama kavidu SARS-CoV-2, znojdzienaha ŭ krainie, adnak urad nie pryniaŭ nijakich mieraŭ, kab strymać epidemiju.

Pra heta paviedamlaje ahienctva Reuters sa spasyłkaj na krynicy.

Abjadnańnie navukoŭcaŭ INSACOG, stvoranaje ŭradam u śniežni śpiecyjalna dla vyjaŭleńnia novych štamaŭ kavidu, u pačatku sakavika papiaredziła indyjskich čynoŭnikaŭ pra novy i bolš zarazny varyjant karanavirusa, jaki źjaviŭsia ŭ krainie. Adnak, pavodle słoŭ navukoŭcaŭ, ułady nie chacieli nakładvać surjoznyja abmiežavańni dla spynieńnia raspaŭsiudu virusa.

Upieršyniu daśledčyki INSACOG vyjavili B.1.617, jaki ciapier viadomy jak «indyjski» štam virusa, jašče ŭ lutym.

Papiaredžańnie pra novy štam było pieradadziena najvyšejšamu čynoŭniku, jaki padparadkoŭvajecca niepasredna premjer-ministru Narendry Modzi, pa słovach adnaho z navukoŭcaŭ. Žurnalistam nie ŭdałosia vyśvietlić, ci aznajomiŭsia z vysnovami navukoŭcaŭ asabista premjer.

Tym časam miljony ludziej, pieravažna biez masak, nie vykonvajučy mieraŭ biaśpieki, praciahvali naviedvać relihijnyja fiestyvali i palityčnyja mitynhi, jakija pravodzili Modzi, lidary kirujučaj partyi «Bcharata džanata partyi» i apazicyjnyja palityki. Dziasiatki tysiač fiermieraŭ praciahvali žyć u tabary na ŭskrajku Ńju-Deli, pratestujučy suprać źmien ahrarnaj palityki Modzi.

U premjer-ministra Modzi, jak i ŭ Ministerstvie achovy zdaroŭja krainy, nie adkazali na prośbu žurnalistaŭ prakamientavać infarmacyju.

U piatnicu Indyja paviedamiła pra 386 452 novyja vypadki COVID-19, što źjaŭlajecca suśvietnym rekordam. U indyjskich miehapolisach situacyja z karanavirusam vyjšła z-pad kantrolu: ad chvaroby štodnia pamirajuć tysiačy ludziej — ich nie paśpiavajuć chavać.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?