Aleha Kraŭcova zatrymali ŭ budynku sudu, kudy jon pryjšoŭ na praces kalehi Paŭła Palejčyka, 8 maja 2020 hoda
Imia Aleha Kraŭcova prahučała na ŭsiu Biełaruś hod tamu razam ź imiem jahonaha kalehi Paŭła Palejčyka. Felčaraŭ zatrymali letaś u traŭni za ŭdzieł u sustrečach z błohieram Siarhiejem Cichanoŭskim. Abodva tady atrymali pa 7 sutak administracyjnaha aryštu. Heta byli adny ź pieršych zatrymańniaŭ u pačatku prezydenckaj kampanii 2020 hodu. Salidarnyja biełarusy za niekalki dzion sabrali dla felčaraŭ 20 tysiač rubloŭ.
Aleh Kraŭcoŭ na fota sprava.
Aleha Kraŭcova znoŭ zatrymali letaś u listapadzie. Jaho vinavaciać u «rejkavaj spravie», nibyta jon abkručvaŭ drotam rejki na čyhuncy, kab zablakavać ruch. Pavodle artykułu 309 Kryminalnaha kodeksu «Naŭmysnaje pryviadzieńnie ŭ nieprydatnaść šlachoŭ kamunikacyi», jamu pahražaje da troch hadoŭ kalonii. Jon užo paŭhoda znachodzicca ŭ horadzienskaj turmie. U «rejkavaj spravie» pa ŭsioj krainie letaś zatrymali dziasiatki čałaviek.
List ad felčara atrymała Antanina Makaranka. Kraŭcoŭ pisaŭ jaho ŭ svoj 32-i dzień narodzinaŭ, 13 krasavika. Radyjo Svaboda cytuje frahmenty lista.
Pra salidarnaść. «A jakija časam prysyłajuć ašałamlalnyja vodary!»
«Kožny z vas ukłaŭ u listy dušu i dabryniu. Za hety čas ja sabraŭ pyšnaje asarci ź listoŭ, paštovak, układańniaŭ, nalepak, malunkaŭ. Jakija ž jarkija kolery! Voka radujecca! A jakija časam prysyłajuć ašałamlalnyja vodary! Heta ž niešta nieziamnoje! Jak ža tut usiaho hetaha nie chapaje…
Kožny vaš list niasie ŭ sabie čaścinku voli. Dziakujučy vam adbyvajucca pieramieny ŭ našym hramadztvie. Vy abjadnoŭvajecie vakoł siabie dobrych i sumlennych, hodnych i mužnych pradstaŭnikoŭ našaj cudoŭnaj krainy.
Treba ŭmacoŭvać hetyja sacyjalnyja suviazi. Treba vučycca być hramadzianami, vučycca salidarnaści i pravavoj aśviecie, stanavicca jurydyčna padkavanymi. My sami musim być tymi pieramienami, jakija chočam bačyć u hramadztvie!
Na dzień naradžeńnia mianie pavinšavali sukamerniki. Padaryli pačak harbaty, ciomny šakalad i pačak zapałak. Pryhažość, praŭda ž? Zrabili sami torciki: piečyva, varanaja zhuščanka, arechi. Paśla taho, jak atrymaŭ u pieradačy vafielnyja karžy, zrabiŭ tort sa zhuščankaj, sadavinoj i arechami. M-m-m… Plus byŭ jašče sałodki stoł — dzień byŭ śviatočny…»
Pra siabie: «Kali ja pracavaŭ felčaram na «chutkaj» — heta byŭ kajf»
«Ja šmat čym cikaviŭsia ŭ žyćci: vyvučeńniem roznych navuk, plus vučyŭsia zavočna ŭ BDUIR. Kali b moh sabie dazvolić, to z zadavalnieńniem by padarožničaŭ. Mnie padabajecca jeździć na rovary. Jašče mnie padabajecca dapamahać ludziam. Kali ja pracavaŭ felčaram na «chutkaj» — heta byŭ kajf.
Navat kali ja pačaŭ pracavać u kramie elektratavaraŭ, to ŭsio roŭna braŭ niekalki dziažurstvaŭ u miesiac na «chutkaj». Heta časta padymała mnie nastroj. Ja staraŭsia padzialicca hetym nastrojem z kalehami, a taksama dać nadzieju svaim pacyjentam i ichnym svajakam, bo časta dapamahčy čałavieku možna, prosta ź im pahavaryŭšy. Tak i pracavaŭ na paŭstaŭki «psycholaham»».
Pra padtrymku svajakoŭ viaźniaŭ: «Dać zrazumieć, što jany nie samotnyja»
«Siońnia ŭ turmach znachodzicca niemałaja kolkaść dobrych ludziej. U hetych miescach jany vielmi ŭraźlivyja. Na asabistym prykładzie razumieju, praz što možna prajści paśla zatrymańnia: abrazy, pahrozy, źniavahi, psychalahičny cisk, fizyčnaje ŭździejańnie.
A potym jašče znachodzicca va ŭmovach źniavoleńnia. U takich umovach niekatoryja łamajucca. Vielmi važna ich (źniavolenych. — RS) znajści i nie hublać. Dać zrazumieć, što jany nie samotnyja.
Nia mienš važna pamiatać pra ichnych blizkich, siamju, bo časam im davodzicca značna ciažej pieranosić nastupstvy zatrymańnia. Było b vielmi dobra, kali by vy napisali majoj žoncy i maci listy sa słovami padtrymki; mahčyma, im patrebna niejkaja dapamoha.
Ja čałaviek siamiejny, tamu navučańnie adyšło na druhi plan. Asnoŭny čas išoŭ na siamju, asabliva kali naradziŭsia synočak. Jon adkryŭ dla mianie zusim novy śviet.
Nie lublu tut uspaminać pra svaju siamju, tamu što vielmi baluča, i zrabić ja ničoha nie mahu. Ale ja navat nie mahu ŭjavić, jak ciažka synočku śviatkavać 8 hadoŭ biez svajho lubimaha tatački. Ja čytaju jahonyja listy i pytajusia: «Voś navošta heta ŭsio jamu?»»
Pra «suśviet» turmy: «Izalacyja mianiaje čałavieka da niepaznavalnaści»
«Kab apisać «suśviet» turmy, moža spatrebicca nie adna kniha. Heta paralelny śviet sa svaimi zakonami i praviłami — «zalustroŭje». U kožnaj kamery svajo nasielnictva, zakony, praviły, kultura, pobyt, bahaćcie. Časam adzin čałaviek, jaki zasielicca ŭ kameru, moža pieraviarnuć usio z noh na hałavu.
Z momantu etapavańnia ŭ turmu ja źmianiŭ užo 8 kamer. A ich tut na paradak bolš. Tak što ja jašče ničoha tołkam nia bačyŭ. Uličvajučy, što ja tut upieršyniu, to siadžu ŭ adnoj kamery z dvuma padobnymi čałaviekami. Ludzi traplajucca roznyja, ale hałoŭnaje, što adekvatnyja.
Pa natury ja daśledčyk, tamu mnohaje, što adbyvajecca vakoł mianie, sprabuju vyvučyć, pravieści analiz, zrabić dla siabie vysnovu. Ja sprabuju mnohija rečy stavić pad sumnieŭ, pierapraviarać. Ja baču, jak upłyvaje na ludziej izalacyja: u spałučeńni z turemnaj kulturaj daje taki efekt, jaki mianiaje čałavieka da niepaznavalnaści. Kažuć, što hałoŭnaje — zastavacca čałaviekam. Ale čym daŭžej hladzieć u ciemru, tym macniej jana pahłynaje».
Pra pobyt: «Prablemaj była adnastajnaść»
«Navat tut cieplicca žyćcio: śviatkujuć značnyja padziei, śmiajucca amal kožny dzień, zajmajucca svaimi spravami. Pamiataju, jakoj prablemaj była adnastajnaść. Z dnia ŭ dzień adno i toje ž.
Čym tolki za hety čas ja nie zajmaŭsia: staŭ rabić fizyčnyja praktykavańni, navučyŭsia pisać pravaj rukoj (da hetaha byŭ laŭšun), navučyŭsia malavać, vyvučyŭ pryhožyja šryfty dla pryhožaha afarmleńnia listoŭ, pačaŭ pisać vieršy, vučyć anhielskuju movu, navat lažyć kniha ab prahramavańni na movie Java. Ciapier listy adpisvaju. Času na ŭsio nie chapaje. Kali siadzieć?
Što tyčycca pobytu, to ŭsio narmalna. Nas kormiać u apošnija tydni lepš, achoŭvajuć, na prahułki vyvodziać kožny dzień. Dvoryk pamieram z pakoj, ścieny vyšynioj u dva rosty čałavieka. Zamiest stoli — nieba ŭ kratki, pa perymetry drot u try rady pad nazvaj «niepasieda». Ciažka, viadoma, kali tvajo žyćcio abmiežavanaje ličanaj kvadraturaj voli. Ale ničoha nia zrobiš.
Pišycie listy tym, chto ŭ niavoli, pišycie listy ichnym siemjam. Usim nieabyjakavym vialikaje vitańnie. Bieražycie siabie».
