Narviežskaja kampanija Yara — adzin z najbujniejšych suśvietnych pastaŭščykoŭ minieralnych uhnajeńniaŭ i adzin z klučavych klijentaŭ Biełaruskaj kalijnaj kampanii.

Apošnim časam Yara imknułasia dasiahnuć pazityŭnych źmien praz dyjałoh z kiraŭnictvam Biełaruskaj kalijnaj kampanii i «Biełaruśkalija».

Raniej strajkam «Biełaruśkalija» źviarnuŭsia da narviežskaj kampanii z prośbaj nie padpisvać kantrakt da vykanańnia kiraŭnictvam pradpryjemstva vyłučanych strajkamaŭcami patrabavańniaŭ.

— Dniami pa videasuviazi adbyłasia sustreča z hienieralnym dyrektaram Yara Śviensam Ture Chołzieteram pry ŭdziele karparatyŭnaha pradstaŭnika kampanii Hiejra A.Sundbo, — raspavioŭ «Narodnaj Voli» lidar strajkama AAT «Biełaruśkalij» Anatol Bokun. — Heta, darečy, była inicyjatyva narviežskaha boku.

My prainfarmavali narviežcaŭ pra padziei, jakija adbyvalisia z udzielnikami strajku paśla 1 sakavika (u hety dzień apošni raz była videasuviaź), a hiendyrektar Yara paviedamiŭ nam navinu: ich pradstaŭnika vyrašana delehavać u Salihorsk. Na «Biełaruśkalii» jon budzie znachodzicca i manitoryć situacyju kala paŭhoda.

Treba adznačyć, što pradstaŭniki narviežskaj kampanii ŭžo pravodzili na pradpryjemstvie aŭdyt sistemy achovy pracy, i ja paprasiŭ pakazać nam vyniki pravierki. Pakul takuju infarmacyju nam nie pradastavili.

Čym kankretna budzie zajmacca pradstaŭnik kampanii Yara na «Biełaruśkalii»?

— Vidać, prosta nazirać za situacyjaj. U narviežcaŭ peŭny płan užo jość, i jany jaho prytrymlivajucca.

Raniej vy źviartalisia da narviežskaj kampanii z prośbaj nie padpisvać kantrakt da vykanańnia kiraŭnictvam pradpryjemstva vyłučanych strajkamaŭcami patrabavańniaŭ. Jość niejki adkaz z hetaj nahody?

— Nakolki my zrazumieli, jany jakraz-taki dziejničajuć pa svaim płanie, i kali hetyja dziejańni ni da čoha nie pryviaduć, efiektu nie budzie, to albo narviežcy skasujuć kantrakt, albo kiraŭnictva «Biełaruśkalija» pryznaje, što niama pierśpiektyŭ dla dalejšaha dyjałohu, supracoŭnictva i pošuku kampramisnych rašeńniaŭ.

Hienieralny dyrektar Yara Śviens Ture Chołzieter kožny raz nahadvaje, što skasavańnie kantrakta — heta sychod nazaŭsiody. Tamu narviežcy i imknucca ŭsio-taki znajści kampramis.

Pradstaŭniki strajkama ŭ dyjałoh pamiž kiraŭnictvam narviežskaj kampanii i «Biełaruśkalija» nie ŭklučany?

— My kazali, što dla ŭsiebakovaha i abjektyŭnaha razhladu pastaŭlenych pytańniaŭ treba ŭklučyć u pieramoŭny praces udzielnikaŭ strajku, ale pakul u pradstaŭnikoŭ narviežskaj kampanii naša inicyjatyva, skažam tak, nie znachodzić razumieńnia.

Śviens Ture Chołzieter padčas apošniaj sustrečy zajaviŭ, što farmat dyjałohu nie praduhledžvaje ŭdziełu ŭ im našych pradstaŭnikoŭ. Chacia heta, biezumoŭna, niapravilna.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?