13 maja a dziaviataj hadzinie viečara CACHAŁ pačaŭ ściahvać naziemnyja siły ŭzdoŭž miažy ź Siektaram Haza, kab byccam nanieści ŭdar pa celach CHAMAS. Da hetaha CACHAŁ nanosiŭ mocnyja ŭdary z pavietra, ale naziemnaja apieracyja, jak miarkujecca, mahła b nanieści jašče bolšuju škodu, piša The Jerusalem Post.
Unočy 14 maja na anhłamoŭnym akaŭncie izrailskaj armii ŭ Twitter źjaviŭsia dopis, što «naziemnyja i pavietranyja siły CACHAŁ prosta ciapier atakujuć celi ŭ Siektary Haza».
Tut ža ŭ stužkach viadučych suśvietnych ŚMI pačała źjaŭlacca navina, što ŭ Siektary Haza pačynajecca naziemnaja apieracyja, jakaja śviedčyć pra abvastreńnie kanfliktu ŭ rehijonie.
Adnak prablema zaklučałasia ŭ tym, što naziemnaj apieracyi nasamreč nie było. CACHAŁ ściahnuŭ svaje naziemnyja siły da miažy ź Siektaram Haza, ale vojski miažu nie pierasiakali. Metaj izrailskaj armii było «mietro» — padziemnaja sietka tunelaŭ CHAMAS, schavanaja ad izrailskich samalotaŭ, jakaja vykarystoŭvałasia isłamisckaj hrupoŭkaj dla zachoŭvańnia zbroi i pierasoŭvańnia pa Siektary z 2014 hoda.
Paśla paviedamleńniaŭ u zachodnich ŚMI ab naziemnaj apieracyi z boku Izraila apieratyŭniki CHAMAS nakiravali pieršuju liniju abarony ŭ tuneli, kab supraćstajać izrailskim naziemnym siłam. Adnak nijakaj naziemnaj apieracyi nie było, a apieratyŭniki CHAMAS byli atakavanyja izrailskimi bajavymi samalotami.
Ciapier isnuje mierkavańnie, što tvit byŭ naŭmysnaj dezynfarmacyjaj z boku CACHAŁ, kab bajeviki CHAMAS byli pierakananyja, što ŭvachod u tuneli biaśpiečny. Pa acenkach The Jerusalem Post, u vyniku izrailskaj apieracyi było zabita 300-400 bajevikoŭ CHAMAS. Dakładnaja kolkaść zahinułych nie paviedamlajecca.
Ilustracyjnaje videa, apublikavanaje CACHAŁ, demanstruje, jak vyhladała «mietro» CHAMAS i jak jano było źniščana