Pa źviestkach Ministerstva achovy zdaroŭja Brazilii, z pačatku pandemii ŭ krainie pamierli 832 dziciaci va ŭzroście da 5 hadoŭ. Dla paraŭnańnia: u ZŠA, dzie nasielnictva značna bolšaje i kolkaść pamierłych ad kavidu vyšejšaja, pamierli 139 dziaciej za toj ža čas.
Bolš za toje, aficyjnaja kolkaść dziciačych śmierciaŭ, vierahodna, značna zanižanaja, bo praz adsutnaść dastatkovaj kolkaści testaŭ mnohija vypadki nie fiksujucca, piša The New York Times.
Takoj kolkaści pamierłych dziaciej ad kavidu nie nazirajecca bolš nidzie ŭ śviecie.
Hetyja ličby ździŭlajuć ekśpiertaŭ z usiaho śvietu. Niama nijakich źviestak, jakija b paćvierdzili, što toj ci inšy varyjant karanavirusa bolš śmiarotny dla dziaciej. Ale jość mierkavańnie, što štam, jaki cyrkuluje ŭ Brazilii, vyklikaje bolšuju śmiarotnaść siarod ciažarnych žančyn. U ekśpiertaŭ jość dokazy, što varyjant P.1 časta praciakaje bolš surjozna, kali žančyna ciažarnaja. Daśledčyki zafiksavali vypadki, kali hety štam byŭ śmiarotnym i dla žančyny, i dla niemaŭlaci.
Na dumku ekśpiertaŭ, vyznačalnym faktaram śmiarotnaści siarod dziaciej źjaŭlajecca adsutnaść svoječasovaha dostupu da miedycynskaj dapamohi. U ZŠA i Jeŭropie lačeńnie na rańnich etapach pryvodzić da chutkaha vyzdaraŭleńnia infikavanych dziaciej. U Brazilii, u svaju čarhu, pierahružanyja daktary časta spaźniajucca z paćviardžeńniem infiekcyi ŭ dziaciej.
Časta dzieciam prosta nie robiać testy, a dapamohu jany atrymlivajuć, kali ŭžo ich špitalizujuć u drennym stanie.
Da pačatku pandemii miljony brazilcaŭ, jakija žyli ŭ biednych rajonach, mieli abmiežavany dostup da bazavaha miedycynskaha absłuhoŭvańnia. A za apošnija miesiacy sistema achovy zdaroŭja ŭ krainie stała jašče bolš pierahružanaj praź vialikuju zachvorvalnaść.
