Tut.by paličyŭ nieabchodnym dać tłumačeńni pa siužetach, pakazanych pa dziaržkanałach. TAA «Tut baj miedyja» ŭ 2019 hodzie atrymała status rezidenta PVT. Pryčym na zakonnych padstavach. Pry ŭstupleńni ŭ PVT TAA «Tut baj miedyja» pa pracedury padavała biznes-prajekt, jaki prajšoŭ ekśpiertyzu administracyi PVT. Naš prajekt byŭ uchvaleny administracyjaj PVT, i da 18 maja 2021 hoda na adras «Tut baj miedyja» nie pastupała pretenzij z boku administracyi. Za čas pracy ŭ ramkach PVT kampanija paśpiachova prachodziła pravierki i aŭdyty prajekta, pravierki nie znajšli parušeńniaŭ, pretenzij da dziejnaści TAA nie ŭźnikała, i tym bolš nie było padstaŭ dla vyklučeńnia z PVT. Heta značyć, u chodzie dziejnaści kampanija rehularna davała spravazdaču pierad administracyjaj PVT.
U KDK ciapier śćviardžajuć, što kampanijaj była atrymanaja vyručka, nie abumoŭlenaja dziejnaściu, dazvolenaj dla rezidentaŭ PVT. Heta i stała nibyta padstavaj dla kryminalnaj spravy.
Pry hetym chočam udakładnić, što siarod zatrymanych jość rabotniki kampanij, jakija nie majuć dačynieńnie da «parkavaj» dziejnaści TAA «Tut baj miedyja» (u ich taksama pravodzilisia pieratrusy).
U siužecie ŭ vinu stavicca vykarystańnie «inšaha prahramnaha zabieśpiačeńnia śpiecyjalizavanaha», što kampanija nibyta atrymlivała vyručku za košt hetaj dziejnaści, što źjaŭlajecca niedapuščalnym dla rezidentaŭ PVT. Pakul niezrazumieła, u čym kankretna ŭ KDK bačać parušeńnie. Partał udakładniaje, što raździełaŭ partała, jakija prynosiać vyručku i ŭ jakich adsutničaje ŭ tym ci inšym vyhladzie ŭłasnaja raspracoŭka PA, u «Tut baj miedyja» niama.
Pa TB pradstaŭnik KDK taksama zajaviŭ pra škodu ŭ «miljony dalaraŭ ZŠA». Adkul takaja suma, jak tak chutka padličyli ŭ viedamstvie — adkrytyja pytańni.
U telesiužecie vidavočna śpiekulujuć na vypłatach u FSAN i nibyta ekanomii na ŭmoŭnych piensijanierach. U efiry demanstrujecca nibyta daviedka ab dachodach hiendyrektara Tut.by. Dziaržtelekanał śćviardžaje, što «zekanomlenyja na piensijanierach hrošy pavinny byli ŭtulna ŭładkavacca ŭ adnym z łatvijskich bankaŭ».
U hetaj situacyi jość dva momanty. Pieršy momant — znachodžańnie ŭ PVT praduhledžvaje lhoty pa vypłacie ŭznosaŭ u FSAN: supracoŭnik kampanii, jakaja ŭvachodzić u PVT, adličvaje ŭ FSAN 1% ad siaredniaha zarobku pa krainie za miesiac, jaki papiaredničaje spravazdačnamu. Jašče 34% vypłačvaje najmalnik.
Adnak heta adbivajecca ŭ budučyni ŭ pieršuju čarhu niepasredna na piensii samoha rabotnika, za jakoha vypłačvajuć unioski pa lhotnaj staŭcy, a nie na piensii ŭjaŭnaha piensijaniera. Kali dziaržSMI robiać upor na toje, što z-za hetych ilhot niedabiraje ŭznosaŭ u FSAN, to dziaržava sama ž i ŭviała hetyja prefierencyi dla rezidentaŭ PVT.
Druhi momant — padachodny padatak. Na vypłačanyja sumy padachodnaha padatku praparcyjna sumie dachodu, jakija iduć u tym liku na sacyjalnyja vydatki dziaržavy, dziaržprapahanda čamuści nie źviartaje ŭvahu. Jak nie akcentuje ŭvahu i na tym, što dyvidendy ŭznosam u FSAN nie abkładajucca. DziaržTB i praŭładnyja telehram-kanały ŭziali ahulnuju sumu dachodu (zarpłata i dyvidendy) i pakazali, jakaja nibyta «maleńkaja» suma adličeńniaŭ u FSAN. Heta značyć zarpłatnyja i inšyja padatki kampanija płaciła, zychodziačy z tych stavak, jakija praduhledžany Praviłami dla rezidentaŭ PVT. Tamu prademanstravany pa TB dakumient nie pakazvaje na parušeńni.
Da taho ž infarmacyja pra zarobki rabotnikaŭ źjaŭlajecca kanfidencyjnaj i achoŭvajecca zakanadaŭstvam ab piersanalnych danych. Sam čałaviek maje prava paviedamlać jaje kamu zaŭhodna, ale nie pabočnaja asoba abo najmalnik.
Asablivaja ŭvaha ŭ siužecie dziaržTB nadajecca tamu, što kampanija nibyta razhladała mahčymaść adkryćcia rachunku ŭ adnym z łatvijskich bankaŭ. Apuskajem sam fakt mahčymaj prasłuški i jaje abnarodavańnie ŭ ŚMI. Skažam tolki, što adkryćcio rachunku jurydyčnaj asobaj za miažoj nie zabaroniena.
Navat kali zychodzić ź infarmacyi, jakaja była ahučana ŭ siužecie na dziaržTB, havorka išła pra mahčymaść pieravodu hrošaj z rachunku biełaruskaha banka ŭ łatvijski. Heta značyć hrošaj, jakija atrymany lehalnym šlacham i ź jakich vypłačanyja padatki.
Taksama ŭ siužecie śćviardžajecca, što padčas pieratrusu ŭ kvaterach u supracoŭnikaŭ kampanii (a pieratrusy, udakładnim, prachodzili ŭ mnohich našych kalehaŭ, pryčym nie tolki ŭ Minsku) znajšli najaŭnyja hrošy, u niekatorych — nibyta bujnyja sumy. Pakiniem za dužkami dziŭnyja varyjanty zachoŭvańnia hrošaj i ich materyjalizacyi ŭ sabačym kormie. Ale Tut.by — adzin z samych paśpiachovych partałaŭ va Uschodniaj Jeŭropie z dobrymi zarobkami. Jany vypłačvalisia aficyjna, ź ich vypłačvalisia padatki. U top-mieniedžaraŭ znajšli hrošy? Siensacyja.
I naprykancy jašče adzin niuans. Na dziaržTB pasprabavali abvinavacić Tut.by u tym, što materyjały na partale padavalisia nibyta «vyklučna ŭ antydziaržaŭnym klučy». A ŭ paprok staviać siarod inšaha toje, što «vieterany nibyta zastalisia biez hrošaj i ceny rastuć».
Pakazanyja ŭ siužecie zahałoŭki (u tym liku: «Ciapier aficyjna: vieterany VAV nie atrymajuć u hetym hodzie adnarazovyja vypłaty da 9 Maja» (pa zajavie Minpracy 6 maja), «Jašče adno padatkovaje novaŭviadzieńnie: na leki, miedvyraby, pradukty i dziciačyja tavary padniali PDV» (pa infarmacyi MPZ), «Možam zastacca bieź piensij, dapamoh». «Rabotnikaŭ prosiać padpisać list prafsajuzaŭ pa sankcyjach» (pa paviedamleńni Fiederacyi prafsajuzaŭ Biełarusi)) — heta aficyjnyja zajavy biełaruskich uładaŭ. Ale Minpracy, Biełstat, Nacbank i inšych nie śpiašajucca papraknuć u «antydziaržaŭnaści».
