Łaŭroŭ i Blinkien sustrelisia ŭ stalicy Isłandyi paśla pasiadžeńnia Arktyčnaj rady, paviedamili infarmahienctvy. Pieršy vočny kantakt praciahnuŭsia 1 hadzinu 40 chvilin.
U hetym hodzie da Rasii pa pryncypie ratacyi pierachodzić post staršyni hetaj mižnarodnaj struktury. Sa słoŭ Blinkiena, sustreča prajšła «z metaj pravieryć prapanovu ab bolš stabilnych i pradkazalnych stasunkach z Maskvoj». Dziaržsakratar havaryŭ z Łaŭrovym ab prychilnaści Vašynhtona patencyjnamu supracoŭnictvu z Maskvoj u roznych śfierach, u tym liku ŭ Arktycy. Ale ŭ ZŠA nie stali zabyvać i pra roznahałośsi: i Blinkien, i Ned Prajs, kažučy pra sustreču, nie zabylisia zhadać, što ZŠA paćvierdzili hatoŭnaść adkazać na dziejańni Rasii ŭ dačynieńni da Ukrainy, apazicyjaniera Alaksieja Navalnaha i ŭ pytańni cisku na ŚMI.
Ministr zamiežnych spraŭ Rasii Siarhiej Łaŭroŭ nazvaŭ pieramovy ź dziaržsakratarom ZŠA Entani Blinkienam kanstruktyŭnymi.
«Hutarka mnie padałasia kanstruktyŭnaj. Jość razumieńnie nieabchodnaści pieraadoleć niezdarovuju situacyju, jakaja skłałasia pamiž Maskvoj i Vašynhtonam u papiarednija hady», — skazaŭ kiraŭnik MZS RF paśla sustrečy z amierykanskim kaleham.
Łaŭroŭ zajaviŭ, što ŭbačyŭ u Entani Blinkiena i jahonaj kamandy hatoŭnaść da taho, kab razabrać «zavały» ŭ rasijska-amierykanskich stasunkach.
Pa vynikach sustrečy buduć rychtavacca prapanovy dla prezidentaŭ Rasii i ZŠA pa pytańniach stratehičnaj stabilnaści, raspavioŭ Łaŭroŭ.
Jon adznačyŭ, što jašče administracyja byłoha prezidenta ZŠA Donalda Trampa pryniała antydypłamatyčnyja miery ŭ dačynieńni da RF. «Hetaja łancuhovaja reakcyja nikoha nie zadavalniaje, i ja adčuŭ u našych amierykanskich kalehaŭ takoje ž adčuvańnie. Budziem rychtavać prapanovy dla našych prezidentaŭ i pa hetych pytańniach, i pa pytańniach raźvićcia našaha dyjałohu pa stratehičnaj stabilnaści», — adznačyŭ ministr.
Łaŭroŭ padkreśliŭ, što Maskva paćvierdziła hatoŭnaść abmiarkoŭvać u ramkach dyjałohu pa stratehičnaj stabilnaści ŭsie aśpiekty i faktary, jakija ŭpłyvajuć na jaje, Vašynhton nie admoviŭsia ad takoj kancepcyi.
Łaŭroŭ paviedamiŭ, što abmierkavaŭ ź Blinkienam efiektyŭnaje ŭzajemadziejańnie dźviuch krain pa iranskaj jadziernaj prahramie, Paŭnočnaj Karei i Afhanistanie.
Łaŭroŭ paviedamiŭ, što taksama abmierkavaŭ ź dziaržsakratarom ZŠA pytańni ŭzajemnaj dypłamatyčnaj prysutnaści dźviuch krain.
Kiraŭnik MZS RF nie staŭ adkazvać na pytańnie ab tym, ci damovilisia baki ab praviadzieńni samitu.
