Mantaž absarbcyjnych kałon u porcie Uść-Łuha, startavym punkcie «Paŭnočnaha patoka-2». Fota neftegaz.ru
Administracyja Bajdena źniała apošniuju pieraškodu na šlachu dabudovy hazapravoda «Paŭnočny patok-2». Vašynhton abvieściŭ pra ŭviadzieńnie sankcyj suprać kampanii Nord Stream 2 AG i jaje hiendyrektara Matyjasa Varniha i adnačasova pra ich prypynieńnie «ź mierkavańniaŭ nacyjanalnaj biaśpieki».
Na pabudovie hazapravoda nastojvała Hiermanija.
Čynoŭnik Dziaržaŭnaha departamienta ZŠA skazaŭ vydańniu «Uoł-stryt džornał», što prypynieńnie sankcyj adpaviadaje linii novaj prezidenckaj administracyi ZŠA na palapšeńnie adnosin z sajuźnikami. Papiaredniaja administracyja Trampa rezka krytykavała Bierlin za namier kuplać bolš rasijskaha hazu i ŭvodziła roznaha typu sankcyi suprać «Patoku-2», jakija zatarmazili realizacyju prajekta, ale nie zabili jaho kančatkova.
Inšy čynoŭnik Dziarždepa patłumačyŭ, što ŭ ZŠA niama mahčymaściej spynić prajekt. Sychodziačy z hetaha, Vašynhton ličyć svaim pryjarytetam dabicca zachavańnia pastavak hazu va Ukrainu.
Pazicyja Hiermanii dyktujecca nacyjanalnymi ekanamičnymi intaresami: krainie patrebny rasijski haz dla zachavańnia enierhietyčnaha bałansu ŭ situacyi, kali pad ciskam ekołahaŭ kraina admaŭlajecca ad atamnaj enierhietyki i vuhalu, jaki daje bolš vykidaŭ u atmaśfieru, čym haz.
Paśla pabudovy «Paŭnočnaha patoku-2» Rasija zmoža spynić tranzit hazu praz Ukrainu, što budzie mocnym finansavym udaram pa hetaj krainie. Patencyjny niehatyŭny efiekt moža być taksama dla Słavaččyny i Polščy.
«Paŭnočny patok-2» — prykład taho, kali palityčnyja i ekanamičnyja intaresy ŭvachodziać u supiarečnaść. Anałahična i ŭ 1970-ch ZŠA vystupali suprać pabudovy rasijskich naftapravodaŭ u Jeŭropu, adnak jeŭrapiejskija lidary bačyli ŭ hetym svoj intares.
Bierlin u pieramovach z Rasijaj abumoŭlivaŭ nieabchodnaść praciahu tranzitu praz Ukrainu navat paśla ŭviadzieńnia ŭ dziejańnie «Paŭnočnaha patoku-2», ale realnaść takaja, što Maskva zmoža ciapier taki tranzit spyniać biez krytyčnaha parušeńnia kantraktaŭ ź jeŭrapiejskimi spažyŭcami.
Pastaŭki rasijskaha hazu dla Jeŭropy vyhadnyja, ale nie krytyčnyja. Pavodle jeŭrasajuzaŭskich standartaŭ enierhietyčnaj biaśpieki, kožnaja kraina maje atrymlivać z adnoj krynicy nie bolš za 30% enierharesursaŭ. Dla paraŭnańnia: Biełaruś zaležnaja ŭ pastaŭkach nafty, hazu, vuhalu i atamnaha paliva ad adnoj krainy, Rasii, amal na 100%.
Dla skančeńnia 900-kiłamietrovaha «Patoka-2» zastajecca dabudavać kala sta kiłamietraŭ. Pralahaje jon pa dnie Bałtyjskaha mora.
65-hadovy Matyjas Varnih, jaki ŭznačalvaje zarehistravanuju ŭ Šviejcaryi kampaniju Nord Stream 2 AG, były aficer HDRaŭskaj śpiecsłužby «Štazi». Śćviardžajecca, što jon pracavaŭ razam z Pucinym, kali toj byŭ rezidentam savieckaha KHB u HDR.
