2 krasavika z palihona ŭ Bresckaj vobłaści źbieh 19-hadovy sałdat terminovaj słužby Alaksandr Karatkievič. Chłopiec źjechaŭ na hruzaviku, z saboj u jaho była zbroja. Aŭtamabil paźniej znajšli na abočynie va Ušackim rajonie Viciebskaj vobłaści, a sałdata znajšli tolki praz dva dni ŭ adnoj ź viosak Ušackaha rajona. Pra toje, što chłopiec znachodzicca tam, milicyi paviedamili miascovyja žychary. Sałdata zatrymali, nahadvaje kp.by.
Mama Alaksandra, Taćciana, kaža, što navin pra syna ŭ jaje mała.
— Mnie samoj tak chočacca niešta viedać! Ale mnie ničoha nie kažuć, usio cicha. Spatkańniaŭ u nas nie było, idzie śledstva. Skazali — paźniej. Ja nie viedaju, čamu, ale mianie nie trymajuć u kursie, ja nie viedaju, kali pavinna zaviaršycca rasśledavańnie.
Taćciana atrymlivaje listy ad syna. U ich Alaksandr niešmatsłoŭny: imkniecca supakoić mamu, ale ničoha nie abiacaje.
— Jon u mianie sam pa sabie spakojny. Jak by tam ni było, jon budzie imknucca nie kazać, kab mianie nie chvalavać. Bo ja dziaciej adna hadavała i jon mianie vielmi škaduje, ničoha nie skaža, navat kali jość niešta drennaje. Prosić nie chvalavacca, nie płakać — a što dzicia jašče moža napisać, kab maci supakoić? «Usio budzie dobra» taksama nie piša. Jon chłusić nie budzie, lepš pramaŭčyć, čym nadzieju daść.
Žančyna kaža, što starajecca nie płakać — ab hetym u kožnym liście prosić syn.
— Kali žyvieš na tabletkach, to atrymlivajecca. Biez tabletak — nie nadta. Kali staŭ čaściej pisać, i mnie stała lepiej. Pieršy čas tolki žyła na hetych tabletkach.
Pra pryčyny ŭciokaŭ Alaksandra z čaści jaho mama nie viedaje.
— Što jaho spravakavała na heta — navat dumak niama. Ja ŭpeŭnienaja, što nie z-za dziaŭčyny. Ja adno viedaju: jamu padabałasia ŭ vojsku, vielmi padabałasia. Kali ščyra, jon hetym navat hanaryŭsia. Što mahło adbycca, ja nie viedaju. Dzicia telefanavała, było ščaślivaje, a potym taki rezki pieravarot.
***
Paśla incydentu ŭ Minabarony paviedamlali, što ŭ sałdata nie było zaŭvah pa słužbie, kiraŭnictva acharaktaryzavała jaho stanoŭča. Pavodle adnoj ź viersij, chłopiec moh źjechać da svajoj dziaŭčyny ŭ Połacki rajon. Sałdata šukali ŭ 11 rajonach Viciebskaj vobłaści: tam pracavała milicyja rehijona, unutranyja vojski, AMAP padraździaleńnia Ministerstva abarony.