«Jana abviaściła haładoŭku praz nadumanuju padstavu dla źmiaščeńnia jaje ŭ karcar. Termin 7 sutak, z 7 pa 14 červienia. Ola ŭ cełym adčuvaje siabie niadrenna, ale karcar jość karcar. Ź joj pracuje psycholah», — skazaŭ jon.
Pra toje, što błohierku źmiaścili ŭ karcar, baćki daviedalisia ŭčora, kali ŭ turmie ŭ Žodzinie ŭ ich nie pryniali pieradaču dla dački.
Siońnia z Volhaj sustreŭsia advakat.
«Volhu źmiaścili ŭ karcar nibyta za drennuju pryborku kamery, — kaža baćka. — Dačka tłumačyć, što drenna siabie adčuvała. Jaje źvinavacili, što nibyta drenna vycierty pył. Jana kaža, što vycirała. Taksama joj skazali, što jana nibyta nie pryjšła pa videlcy, była dziažurnaj pa kamery. Ola skazała, što ŭ jaje było rasstrojstva straŭnika i jana papiaredžvała, jana pajšła ŭ prybiralniu, a ŭ hety čas jaje prymusili iści pa videlcy. Potym u jaje skočyŭ cisk, jana hipatonik. U jaje narmalny cisk 90 na 60, a było 150 na 100. Jana prysieła na łožak, i ŭ hety čas zajšli achoŭniki i skazali, što jana hetym parušaje režym. Heta jaŭna nadumanyja padstavy. Ola absalutna niekanfliktny čałaviek, jaki razumieje, chto ŭ domie haspadar».
Pavodle baćki, Volha Takarčuk užo trecija sutki haładaje, nie prymaje ježu, tolki pje vadu. U suviazi z hetym ź joj pracuje psycholah, da jakoha Volha pretenzij nia maje.
«Jana abviaściła haładoŭku, bo niazhodnaja z tym, što jaje pavodziny ŭ kamery zasłuhoŭvajuć karcarnaha ŭtrymańnia. Heta nadumanyja padstavy», — kaža baćka, były supracoŭnik milicyi.
Andrej Takarčuk spadziajecca, što z pryčyny prablem ź ciskam dačku źmieściać u lačebny stacyjanar. Sa słoŭ advakata, jana napisała pra heta ŭ svaim zvarocie na imia kiraŭnictva turmy.
- Na maci dvuch niepaŭnaletnich dziaciej, błohierku Volhu Takarčuk zaviali spravu pa troch kryminalnych artykułach: 391-m (abraza sudździ abo narodnaha zasiadaciela), 188-m (paklop) i 342-m (arhanizacyja i padrychtoŭka dziejańniaŭ, što hruba parušajuć hramadzki paradak, albo aktyŭny ŭdzieł u ich).
- Błohierku čarhovym razam zatrymali 19 traŭnia i advieźli ŭ Pieršamajski RUUS, a 23 traŭnia jaje aryštavaŭ prakuror Pieršamajskaha rajonu Miensku. Ź izalatara na Akreścina jaje pieraviali ŭ turmu № 8 u Žodzinie.
- U błohierki Volhi Takarčuk dvoje niepaŭnaletnich dziaciej — 3 i 7 hadoŭ.
- Volha Takarčuk viadzie palityčny błoh, jaki maje kala 37 tysiač padpisčykaŭ.
