Uładyka Antonij. Fota kurjer.info.
Ad 9 červienia 41-hadovy Antonij (śvieckaje imia Dzianis Daronin) staŭ novym pravasłaŭnym jepiskapam Hrodzienskim i Vaŭkavyskim. Na hetaj pasadzie jon źmianiŭ pryncypovaha archijepiskapa Arciemija, jaki adziny siarod vyšejšaha pravasłaŭnaha duchavienstva nie zmaŭčaŭ pra palityčnyja padziei ŭ krainie. Chto ž taki hety Antonij?
Jahony rod pachodzić z rasijskaha Nižniaha Noŭharada, ale prodki jašče ŭ čas kalektyvizacyi źjechali ŭ Baku. U Azierbajdžanie Dzianis i naradziŭsia. Źjechali z Kaŭkaza baćki Daronina jašče ŭ 1986 hodzie, kali tam pačaŭsia ŭzdym nacyjanalnych ruchaŭ.
U vyniku siamja asieła ŭ Dubaŭlanach pad Minskam. «Ja maju savieckaje vychavańnie, ale pryjšoŭ da Boha», — kazaŭ Dzianis. Chłopiec vučyŭsia ŭ škole imia Achremčyka, baćki čakali, što jon źviaža los z mastactvam, ale junak vyrašyŭ ćviorda pastupać u duchoŭnuju sieminaryju.
Pastupaŭ, darečy, pa rekamiendacyi niadaŭna pamierłaha protaijereja Iaana Charaševiča, cieścia viadomaha Fiodara Poŭnaha. Kažuć, u sieminaryi Dzianis adznačyŭsia dobrym hołasam, jahony tenar byŭ zapatrabavany ŭ chory. Razam ź im vučyŭsia jašče adzin ciapierašni jepiskap — Parfiryj, jaki maje kafiedru ŭ Lidzie, ale toj adrazu ź pieršaha kursa pierajšoŭ na treci.
U čas vučoby ŭ Duchoŭnaj akademii Dzianisa na hod adpravili ŭ Šviejcaryju, prajści stažyroŭku ŭ Vyšejšym instytucie pravasłaŭnaha bahasłoŭstva ŭ Šambiezi. Kandydackaja dysiertacyja Daronina była na temu «Biełaruskija trebniki XVII — XVIII stahodździa: historyja liturhičnaha bahasłoŭstva».
Cikava, što pabyć zvyčajnym śviatarom sa svaim prychodam Dzianisu Daroninu tak faktyčna i nie daviałosia. Jahonaja karjera stała składvałasia inakš, chutčej pa «čynoŭnickaj» linii. Jašče da skančeńnia vučoby jon trapiŭ na pracu ŭ Minskaje jeparchijalnaje ŭpraŭleńnie, pracavaŭ pry mitrapalicie Fiłarecie.
Užo praz dva hady jaho pryznačyli asabistym sakratarom mitrapalita. Vielmi chutki ŭźlot. Faktyčna Daronin znachodziŭsia amal uvieś čas pry Fiłarecie, jon viedaŭ, z kim sustrakajecca, pra što havoryć i ab čym damaŭlajecca mitrapalit. Heta adna z klučavych pasad pry jeparchijalnym upraŭleńni.
U 2009 hodzie Dzianisa Daronina pastryhli ŭ manachi. Jon atrymaŭ imia Antonij u honar Antonija Rymlanina, pravasłaŭnaha uradženca ciapierašnich italjanskich ziamiel, jaki paśla hanieńniaŭ «łacinian» pryjechaŭ u Noŭharad.
U 31 hod Antonij (Daronin) užo staŭ archimandrytam — heta vysoki manaski čyn, zvyčajna jaho majuć nastajacieli bujnych manastyroŭ. U toj ža samy hod jaho pryznačyli adkaznym sakratarom Kiraŭnictva spravami Biełaruskaha ekzarchata, a jašče praz dva hady jon ŭznačaliŭ hetuju strukturu.
Kali novy mitrapalit BPC Pavieł (Panamaroŭ) stvaraŭ novyja jeparchii, to Antonija adpravili kiravać adnoj z takich — Słucka-Salihorskaj. U svaje 34 hady Daronin staŭ samym maładym biełaruskim jepiskapam i členam sinoda BPC. Mienavita tamu Antonija ličać ci nie hałoŭnym karjerystam u carkvie.
Na prezidenckija vybary 2020 hoda Antonij schadziŭ daterminova. Žurnalistam jon skazaŭ, što ŭ hetyja dni «molicca vyklučna ab Ajčynie». Potym jon źjaviŭsia tolki 16 žniŭnia, kali čytaŭ malitvu ab «pazbaŭleńni ad zhubnaj pošaści», a taksama zaklikaŭ usich da miru i zhody. 25 žniŭnia na sustrečy sa śviatarami z Klecka, Niaśviža i Kapyla Antonij addaŭ zahad pra toje, što pravasłaŭnyja śviatary nie majuć prava ŭdzielničać u mitynhach i manifiestacyjach, apranutymi ŭ padraśniki i z kryžom, a tolki jak zvyčajnyja hramadzianie.
«U jaho niejtralnaja reputacyja, ale ŭsie razumiejuć, što da nas jon jedzie, kab raspravicca ź niazhodnymi», — skazali «NN» hrodzienskija śviatary. Ničoha dobraha ad pryznačeńnia Antonija jany nie čakajuć.
