Brytni Śpirs znachodzicca pad apiakunstvam svajho baćki, Džejmsa Śpirsa, z 2008 hoda, paśla taho, jak śpiavačka trapiła ŭ psichijatryčnuju kliniku praz prablemy z ałkaholem i narkotykami. Pad apiakunstvam Brytni Śpirs praciahvała vypuskać albomy, brać udzieł u šou i zarablać miljony, jakija całkam uziaŭ pad kantrol jaje baćka.
Apošnija miesiacy Brytni Śpirs sudzicca z baćkam i patrabuje spynić apiakunstva nad joj.
The New York Times atrymała kanfidencyjalnyja pratakoły sudovych pasiadžeńniaŭ. Zhodna z hetymi dakumientami, śpiavačka na praciahu hadoŭ sprabuje spynić apiakunstva.
Brytni Śpirs adčuvała abmiežavańni va ŭsich śfierach svajho žyćcia. Jana zajaviła, što apiakunstva nad joj pieratvaryłasia ŭ instrumient padaŭleńnia i kantrolu. Śpiavačka stamiłasia ad taho, što joj karystajucca i zarablajuć na joj. Pa słovach Śpirs, jaje prymušali vystupać navat z vysokaj tempieraturaj.
Z pratakołaŭ taksama viadoma, što ŭ 2014 hodzie Brytni Śpirs paprasiła sud pazbavić Džejmsa Śpirsa paŭnamoctvaŭ praź jaho prablemy z ałkaholem.
Śpirs śćviardžaje, što jaje baćka apantany kantrolem nad joj: bieź jaho dazvołu śpiavačka nie mahła navat zavodzić siabroŭ. Choć jana zarablała miljony na svaich albomach i šou, pa słovach Brytni Śpirs, joj vyłučalisia dźvie tysiačy dalaraŭ na tydzień. A lubyja parušeńni ź jaje boku mieli ciažkija nastupstvy — apiakunstva dla śpiavački źviazanaje sa stracham.
Pad apiakunstvam śpiavačka rabiła testy na narkotyki niekalki raz na tydzień. Brytni Śpirs nie maje dostupu da ŭłasnaj kredytnaj kartki. Bolš za toje, śpiavačka vymušanaja płacić za advakataŭ z abodvuch bakoŭ.
23 červienia Brytni Śpirs sama dała pakazańni na sudzie. «Ja prosta chaču viarnuć sabie svajo žyćcio. Ja nie pavinna znachodzicca pad apiakunstvam, kali ja mahu pracavać, — skazała śpiavačka. Ja chaču vyjści zamuž i naradzić dzicia. Ale pad apiakunstvam ja nie mahu hetaha zrabić».
Advakatka Džejmsa Śpirsa začytała ŭ sudzie karotkuju zajavu ad imia baćki śpiavački. «Jon škaduje, što jaho dačka pakutuje i pieražyvaje taki mocny bol. Mistar Śpirs lubić svaju dačku i vielmi sumuje pa joj», — piša The New York Times.
