Tema zdaroŭja «viarchoŭnaha lidara» zvyčajna zabaronienaja da abmierkavańnia ŭ krainie, dzie jaho imidž žorstka kantralujecca dziaržaŭnymi ŚMI.
Hałoŭny telekanał krainy taksama pakazaŭ kadry, na jakich Kim vyhladaje chudziejšym, čym u apošnija hady.
Na hałoŭnym telekanale krainy, Centralnym telebačańni Karei, pakazali, jak Kim pryjechaŭ na kancert. I nienazvany hramadzianin u Pchieńjanie skazaŭ, što «ŭsie prosta pačali płakać» paśla taho, jak ubačyli Kima — takim jon vyhladaŭ zmarniełym.
Raniejšyja kadry i fatahrafii z patryjnych schodaŭ taksama davali padstavy mierkavać, što Kim hublaje vahu.
Kim Čen Yn źmianiŭ svajho niabožčyka baćku Kim Čen Ira ŭ śniežni 2011 hoda, i naziralniki z Paŭnočnaj Karei bačyli, jak jaho vaha niaŭchilna raście za dziesiacihodździe znachodžańnia va ŭładzie.
Jaho zdaroŭje pryciahvaje takuju ŭvahu, bo ŭ sistemie spadčynnaj ułady KNDR u Kim Čen Yna niama vyraznaha pierajemnika. Jaho śmierć abo praciahłaja niedziejazdolnaść mohuć pryvieści da vakuumu ŭłady ŭ jadziernaj dziaržavie i novaj niestabilnaści va Uschodniaj Azii.
U 2014 hodzie Kim Čen Yn źnik na 40 dzion, što vyklikała zdahadki, što jon byŭ ciažka chvory ci navat miortvy. Kali jon viarnuŭsia, jaho bačyli z kijem, što pryviało naziralnikaŭ da vysnovy, što jon adnaŭlaŭsia paśla apieracyi.
Mieli miesca pieryjadyčnyja źniknieńni, jakija, na dumku ŭrada Paŭdniovaj Karei, mahli być ździejśnienyja ŭ miedycynskich metach.
Kimu 37 hadoŭ, viadoma, što jon zaŭziaty kurec. Taksama ličycca, što jon mocna pje.
Jaho pavieličeńnie vahi za hetyja hady pryviało naziralnikaŭ da zdahadki, što jon moža pakutavać ad dyjabietu i padahry. Ale pakolki pra zdaroŭje lidara dahetul nikoli nie havaryłasia ŭ dziaržaŭnych ŚMI, hetyja rečy niemahčyma paćvierdzić.
