Fota z sacyjalnych sietak
Razryvaŭsia pamiž pracaj i ŭniviersitetam
Uładu 21 hod. Jon vučyŭsia na 4 kursie lačebnaha fakulteta BDMU. Maryŭ stać chirurham, cikaviŭsia ŭrałohijaj.
«Jon byŭ starastam hrupy. Vyrašaŭ vučebnyja pytańni, staraŭsia, kab nichto nie svaryŭsia miž saboj. I sam byŭ taktoŭnym, vietlivym i vielmi adkaznym», — apisvaje jaho byłaja adnahrupnica.
Chłopiec udzielničaŭ u kanfierencyjach studenckich navukovych prac. Na respublikanskim konkursie pa temie «Dastupnaja bijaetyka» Uład sa svaim ese zaniaŭ druhoje miesca. U im jon razvažaŭ pra pryncypy etyčnaści pry transpłantacyi orhanaŭ i tkanak — naprykład, pra prablemu prezumpcyi zhody na vyniatak orhanaŭ u Biełarusi. Jon mierkavaŭ, što heta pytańnie treba abmiarkoŭvać z čałaviekam, i nie kali jon pry śmierci, a pry płanavym miedahladzie.
Za pryzavoje miesca studenta ŭznaharodzili pajezdkaj u Strasburh u Radu Jeŭropy na piać dzion.
Apošni hod Uład pracavaŭ prajektnym mieniedžaram u kampanii PharmBonus. Heta mabilny dadatak dla daktaroŭ z apošnimi navinami miedycyny i farmaceŭtyki, anłajn-sieminarami. U startap chłopca zaprasiŭ siabar.
«Apošni čas jon razryvaŭsia pamiž pracaj i ŭniviersitetam. Vy ž razumiejecie, volny čas u studenta-miedyka amal adsutničaje», — kaža pryjaciel Ułada.
Pry zatrymańni sprabavaŭ raźbić telefon
Zatrymali Ułada 19 listapada. Jak paviedamiŭ MUS, student byŭ adnym sa stvaralnikaŭ i administrataraŭ kanała «Biełyja chałaty» i čata «Miedyki i vałanciory». Pry vobšuku ŭ kvatery HUBAZiK zabraŭ płanšet, noŭtbuk, mabilnik.
«Padčas zatrymańnia haspadar sprabavaŭ raźbić svoj telefon, kab zabłakavać dostup da akaŭnta, ź jakoha administravaŭ resursy. Taksama ŭ studenta znojdziena polskaja viza dla vyjezdu z krainy»,
— pisała tady milicyja i śćviardžała, što chłopiec nibyta źbiraŭsia atrymać z-za miažy 54 tysiačy jeŭra dla finansavańnia «destruktyŭnaj dziejnaści».
Spačatku studenta padazravali pa artykule 342 (Arhanizacyja i padrychtoŭka dziejańniaŭ, jakija hruba parušajuć hramadski paradak). Paśla spravu pierakvalifikavali: sudzić chłopca buduć za raspaŭsiud materyjałaŭ z zaklikami da dziejańniaŭ, skiravanych na pryčynieńnie škody nacyjanalnaj biaśpiecy (častka 3 artykuła 361).
U studzieni Ułada adličyli z univiersiteta.
Prasiŭ pieradać u SIZA padručniki pa miedycynie
Na Vaładarcy chłopiec zajmajecca samaraźvićciom — vyvučaje anhielskuju movu, čytaje miedycynskuju litaraturu. Žartuje, što na samaadukacyju ŭ jaho ciapier bolš času, čym va ŭniviersitecie. Darečy, knihi pa miedycynie byli pieršym, što student paprasiŭ pieradać jamu za kraty.
«Listy ad jaho prychodziać redka, ale jon nikoli nie ŭnyvaje, starajecca padbadziorvać nas, kaža, što ni pra što nie škaduje. Pisaŭ, što ŭ šoku ad taho, što pra jaho kažuć u dziaržSMI, i vielmi choča viedać, adkul heta ŭsio biarecca», — dzielicca znajomaja studenta.
Sam Uład u adnym sa svaich listoŭ aburaŭsia:
«Vy možacie być upeŭnienyja, što tekst pra hrošy — absalutny fejk, ja całkam čysty ŭ hetym pytańni. Vidać, los u mianie taki, i ja adziny, chto zmoh by paciahnuć takuju «lamku» za svabodu, za miedycynu i achovu zdaroŭja».
Abvinavačańnie, jakoje jamu vystaŭlajuć, student ličyć palityčna matyvavanym. Jon pisaŭ, što ŭ jaho spravie piać tamoŭ. U vinu jamu staviać 17 publicystyčnych publikacyj u kanale. Pytańnie nakont finansaŭ bolš nie ŭspłyvała.
«Vierahodna, vy ciapier dumajecie: «Voś durań, navošta jano tabie treba, vučyŭsia b spakojna i pracavaŭ. Jak usie! Za zarobak i premiju». Trymajučysia za miesca i bajučysia i słova skazać, navat u ramkach naležnaha. Nu voś ja tak nie mahu, chaču žyćcio pražyć nie darma, kab paśla nie soramna było», — pisaŭ student.
