Fota Nadziei Bužan
«Delta plus» — heta novy varyjant karanavirusa, jaki ŭtvaryŭsia ź indyjskaha štama «Delta». Zhodna z papiarednimi vysnovami ekśpiertaŭ, novy štam bolš zarazny, chutčej źviazvajecca z receptarami kletak lohkich i ŭstojlivy da manakłanalnych antycieł, jakija ŭvodziacca ŭ vienu dla niejtralizacyi karanavirusa.
Upieršyniu pra «Deltu plus» paviedamiła dziaržaŭnaje ahienctva achovy zdaroŭja Public Health England u svaim dakładzie 11 červienia. U Vialikabrytanii znajšli niekalki vypadkaŭ zaražeńnia novym štamam u ludziej, jakija pryjechali z Turcyi i Niepała. Daśledavańni paśla vyjavili, što ŭ Indyi «Deltaj plus» zaražalisia jašče ŭ kancy krasavika.
Na minułym tydni indyjski ŭrad paviedamiŭ, što varyjant «Delta plus» vyklikaje zakłapočanaść. Ministerstva achovy zdaroŭja Indyi zaklikaje ŭzmacnić miery pieraściarohi ŭ tych rajonach, dzie byŭ vyjaŭleny novy štam.
Indyjskija ŭłady dadajuć, što isnujuć taksama i inšyja varyjanty «Delty plus» ź inšymi mutacyjami, ale AY.1 — samy viadomy.
«Delta plus» adroźnivajecca ad pieršapačatkova indyjskaha štama tym, što maje mutacyju K417N u spajkavym białku — častcy virusa, jakaja prymacoŭvajecca da kletak, što jon zaražaje. Heta mutacyja, u svaju čarhu, dapamahaje virusu chutčej źviazacca z kletkami lohkich čałavieka, a taksama ŭchilacca ad antycieł.
Padobnaja mutacyja sustrakajecca ŭ paŭdniovaafrykanskim i brazilskim varyjantach. Pa acenkach niekatorych navukoŭcaŭ, u spałučeńni z asablivaściami «Delty» varyjant AY.1 moža być bolš zaraznym i niebiaśpiečnym.
Hałoŭny navukovy supracoŭnik SAAZ Sumija Svamitan zajaviła, što ŭ śviecie naličvajecca ŭsiaho niekalki dziasiatkaŭ vypadkaŭ zaražeńnia «Deltaj plus». Adnak tolki za 25 červienia ŭ Indyi kolkaść chvorych na hety štam dasiahnuła 48. A CNN paviedamlaje, što ŭsiaho zafiksavana nie mienš za 200 vypadkaŭ zaražeńnia ŭ 11 krainach, siarod jakich ZŠA, Vialikabrytanija i Rasija.
Zaniepakojenaść vyklikaje nie tolki toj fakt, što «Delta plus» bolš zarazny, ale i toje, što suprać jaho źnižajecca efiektyŭnaść vakcyn. Kali hetyja zdahadki navukoŭcaŭ paćvierdziacca, to pandemija faktyčna raspačniecca nanova.
Prafiesar Džulian Tanh z Univiersiteta Lestera śćviardžaje: «Mutacyja moža surjozna ŭzmacnić supraciŭ virusa vakcynam. Vierahodna, što mutacyja K417N razam z mutacyjaj L452R, jakaja adroźnivaje indyjski štam, moža zrabić štam «Delta plus» ustojlivym da vakcyn».
Indyjski śpiecyjalist doktar Čandrakant Łacharyja, jaki pracuje ŭ Ńju-Deli, pierakanany, što ŭ ekśpiertaŭ pakul niama pryčyn, kab chvalavacca nakont novaha varyjanta. Pa jaho słovach, adzinaje, što dakładna viadoma pra «Delta plus» — toje, što heta ŭsio toj ža indyjski štam, ale z dadatkovaj mutacyjaj.
