Jak śćviardžajuć niderłandskija navukoŭcy, chvorym na kavid, kali jany majuć kata ci sabaku, varta niejki čas paźbiahać svaich svojskich žyvioł. Chacia ŭ takich vypadkach virus časta pieradajecca žyviołam, nie heta turbuje navukoŭcaŭ, bo takaja źjava nie niasie vialikaj ryzyki hramadskamu zdaroŭju. U dadatak, simptomy kavidu ŭ žyvioł ci ŭvohule nie prajaŭlajucca, ci prajaŭlajucca ŭ słabaj formie.
Miedykaŭ bolš chvaluje patencyjnaja ryzyka taho, što virus moža zachoŭvacca ŭ arhanizmach žyvioł i potym nanava pieradavacca ludziam. Pakul što prykładaŭ takoj pieradačy nie było zafiksavana, tamu ekśpierty ličać, što svojskija žyvioły naŭrad ci hrajuć niejkuju rolu ŭ raspaŭsiudžvańni chvaroby, piša Guardian.
Daśledavańnie, što dazvoliła rabić takija vysnovy, było pradstaŭlenaje na Jeŭrapiejskim kanhresie kliničnaj mikrabijałohii i infiekcyjnych chvarob. Na tym ža mierapryjemstvie prahučali vyniki inšaj pracy, vykananaj kanadskimi navukoŭcami. Zhodna ź joj, koški, što śpiać na łožku ich uładalnika, mohuć padviarhacca pavyšanaj ryzycy zachvareć na kavid.
Aŭtary hetaj pracy rekamiendujuć nie padpuskać chvorych na kavid žyvioł nie tolki da ludziej, ale i da inšych svojskich žyvioł. Jany taksama nie vyklučajuć mahčymaści taho, što virus moža pieradavacca pamiž žyviołami ci ad žyvioł ludziam.
