mfa.gov.ua
Pra heta ŭ kamientary RBK-Ukraina zajaviŭ śpikier MZS Ukrainy Aleh Nikalenka.
«Ukraina kateharyčna adkidaje abvinavačvańni Alaksandra Łukašenki pra nibyta pastaŭki zbroi. My nikoli nie ŭmiešvalisia va ŭnutranyja spravy Biełarusi. Nie źbirajemsia hetaha rabić i ŭ budučyni», — adznačyŭ Nikalenka.
Pavodle jaho słoŭ, ad aficyjnaha Minska Kijeŭ čakaje takoj ža pazicyi i kab miaža pamiž krainami zastavałasia prastoraj biaśpieki.
«Palityka našaj dziaržavy nakiravanaja na padtrymańnie zakonnych intaresaŭ biełaruskaha naroda, jaki zasłuhoŭvaje hodnaha žyćcia ŭ demakratyčnaj krainie, dzie pavažajucca pravy čałavieka i isnuje viaršenstva prava», — dadaŭ pradstaŭnik MZS.
Nikolenka adznačyŭ, što zajavy Łukašenki ŭ dačynieńni da Ukrainy jak ab źniešniaj pahrozie dla Biełarusi «ŭkładvajucca ŭ palityku dezinfarmacyi, represij i zapałochvańnia biełaruskaha nasielnictva».
«Pierakananyja, što nijakija absurdnyja abvinavačvańni i zapałochvańni nie zmohuć adciahnuć biełaruski narod ad družalubnaha ŭkrainskaha naroda i Ukrainy jak dziaržavy, jakaja pavažaje i abaraniaje pravy ludziej», — padkreśliŭ jon.
Pradstaŭnik MZS taksama adznačyŭ, što ŭkrainski bok pakul nie atrymlivaŭ aficyjnych paviedamleńniaŭ ab zakryćci miažy z boku Biełarusi. «Ad takoha kroku paciarpić najpierš biełaruski narod», — reziumavaŭ Nikalenka.
