Fota barcafocus.com.
3 lipienia ŭ 19:00 zbornaja Danii zhulaje z Čechijaj u čverćfinale čempijanatu Jeŭropy. U hetych kamandach chapaje zornych hulcoŭ — čaho varty toj ža čech Patryk Šyk, jaki na siońnia zajmaje druhoje miesca pa kolkaści zabitych hałoŭ na hetym Jeŭra. Ale ž ni datčanie, ni čechi nie ličylisia favarytami hetaha turnira, tamu tym bolš varta budzie sačyć za ich dvubojem.
Što datyčycca datčan, u čverćfinał Jeŭra ich vyvieła pieramoha ŭ hulni z Uelsam, kali skandynavy zabili ŭ varoty valijcaŭ čatyry hały (4:0). Aŭtaram apošniaha ź ich ažno na 94-j chvilinie hulni akazaŭsia Marcin Brejtuejt, napadajučy «Barsiełony» i hulec ź vielmi cikavaj žyćciovaj historyjaj.
Z rańniaha dziacinstva Marcin lubiŭ futboł. Dackaja hazieta niejak apublikavała fota, dzie Brejtuejt hulajecca ź miačom va ŭzroście ŭsiaho dvuch hadoŭ. Ale, kali Marcinu było piać hod, usio mocna źmianiłasia. U chłopca vyjavili chvarobu Leha-Kalve-Piertesa — hienietyčnaje zachvorvańnie ściehnavaj kości i tazaściehnavaha sustava.
Brejtuejt razam sa starejšaj siastroj. Fota lifebogger.com.
Kość u nazie Marcina defarmiravałasia padčas raźvićcia, tamu chłopčyku stała ciažka chadzić. Praz heta daktary paraili jamu nijak nie nahružać svaje nohi — i ŭ vyniku dzicia było vymušanaje pierasieści ŭ invalidny vazok.
Marcinu nie kazali pra toje, kolki času jon praviadzie ŭ takim stanie. Jon prosta byŭ vymušany čakać taho momantu, kali jaho nohi padužejuć nastolki, kab chłopiec moh znoŭ chadzić. Na heta spatrebiłasia dva hady — i daktary navat dazvolili Marcinu dalej hulać u futboł.
Brejtuejt uspaminaje, što da historyi z chvarobaj hulaŭ u futboł kožny dzień z ranicy da viečara, i heta adzinaje, što było dla jaho važnym u žyćci. Kali ž daktary dazvolili chłopcu viarnucca da hulni, jon adčuvaŭ, što jaho žyćcio nibyta pačałosia nanova. Praź niekalki dzion, jak raspaviadaje futbalist, jon zhulaŭ u matčy i atrymaŭ tytuł najlepšaha hulca. Mahčyma, kaža Brejtuejt, heta było zroblenaje tolki dla taho, kab jaho paradavać, ale ŭsio roŭna adčuvańnie ad tych padziej było cudoŭnym.
Dalej Marcina čakaŭ šlach prafiesijnaha futbalista. Jon pačynaŭ karjeru ŭ kłubie «Esbjerh» z rodnaha horada, potym za dva miljony jeŭra pierajšoŭ u francuzskuju «Tułuzu». Dalej byŭ kłub druhoj anhlijskaj lihi «Midłsbro», francuzski «Bardo», ispanski «Lehanes» i, narešcie, ispanskaja ž «Barsiełona». Takim čynam, datčanin prajšoŭ šlach ad invalidnaha vazka da adnaho ź lepšych futbolnych kłubaŭ śvietu.
Razam z žonkaj. Fota lifebogger.com.
U razmovie z brytanskimi žurnalistami Marcin raspavioŭ zabaŭnuju historyju, źviazanuju ź jaho pierachodam u «Barsu». Jon śćviardžaje, što nikomu nie raspaviadaŭ pra pieramovy z kłubam, navat svajoj žoncy. Ale jana razumieła, što niešta adbyvajecca, bo na telefon jaje muža šmat zvanili, i jon nie žadaŭ pry joj adkazvać na hetyja zvanki. Žonka amal što pačała padazravać Brejtuejta ŭ tym, što jon znajšoŭ sabie paluboŭnicu. Ale, kali Marcin raspavioŭ joj praŭdu, jana zrazumieła, u čym pryčyna byłoj sakretnaści.
U intervju Brejtuejt padkreślivaje, što navat padčas chvaroby jon mieŭ adnu metu — być vialikim futbolnym hulcom. Paźniej, kali Marcin viarnuŭsia da hulni, jon nie turbavaŭsia pra toje, kab praz svoj stan zdaroŭja mienš siabie nahružać. Ale, jak śćviardžajuć baćki, niekalki hod paśla vazka chłopčyk usio ž taki mocna kulhaŭ.
Zaraz jon kaža pra toje, što hulać u futboł — heta dar, i što jon nikoli pra heta nie zabyvaje. Taksama Brejtuejt spadziajecca, što jaho historyja pakazvaje: kali ty ŭ drennaj situacyi, usio moža źmianicca da lepšaha.
