«Atrymlivaju listy ad ludziej z roznych kutkoŭ Biełarusi, — piša Anžalika Borys u liście, jaki ŭ siabie ŭ fejsbuku apublikavaŭ pieršy kiraŭnik Sajuza palakaŭ Biełarusi Tadevuš Havin. — Bolšaść hetych ludziej heta Biełarusy, i tamu mnie vielmi pryjemna, što heta Biełarusy pišuć mnie słovy padtrymki. Prašu pieradać ad mianie słovy vialikaj padziaki!» — prosić Anžalika Borys.

Borys piša listy pa-biełarusku, na movie, jakaja prypraŭlenaja kanstrukcyjami z rodnaj dla jaje polskaj movy.

Jana raskazvaje, što ŭ turmie ŭvieś čas «vałancioryć» — navučaje polskaj movie sukamiernic.

47-hadovaja Anžalika Borys piša, što jana «zdarovaja» i «aklimatyzavałasia» ŭ «sanatoryi», «jak byccam by viarnułasia ŭ hady histaryčnyja, vaśmidziesiacihadovaj daŭniny». 80 hadoŭ tamu, u 1930-1940-ja, nahadajem, tatalitarnyja režymy nacysckaj Niamieččyny i Savieckaha Sajuza pravodzili masavyja represii ŭ tym liku suprać polskaj intelihiencyi.

Anžalika Borys. Archiŭnaje fota Uładzia Hrydzina, «Radyjo Svaboda».

Anžaliku Borys zatrymali 23 sakavika hetaha hoda. Paralelna byli aryštavanyja čatyry inšyja aktyvisty polskaj mienšaści.

25 sakavika Hienieralnaja prakuratura Biełarusi paviedamiła, što raspačała kryminalnuju spravu ŭ dačynieńni da staršyni niezarehistravanaha Cajuza palakaŭ Anžaliki Borys i inšych asob pa častcy 3 artykuła 130 KK Respubliki Biełaruś (Raspalvańnie varožaści). Borys i inšych abvinavačvajuć u praviadzieńni masavych mierapryjemstvaŭ, padčas jakich nibyta ŭšanoŭvalisia ŭdzielniki antysavieckich bandfarmavańniaŭ, a ich dziejańni nibyta pieraśledavali mety reabilitacyi nacyzmu, apraŭdańnia hienacydu biełaruskaha naroda.

Hetaja interpretacyja vyklikała rezkuju krytyku historykaŭ, bo Sajuz palakaŭ ušanoŭvaje bajcoŭ Armii Krajovaj, jakaja zmahałasia suprać nacystaŭ i dziejničała pad kiraŭnictvam polskaha emihracyjnaha ŭrada, što pracavaŭ u Łondanie i byŭ častkaj antyhitleraŭskaj kaalicyi. U baraćbie z hitleryzmam zahinuli tysiačy bajcoŭ AK, u tym liku pry vyzvaleńni Vilni i ŭ hieraičnym Varšaŭskim paŭstańni. Historyki bačać u vystaŭleńni Armii Krajovaj nacysckim farmiravańniem niebiaśpiečnuju falsifikacyju historyi.

Troje aktyvistaŭ sa «Spravy palakaŭ» pahadzilisia na prapanovu vyzvaleńnia z turmy ŭzamien na vyjezd u Polšču. Pasiarednikam u hetym vystupiŭ były prezident Kazachstana Nursułtan Nazarbajeŭ. Anžalika Borys i Andrej Pačobut zastajucca za kratami. Infarmacyja pra ich stan uryŭkavaja, bo, jak i ŭ vypadku inšych palityčnych spraŭ, advakaty źniavolenych abmiežavanyja padpiskaj ab nierazhałošvańni.

Palaki na siońnia druhaja pa kolkaści nacyjanalnaja mienšaść u Biełarusi, jany tut žyli stahodździami.

Anžalika Borys, uradženka vioski Hrabiani ŭ Hrodzienskim rajonie, była ŭpieršyniu abranaja kiraŭnicaj Sajuza palakaŭ u 2005 hodzie. Ministerstva justycyi tady nie pryznała vynikaŭ vybaraŭ, aficyjny Minsk chacieŭ bačyć na čale arhanizacyi inšaha čałavieka.

U Polščy Borys, Pačobuta ličać niavinnymi zakładnikami, uziatymi dla torhu z Zachadam.

«Sprava palakaŭ» pryviała da eskałacyi adnosin Biełarusi z Polščaj, a ŭnutry Biełarusi pryviała da styhmatyzacyi palakaŭ, jakija pačali bajacca prajaŭlać svaju polskaść.

Biełaruskija pravaabroncy pryznali Borys dy inšych polskich aktyvistaŭ palityčnymi źniavolenymi.

Usiaho pa stanie na 4 lipienia za kratami pa palityčnych spravach u Biełarusi znachodziacca bolš za 700 aryštavanych pa palityčnych spravach. Status palitviaźnia ź ich pa stanie na 4 lipienia atrymali 529 čałaviek.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?