Asnoŭnyja mahutnaści polskaha ŭčastka mahistralnaha trubapravoda «Jamał — Jeŭropa», pa jakim ažyćciaŭlajecca tranzit rasijskaha hazu ŭ Jeŭropu, na budučy hod nie byli zareziervavanyja na aŭkcyjonie, piša TASS.
Tak, aŭkcyjon na mahutnaści trubapravoda, jaki adbyŭsia ŭ paniadziełak, na 2022 hazavy hod (1 kastryčnika 2021 hoda — 1 kastryčnika 2022 hoda) nie zaviaršyŭsia reziervacyjaj mahutnaściaŭ. 34,071 młn kVt h, prapanavanyja na ŭvachod u polskuju hazatranspartnuju sistemu ŭ punkcie «Kandratki», pakul što akazalisia niezapatrabavanyja.
Na aŭkcyjonnaj płatformie ŭ paniadziełak prapanoŭvalisia taksama mahutnaści trubapravoda na pierśpiektyvu da 2026 hoda. Pa vynikach ciapierašnich tarhoŭ mahutnaści paśla 1 kastryčnika 2022 hoda taksama zabraniravany nie byli.
Pieryjad dziejańnia doŭhaterminovaha pahadnieńnia pamiž Maskvoj i Varšavaj ab tranzicie hazu z Rasii na zachad pa polskim učastku trubapravoda «Jamał — Jeŭropa» skončyŭsia 17 maja 2020 hoda. Ciapier pastaŭki ažyćciaŭlajucca na asnovie tarhoŭ, jakija pravodziacca Gaz-System. Na minuły hod na hadavym aŭkcyjonie mahutnaści polskaha ŭčastka hetaha hazapravoda byli zareziervavanyja prykładna na 90%.
Hazapravod «Jamał-Jeŭropa» prapusknoj zdolnaściu kala 33 młrd kubamietraŭ u hod prachodzić pa terytoryi Rasii, Biełarusi, Polščy i Hiermanii. Ciapier ułaśnikam polskaha ŭčastka truby źjaŭlajecca kampanija EuRoPol GAZ («Jevropoł haz») — sumiesnaje pradpryjemstva «Hazproma» i polskaj PGNiG, jakija trymajuć pa 48% akcyj. Pry hetym apierataram učastka truby, jak i ŭsioj hazatranspartnaj sistemy Polščy, źjaŭlajecca Gaz-System.
Da hetaha hoda «Jamał-Jeŭropa» byŭ zahružany na poŭnuju katušku, bo «Hazpramu» było vyhadniej pasyłać błakitnaje paliva praź Biełaruś, a nie praz Ukrainu. «Hazpram transhaz Biełaruś» na 100% naležyć rasijskaj kampanii, a tamu taryfy na prapampoŭku hazu praz našu krainu minimalnyja.
Płanavanaje źnižeńnie tranzitu praź Biełaruś źviazana z chutkim puskam novaha hazapravoda pa dnie Bałtyjskaha mora «Paŭnočny patok — 2». ZŠA vyčarpali mahčymaści dalej błakavać jaho budaŭnictva.
Pasyłać haz pa «Paŭnočnych patokach» vyhadniej, bo nie treba płacić krainam-tranziciorkam.
Čamu ž Maskva płanuje skaracić prapampoŭku praź Biełaruś, a nie praz Ukrainu? Matyvy tut mohuć być dva.
Na siońnia ŭ «Hazprama» kantrakt z Ukrainaj zaklučany pa pryncypie «pampuj abo płaci». Heta značyć, navat kali «Hazpram» źnizić tranzit praz Ukrainu, jon pavinien budzie apłacić zakantraktavanyja abjomy.
Taki kantrakt z Ukrainaj piacihadovy, jon zakančvajecca ŭ kancy 2024 hoda.
Pa-druhoje, Polšča nie praciahnuła kantrakt na pastaŭki hazu «Hazpramam» paśla 2022 hoda.
Bolš za toje, jeŭrapiejskija palityki nie vyklučali zabarony tranzitu hazu praź Biełaruś, kali Minsk budzie praciahvać ciapierašniuju palityku: Jeŭropa rasceńvaje mnohija kroki ciapierašniaha biełaruskaha kiraŭnictva jak varožyja, asudžaje parušeńni pravoŭ čałavieka, baicca pieratvareńnia našaj krainy ŭ Paŭnočnuju Kareju ŭ centry Jeŭropy i narastańnia rasijskaha kantrolu nad Biełaruśsiu.
Jak by tam ni było, kali abjomy prapampoŭvańnia hazu praź Biełaruś źniziacca, naša kraina stracić značnyja padatkovyja pastupleńni. Biełaruski biudžet moža niedaličycca jak minimum kala 250—300 młn dalaraŭ u hod.
Pakul ni biełaruskija, ni rasijskija ŭłady nie prahavorvali, ci maje Maskva namier kampiensavać Minsku hetyja straty ŭ vypadku, kali skaračeńnie tranzitu sapraŭdy adbudziecca.
