Padzialiciesia «lišniaj» technikaj. Zvyčajna padčas pieratrusaŭ kanfiskujuć usie znojdzienyja hadžety ź simkami — ad telefonaŭ (navat samych starych) da kampjutaraŭ. Pazyčcie svaje ołdavyja «telefanavałki» i łeptopy paciarpiełym z dastaŭkaj na dom.
Prapanujcie kantakty advakata. U bolšaści biełarusaŭ z hrupy ryzyki damovy z advakatami składzienyja zahadzia, ale zavitać mohuć da kožnaha hramadzianina. I navat kali ŭsio abyjdziecca i skončycca tolki pieratrusam, lepš padstrachavacca i vyvučyć na pamiać numar svajho advakata, jaki pryjdzie na dapamohu pry dalejšym uskładnieńni spraŭ.
Parajcie psichołaha. Navat samaha mocnaha čałavieka mohuć padkasić biełaruskija naviny, što kazać pra ŭvarvańnie ŭ intymnuju prastoru z razbureńniem hadami stvarajemaj utulnaści. Čaściakom pieratrusy adbyvajucca na vačach niepaŭnahadovych dziaciej — psichałahičnaja dapamoha ŭ takoj situacyi moža spatrebicca ŭsim členam siamji.
Arhanizujcie klininh ci kalektyŭnaje siabroŭskaje prybirańnie. Mała taho, što padčas pieratrusu nichto, kaniečnie, nie zdymaje abutak, paśla jaho ludziej zvyčajna čakaje poŭny chaos z vykinutymi z šafaŭ rečami, raskidanymi dakumientami i knižkami. U horšych vypadkach — vyłamanyja dźviery i razrezanyja plintusy. Prapanujcie paciarpiełym pasilnuju dapamohu ŭ pryviadzieńni ŭsiaho hetaha ŭ paradak.
Dapamažycie razrulić pobytavyja pytańni. Paśla pieratrusu čałaviek moža być razhublenym, i pakul šokavy stan nie minie, važna prasačyć, kab jon nie zabyvaŭ pajeści i paspać — bazavyja patreby, nieabchodnyja dla narmalnaha funkcyjanavańnia. Vy možacie prapanavać pryhatavać niešta smačnaje, papoŭnić zapasy praduktaŭ u chaładzilniku, vystupić u roli pryvatnaha kiroŭcy. Pry najaŭnaści blizkich stasunkaŭ niališniaj budzie dapamoha z vyhułam sabaki ci dohladam za maleńkimi dziećmi, pakul čałaviek zaniaty niečym inšym — naprykład, adnaŭlaje kanfiskavanyja simku ci bankaŭskija karty.
Prapanujcie hrošy (lepš — najaŭnyja). Heta samy prosty punkt, ale časam — samy aktualny. Hrošy mohuć spatrebicca i na adnaŭleńnie vyniesienych dźviarej, i na taho ž advakata ź psichołaham, i prosta na bazavyja raschody, kali adnaho z členaŭ siamji paśla pieratrusu ŭsio ž zatrymali.
Budźcie pobač. Padtrymlivajcie idejami razam vybracca na viačeru ci ŭ park, pažyć paru dzion nie doma. I prosta budźcie na suviazi, tamu što čałavieku moža spatrebicca lubaja inšaja dapamoha. Pamiatajem: biełarus biełarusu biełarus.
