Nina i Uładź Łabkovičy sa starejšaj dačkoj Adelaj.
Uładziu Łabkoviču 42 hady, jon minčuk. Vyras na vulicy Majakoŭskaha. Kažuć, što svoj charaktar chłopiec hartavaŭ nie tolki ŭ škole, ale i na vulicy. Uładziu davodziłasia ŭ dziacinstvie ŭdzielničać u dvaravych razborkach, tak što spałochać jaho nie tak prosta.
«Mnie zdajecca, što z taho času jon jakraz i vynies paniaćci honaru, hodnaści, a taksama adkaznaści za tuju supolnaść, jakuju jon pradstaŭlaje», — kaža adzin ź siabroŭ Uładzimira.
Baćka Uładzia rodam z Słuččyny, pracuje indyvidualnym pradprymalnika, mama pryjechała ŭ Biełaruś z Krasanadarskaha kraja Rasii, pa prafiesii jana inžynier. Jość małodšy brat, jaki ŭ svoj čas vučyŭsia ŭ kołasaŭskim licei.
Da hramadskaha žyćcia Uładź pryjšoŭ rana. Žurnalist Alaksandr Tamkovič apisvaŭ vypadak, kali budučy 12-hadovym padletkam Łabkovič razam ź siabrami ŭ čas putča HKČP zapisali pieradaču Radyjo «Svaboda», dzie asudžaŭsia putč, pierapisali na papieru i tryccać asobnikaŭ raskleili na słupach. Taki voś byŭ pieršy dośvied palityčnaj aktyŭnaści.
U Partyju BNF chłopiec pryjšoŭ na nastupny dzień paśla mitynhu la Opiernaha teatra 19 kastryčnika 1996 hoda, kali apazicyja pratestavała suprać pieršaha Usiebiełaruskaha schoda, jaki arhanizoŭvaŭ Łukašenka. Byŭ u moładzievaj frakcyi BNF, jakaja isnavała da «Maładoha fronta». Uznačalvaŭ Śvisłackuju radu frakcyi. Paplečniki kažuć, što hetaja rada siarod inšych adznačałasia najbolš siabroŭskimi adnosinami.
U partyi jon zastajecca pa siońnia. Uvohule znajomyja Łabkoviča siarod hałoŭnych jahonych rysaŭ adznačajuć jakraz łajalnaść da tych struktur, u jakija jon uvachodzić. U Partyi BNF jaho zaŭvažyła kolišniaja deputatka Viarchoŭnaha Savieta Halina Siamdzianava, mienavita jana prapanavała pryciahvać Łabkoviča ŭ bolš vuzkija abmierkavańni. Faktyčna, vielmi chutka Uładź uvajšoŭ u śpis tych asob, jakija vyznačali dziejnaść struktury. Doŭhi čas Łabkovič byŭ adkaznym sakratarom upravy. «Va Uładzia isnuje palityčnaje myśleńnie, kali u krainie źjaviłasia sapraŭdnaja palityka, to jon moh by zrabić dobruju karjeru», — kažuć siabry.
Uładzimir papracavaŭ krychu jurystam u pryvatnaj firmie, ale ŭsio ž zrabiŭ vybar na karyść hramadskaj dziejnaści. Spačatku jon prychodzić pracavać jurystam u BNF, a praz hod na pracu jaho zaprašaje «Viasna». U kamandzie viasnoŭcaŭ Łabkovič znachodzicca ŭžo dvaccać hadoŭ.
«Skazaŭ, što pra dabrabyt padumaje paśla taho, jak raźbiarecca z prablemami ŭ krainie. Na žal, heta ŭsio zaciahnułasia», — havorać pra Łabkoviča.
U Łabkoviča atrymlivałasia sumiaščać pravaabarončuju dziejnaść z palityčnaj. U 2005 hodzie jon byŭ siarod arhanizataraŭ Kanhresu demakratyčnych siłaŭ, na jakim adzinym kandydatam ad apazicyi byŭ aprany Alaksandr Milinkievič. Potym u kamandzie Milinkieviča Łabkovič pracavaŭ jurystam.
Za čas pracy pravaabaroncam Łabkoviču nieadnarazova davodziłasia jedzić ź misijami nazirańnia za vybarami ŭ roznyja krainy. Pryčym Uładź imknuŭsia kiravacca nie ŭ Jeŭropu, dzie ŭsio pradkazalna, a ŭ tyja krainy, dzie za demakratyju jašče davodziłasia zmahacca, — Ukrainu, Azierbajdžan, Siaredniuju Aziju. Padčas adnoj z takich vandrovak jon znajšoŭ žonku.
Ź Ninaj Dziarabinaj z Kazachstana jany pracavali razam u Charkaŭskaj vobłaści Ukrainy ŭ 2004 hodzie. Tam i naradziłasia kachańnie. Sam Łabkovič kazaŭ, što jahonaja historyja kachańnia padobnaja da halivudskaj: jak tolki sustrelisia, zrazumieli, što nie mohuć adno biez adnaho. Pieršy raz Nina prosta pryjechała ŭ hości da Uładzia ŭ Minsk, a druhi raz pierabrałasia kančatkova. Sam Uładź ža nie moža naviedać radzimu žonku, bo jašče ŭ 2005 hodzie jaho departavali z Kazachstana z zabaronaj na ŭjezd.
Viadoma, što spačatku Nina nie viedała biełaruskaj movy, ale za čas žyćcia ŭ Biełarusi dobra vyvučyła jaje. U siamji stasujucca pa-biełarusku. U pary troje dziaciej: starejšaja dziaŭčynka, a taksama dva chłopčyki-bliźniuki, usie jany školniki. Paśla taho, jak baćkoŭ aryštavali, jany ŭ babuli i dziaduli.
Važna padkreślić, što Nina nie mieła dačynieńnia da pravaabarončaj dziejnaści. Jana źjaŭlajecca dyrektarkaj abjadnańnia inviestaraŭ Angels Band. Tamu jaje znachodžańnie za kratami ŭvohule niezrazumiełaje.
Chobi Łabkoviča — heta historyja. Jon zachaplajecca Staražytnym Rymam, moža ź lohkaściu pieraličyć usich impierataraŭ. Taksama cikavicca historyjaj Druhoj suśvietnaj vajny.
Jakija hałoŭnyja rysy Łabkoviča? «Jon vielmi razumny, ale aproč usiaho jašče chutka dumaje. Uładź hruntoŭny, praličvaje ŭsio našmat krokaŭ napierad, a taksama schilny da sistemnaj pracy. Jon daražyć ułasnaj reputacyjaj, a taksama maje abvostranaje pačućcio spraviadlivaści, ale heta ŭłaściva ŭsim pravaabaroncam», — havoryć jahony siabra.