Dziaržsakratar ZŠA Entani Blinkin i Śviatłana Cichanoŭskaja

Dziaržsakratar ZŠA Entani Blinkin i Śviatłana Cichanoŭskaja

Śviatłana Cichanoŭskaja praciahvaje svoj vizit u ZŠA. U Vašynhtonie jana mieła sustreču ź Dziaržaŭnym sakratarom Entani Blinkienam, ale spatkańnia z prezidentam ZŠA tak i nie adbyłosia. Ci važny vizit Cichanoŭskaj u Vašynhton abo heta šarahovaja padzieja?

«Vizit maje vializnaje značeńnie, jaho praciahłaść, uzrovień sustreč. Heta pakazvaje, što tema Biełarusi ŭ ZŠA znachodzicca na paviestcy dnia, pryčym na vielmi vysokim uzroŭni, — kaža Pavieł Ślunkin. — Kali praanalizavać chacia b paviestku ŚMI, to možna ŭbačyć, što jana zasiarodžanaja na Biełarusi: Cichanoŭskaja daje intervju CNN, New York Times piša pra mihracyjny kryzis na miažy ź Litvoj, Washington Post dvojčy piša pra Biełaruś i zaklikaje Bajdena da bolš rašučych krokaŭ, pryčym robiać heta ŭ farmacie mierkavańnia redakcyi».

Raman Jakaŭleŭski taksama miarkuje, što heta nadzvyčaj važnaja padzieja dla biełaruska-amierykanskich adnosin: «Nazvać šarahovym jaho vielmi ciažka». 

Čamu tady ŭsio ž nie adbyłasia sustreča z kiraŭnikom Štataŭ? «Heta nijakaja nie paraza Cichanoŭskaj. ZŠA pradamanstravali taki ŭzrovień padtrymki, na jaki byli zdolnyja na siońnia. Spatkańnie ź Blinkinam — heta nadzvyčaj vysoki ŭzrovień. Sihnał usim sajuźnikam ZŠA, jakuju jany majuć pazicyju pa Biełarusi. Amieryka pakazała, što my nie zabytyja, ale dumaju, što ŭličvajecca i faktar Rasii», — kaža Jakaŭleŭski.

«Cichanoŭskaja sustrakałasia praktyčna z usimi kiraŭnikami ES, a paśla abrańnia Bajdena było šmat čakańniaŭ, što ZŠA viernucca ŭ suśvietnuju paviestku jak mocny hulec, palicejski, jaki budzie adstojvać intaresy demakratyi i pravoŭ čałavieka. Čaho nie chapała Trampu, što jamu stavili ŭ dakor. Vysokija čakańni byli pa biełaruskim pytańni. Ale fakt adsutnaści sustrečy ź Cichanoŭskaj havorać pra toje, što administracyja Bajdena dziejničaje vielmi prahmatyčna», — praciahvaje Pavieł Ślunkin.

«Bajden znajšoŭ mahčymaść sustrecca z Pucinym, jakoha nazyvaŭ zabojcam, pry hetym pakul nie sustreŭsia sa Śviatłanaj Cichanoŭskaj, jakuju ŭ ZŠA nazyvajuć «lidaram biełaruskaj demakratyi». Mienavita heta havoryć pra pazicyju ZŠA lepš čym što jašče. Asablivaść biełaruskaha kryzisu ŭ tym, što pazicyja Jeŭrasajuza bolš rašučaja, čym ZŠA. Heta toje, čaho nikoli nie było raniej. Ciapier ža ŭ ES jość kampramis, uvodziacca siektaralnyja sankcyi. Pazicyja ZŠA ž bolš pałavinčataja. Hipatetyčna, kali b ZŠA kaliści nie zamarozili sankcyi pa Biełarusi, a prosta ich źniali, to nie fakt, što my b ich ubačyli ciapier. Pahladzim, što budzie adbyvacca dalej. Ja dumaju, što novyja sankcyi amierykancy prymuć, ale naŭrad ci heta budzie vielmi mocny ŭdar», — ličyć eks-dypłamat.

Pavieł Ślunkin taksama padzialaje dumku, što ŭ pytańni Biełarusi ZŠA ŭličvajuć mnohija intaresy, u tym liku i hieapalityčnyja. «Ich pazicyja ŭ pytańni Biełarusi nie źmianiłasia: pryjarytet zachavańnie niezaležnaści Biełarusi. Kali ŭ 2019 Biełaruś dla ZŠA była častkaj «bastyjona», jaki abaraniaŭ ad rasijskaja nieaimpieryjalizmu, to ciapier, jak i ŭ 2006 hodzie, heta farpost tyranii ŭ Jeŭropie. Źmianiłasia situacyja ŭ Biełarusi, ale nie intaresy ZŠA, tamu sankcyi vykarystoŭvajucca vielmi aściarožna. ZŠA, moža być, bajacca, što heta pryviadzie jašče da bolšaj zaležnaści ad Rasii. Mahčyma, heta adna z pryčym, čamu Bajden nie sustreŭsia ź Cichanoŭskaj. Niama žadańnia złavać Maskvu, tut jość taki rasijski faktar».

U rasijskich kalapalityčnych telehram-kanałach vykazvajecca kanśpirałahičnaja dumka, što Bajden admoviŭsia sustrakacca ź Cichanoŭskaj, bo takich damoŭlenaściaŭ jon dasiahnuŭ padčas červieńskaj sustrečy ŭ Ženievie z Uładzimiram Pucinym. Ci moža takoje być? 

«Ja nie vieru ŭ takija damoŭlenaści. Pucin na ich nikoli nie pojdzie, jon ličyć, što ŭžo amal što źjeŭ Biełaruś», — kaža spadar Jakaŭleŭski.

Nie ličyć realnaj takuju viersiju i Pavieł Ślunkin. «Ja nie vieru ŭ farmaty «vialikich ździełak» u XXI stahodździ. Asabliva kali havorka idzie, što los krainy abmiarkoŭvajuć bieź jaje samoj, biez ułady, ci demakratyčnych pradstaŭnikoŭ. Tak rabiłasia ŭ XIX stahodździ, ale my ciapier nie tam. Tak palityka ŭžo nie viadziecca. Ni ZŠA, ni Rasija nie majuć mahčymaści za Łukašenku vyrašyć, što jamu rabić. Chutčej za ŭsio, jany prosta abmianialisia mierkavańniami, dzie pazicyi razyšlisia. Sama paviestka pieramovaŭ ZŠA i Rasii nie krucicca vakoł Biełarusi. Samaje ž hałoŭnaje — miž krainami niama adpaviednaha davieru, kab vieryć, što hetyja ŭhody buduć vykonvacca. Prosta amierykancy tak bačać svaju pazicyju».

I jašče adzin momant, jaki Cichanoŭskaja pavinna była dakładna abmiarkoŭvać u Vašynhtonie. Heta razhrom biełaruskimi ŭładami hramadzianskaj supolnaści i ŚMI ŭ cełym, a ŭ pryvatnaści — amierykanskaha radyjo «Svaboda». Ci budzie niejki adkaz amierykancaŭ na heta?

«Razhrom «Svabody» — heta taki jarki prykład, dobra viadoma, jak amierykancy zastupajucca za svaich, heta my bačyli i na prykładzie palitołaha Vitala Šklarava. My bačyli, kali ŭ Rasii radyjo «Svaboda» atrymała status zamiežnaha ahienta, to heta atrymała vostry adkaz. Reakcyja na padziei ŭ Biełarusi była dastatkova strymanaj. Biełaruskija ŭłady naŭrad ci pra heta dumali, ale razhrom «Svabody» — heta samy niazručny momant dla ich. Hety prykład vielmi lohka pakazvać amierykancam, kab tłumačyć, što adbyvajecca ŭ Biełarusi», — kaža ekśpiert ECFR.

«Razhrom «Svabody» ŭ hetyja dni, chutčej, supadzieńnie. Ale kiraŭnictva Biełarusi praciahvaje demanstravać, što nikoha nie baicca. Ja nie viedaju, ci buduć sankcyi novyja, ale ŭpeŭnieny ŭ novych krokach ZŠA pa biełaruskim pytańni. Pa Biełarusi niama supiarečnaściaŭ u respublikancaŭ i demakrataŭ, Kanhres nie stanie tormazam u niejkich inicyjatyvach. Što budzie prapanavana — pahladzim», — vykazvaje dumku Raman Jakaŭleŭski. 

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?