Biełaruś i mnohija dziaržavy Jeŭropy adčuvajuć rost mihracyjnych patokaŭ, ale stohnie i patrabuje salidarnaści tolki Litva. Pra heta havorycca ŭ adkazie pres-sakratara MZS Biełarusi Anatola Hłaza žurnalistam.
«Mihranty biahuć sa spustošanych vajnoj rajonaŭ u nadziei znajści svoj novy, ciopły, utulny, a hałoŭnaje — biaśpiečny dom, a natykajucca na palicejski hvałt, śpiral Bruna i adkrytuju varožaść. Rost mihracyjnych patokaŭ Biełaruś adčuvaje na sabie: našy pamiežniki apošni čas zatrymali značna bolš nielehałaŭ, čym raniej. Mnohija dziaržavy Jeŭropy, u tym liku tyja, jakija nie majuć źniešnich miežaŭ, taksama fiksujuć u siabie rost kolkaści nielehałaŭ. Ale stohnie i patrabuje salidarnaści tolki Litva», — śćviardžaje Anatol Hłaz.
Nahadajem, Jeŭropa sutyknułasia z hłybokim mihracyjnym kryzisam u 2015 hodzie. Adnak z tych časoŭ kolkaść nielehalnych mihrantaŭ, jakija prybyvajuć u krainy ES, značna skaraciłasia. Istotny rost nielehalnaj mihracyi praź biełaruska-litoŭskuju miažu pačaŭsia adnosna niadaŭna, ź leta 2021 hoda, jon nijak nie źviazany ź mihracyjnym kryzisam 2015 hoda ŭ ES. Na inšych učastkach źniešniaj miažy ES, praź jakija prachodziać kanały nielehalnaj mihracyi ŭ ES u Mižziemnym mory, ES nie fiksavaŭ takoha imklivaha rostu nielehalnaj mihracyi.
