Za 2020 hod siaredni pa krainie zarobak skłaŭ 1255 rubli abo krychu bolš za $500. U 2025-m my musim atrymać 1883-2510 rubloŭ abo $750-1000. Rost unutranaha vałavoha praduktu, pa prahnozach Minekanomiki, vyraście ŭ 1,2 razu.
Abiacali $1000, nie daciahnuli i da $500
Sajt promise.by sabraŭ abiacańni pra zarpłaty, jakija davali našy čynoŭniki. Tak, Alaksandr Łukašenka jašče ŭ vieraśni 2004 hoda kazaŭ, što ŭ 2010-m hodzie siaredni zarobak biełarusaŭ dasiahnie $750.
Pieršy raz pra mahčymy zarobak u $1000 ułady zahavaryli ŭ 2008 hodzie, ambicyjnyja płany budavali na kaniec na 2010. Ale naprykancy 2010 hoda siaredni zarobak byŭ tolki $530, a ŭ sumnym 2011-m uvohule ŭpaŭ da $300.
U śniežni 2010 hoda, kali stała zrazumieła, što daloka navat da $750, nie kažučy ŭžo pra $1000, ułady paabiacali $1000 praź piać hod, značyć, u 2015-m. Ale vynik byŭ sumny — siaredni zarobak skłaŭ $406.
Potym byŭ doŭhi pieryjad, kali čynoŭniki zmahalisia za mahičnuju ličbu «papiaccot». Jaje kraina pierasiahnuła ŭ 2018-m. I voś try hady nižej za hety ŭzrovień my nie apuskajemsia.
A ŭ červieni biahučaha hodu Łukašenka iznoŭ zahavaryŭ pra $700-800 «da kanca piacihodki».
— Kali my za piacihodku pa $700-800 siaredniaha zarobku pa krainie budziem mieć — heta budzie niadrenna, a tysiaču — cudoŭna, — skazaŭ jon.
Varta nahadać, što ŭ Biełarusi siarednija zarobki vyšej za $600 padymalisia tolki dvojčy ŭ historyi — u 2013-m i 2014-m hadach. Dyk ci realna ciapier dasiahnuć abiacańniaŭ $750-1000?
«Ekanomicy treba raści na 3,7% u hod. Heta niebyvałyja tempy»
«Hety płan z vobłaści fantastyki, — kaža kiraŭnik prajekta «Košt urada» Uładzimir Kavałkin. — Pieršaja fantastyka źviazanaja z rostam VUP. U biahučaj situacyi, pad sankcyjami i z toj žorstkaj manietarnaj palitykaj, jakuju pravodzić Nacyjanalny bank, čakać inviestycyj nie davodzicca. A bieź inviestycyj nie byvaje i rostu VUP. Tym bolš, zhodna z płanam rostu ŭ 1,2 razu biełaruskaj ekanomicy treba budzie raści na 3,7% u hod. Dla Biełarusi heta niebyvałyja tempy. Kali my kažam pra naturalny rost, a nie rost, razdźmuty dziaržaŭnymi inviestycyjami».
Druhi važny momant, kaža ekśpiert, bolš vysoki rost zarobkaŭ, čym VUP.
«Dla taho, kab zarobki vypiaredžvali rost VUP, pavinny składvacca dva momanty. Pieršy — vialikaja kolkaść ludziej pavinna syści na piensiju i vyzvalić pracoŭnyja miescy. Hety praces adbyvajecca i budzie praciahvacca (nacyja stareje). Ale pry hetym pradukcyjnaść pracy pavinna vyraści taksama ŭ 1,5-2 razy. Uvohule ž, pakazčyki VUP i zarobku źviazanyja. Pry hetym rost zarobkaŭ pavinien być krychu marudniejšym za rost VUP z umovaj, što kolkaść pracoŭnych miescaŭ raniejšaja. Kali ž my kažam pra rost VUP i taki vysoki rost zarobkaŭ, to ja b staviŭsia da hetaha jak da čarhovaj prapahandysckaj historyi, jakaja nie maje pad saboj nijakich faktyčnych i analityčnych abhruntavańniaŭ. Asabliva ŭ biahučaj situacyi».
Kavałkin ličyć, hetaja prahrama naradziłasia niedzie vielmi blizka kala Łukašenki.
Navat kali źmienicca ŭłada, bližejšyja piać hod pazityvu ŭ ekanomicy nie budzie
«Ułasna kažučy, ad jaho žadańniaŭ i namalavali hetyja płany. A my viedajem, što byvaje z takimi płanami. Jany nie zbyvajucca, tamu što ich malujuć nie dziela pracy, a kab dahadzić adnamu čałavieku».
Što pavinna adbycca, kab płany pa rostu VUP i siaredniaha zarobku ŭsio ž stali realnymi? Jość niekalki važnych umovaŭ.
«Kab Biełaruś nie była pad sankcyjami, treba viarnuć davier inviestaraŭ, treba stać adkrytaj dla zachodnich technałohij ekanomikaj, — adznačaje Uładzimir Kavałkin. — Pry hetym važna razumieć, što heta niachutkaja pieśnia. Davier razburajecca chutka, a adnaŭlajecca vielmi doŭha. Tamu ŭ bližejšyja piać hod, navat kali źmienicca ŭłada i z našaj krainy zdymuć sankcyi, čakać šmat pazityvu ad ekanomiki nie davodzicca. Pavinien prajści čas, ludzi pavinny pryzvyčaicca da novaj situacyi, inviestary pavinny pryhledziecca. I ŭ takim vypadku jany, mahčyma, buduć układać hrošy ŭ ekanomiku krainy. Što tyčycca abiacańniaŭ, to za ich niama adkaznaści. Možna abiacać biaskonca i što zaŭhodna».
