Pavodle źviestak krynic, na jakija spasyłajecca Bi-bi-si, tankier išoŭ u bok Armuzskaj pratoki, praź jakuju prachodzić prykładna piataja častka suśvietnaha handlu naftaj. Pavodle infarmacyi Bi-bi-si, na bort sudna padnialisia da dzieviaci ŭzbrojenych mužčyn.
Aficyjna ab zachopie nie paviedamlajecca. Raniej marskaja handlovaja arhanizacyja Vialikabrytanii (UKMTO) rekamiendavała sudnam, jakija znachodziacca kala adnaho z emirataŭ AAE El-Fudžajry, prajaŭlać asablivuju aściarožnaść; paźniej UKMTO abviaściła ab «patencyjnaj ryzycy zachopu». Aficyjny pradstaŭnik brytanskaha ministerstva zamiežnych spravaŭ paviedamiŭ, što Foryn-ofis terminova rasśleduje źviestki pra incydent la bierahoŭ AAE.
Pa danych sajta FlightRadar24.com, u rajonie sudna prykładna ŭ toj ža čas pralataŭ samalot VPS Amana.
Na karcie Amanskaja zatoka (Gulf of Oman), Armuzskaja pratoka (Strait of Hormuz) i Piersidskaja zatoka (Persian Gulf).
U aŭtorak prynamsi piać naftavych tankieraŭ adnačasova paviedamili, što pazbaŭlenyja mahčymaści kiravacca. U marskoj terminałohii heta jak praviła značyć, što karabiel straciŭ kiravańnie z-za paškodžańniaŭ abo adklučeńnia ruchavika. Ci źviazana heta z zachopam «Asfalt prynces», pakul niezrazumieła.
Dakładnych danych ab tym, chto mienavita moža być datyčny da napadu, niama. Adnak Times paviedamlaje sa spasyłkaj na krynicy ŭ brytanskim uradzie, što ŭłady «zychodziać z taho, što na bort sudna padnialisia iranskija vajskoŭcy abo źviazanyja ź imi hrupy». Bieły dom zajaviŭ, što paviedamleńni ab zachopie sudna vyklikajuć surjoznuju zakłapočanaść.
Aficyjny pradstaŭnik MZS Irana Said Chatybzade kateharyčna adchiliŭ zdahadki ab datyčnaści Tehierana da zachopu.
Chatybzade taksama napisaŭ u tvitary, što «paviedamleńni pra incydenty ŭ Piersidskaj zatocy i rehijonie ŭ cełym vyhladajuć vielmi padazrona».
«Paćviardžajučy našu poŭnuju prychilnaść rehijanalnaj stabilnaści i biaśpieki na mory, Iran hatovy prapanavać sadziejničańnie ŭ vypadku jakich-niebudź marskich zdareńniaŭ», — skazana ŭ paviedamleńni.
Potym napadniki pakinuli tankier, incydent vyčarpany.
