Pa źviestkach na kaniec lipienia, pieršym kampanientam u nas vakcynavałasia 14% nasielnictva, dvuma — 9,1%. Ułady sprabujuć paskoryć praces.
Rabočych zaachvočvajuć premijami. Na MTZ vakcynavanym abiacajuć pa 80 rubloŭ, na pradpryjemstvie «Hazpram transhaz Biełaruś» — pa 150 (navat tym, chto ŭvioŭ tolki pieršy kampanient). Minski matorny zavod siarod vakcynavanych źbirajecca pravodzić rozyhryšy — možna atrymać ad 100 da 1000 rubloŭ.
Padobnaje, darečy, praktykujecca i ŭ Rasii, dzie ŭ «antykavidnych» łatarejach pryzami stanoviacca mašyny i kvatery.
Siarod miedykaŭ uvodziać płany pa kolkaści pryščeplenych. Ale «Našaj Nivie» viadomy vypadki, kali daktary vakcynavanyja tolki na papiery. Kudy tady dziavajecca vakcyna, kali za kožnuju ampułu treba spravazdačycca? Časam dachodziła da taho, što ŭkoł rabili prosta ŭ vatku.
Čamu nasielnictva tak nieachvotna idzie na heta?
«Mahčyma, i kavid-dysidenctva syhrała rolu, — dzielicca nazirańniami były hałoŭny doktar 3-j haradskoj dziciačaj kliničnaj balnicy Maksim Ačaretnij. — Ja, moža, nie vielmi papularnaje mierkavańnie ahuču. Sacyjalnyja i miedycynskija rečy musić rekłamavać dziaržava. A heta ŭsio skinuli na daktaroŭ. Tak, u miedykaŭ jość abaviazak pravodzić sanepidpracu, viadziecca žurnał — kolki było sustreč, kruhłych stałoŭ. Ale ŭ daktaroŭ jość inšaja praca, heta nie pavinna kłaścisia na ich plečy.
Ja bačyŭ, jak heta robicca ŭ niekatorych krainach Jeŭropy. Nie tolki pa tematycy vakcynacyi. U Ispanii pa TB była sacyjalnaja rekłama pra donarstva orhanaŭ. Jana była zroblena pryhoža, prafiesijna, i ludzi źviartali ŭvahu. Sensu, što ja źbiaru troch čałaviek i pačnu kazać, jak važna pryščapicca. Ci pahražać, što ŭ advarotnym vypadku ja im nie dam premii. Na moj pohlad, na rekłamie vakcynacyi ekanomiacca srodki».
A voś bonusy za pryščepku, kaža doktar, dobraja ideja.
«Ludzi bajacca novych vakcyn, heta całkam narmalna. Ja b nazvała b jašče niekalki pryčyn — niedavier da dziaržstruktur, adsutnaść alternatyvy ŭ vakcynach (mnohija b pryščapilisia płatna vakcynami, jakich niama ŭ nas u krainie).
Nu i ludzi nie lubiać, kali ich prymušajuć, choć ciapier šmat lekcyj čytajem na prydpryjemstvach i raskazvajem ludziam pra važnaść vakcyn», — vykazała mierkavańnie epidemijołah adnoj ź minskich miedustanoŭ.
Sacyjołah Taćciana Vadałažskaja ličyć, što adzin z hałoŭnych faktaraŭ, čamu ludzi nie vielmi chočuć rabić pryščepki, — niedavier da ŭłady.
«Daśledavańnie, jakoje Centr jeŭrapiejskaj transfarmacyi rabiŭ u 2020 hodzie paśla pieršaj chvali karanavirusa, pakazała, što 71% apytanych nie vieryć aficyjnym ličbam pa śmiarotnaści ad kavidu, ličyć, što takich vypadkaŭ bolš. I heta jašče da palityčnaha kryzisu. A za hod sfarmiravałasia vialikaja padstava dla niedavieru da ŭsiaho, što dziaržaŭnyja instytuty prapahandujuć».
Ekśpiert zhadvaje, jak na pieršych etapach pandemii ŭłady admaŭlali surjoznaść prablemy. Jana tłumačyć, jak heta paŭpłyvała na pavodziny biełarusaŭ:
«Ludzi ličać, što prapanovy, jakija robić dziaržava, vyklikany inšymi pryčynami, čym kłopat pra biaśpieku hramadstva. Dumajuć u duchu «niejkuju vakcynu treba chutčej zbyć, tamu nas zaklikajuć pryščapicca».
Paśla vybaraŭ dadaŭsia i palityčny składnik. Mnohija chvalujucca, ci nie buduć jany aryštavanyja, ci nie pryjduć da ich z vobšukam. I heta padajecca bolš niebiaśpiečnym, čym zachvareć, i adsoŭvaje strach pierad karanavirusam i žadańnie vakcynavacca.
«Hety ž palityčny składnik upłyvaje na toje, što ludzi nie budujuć doŭhaterminovych płanaŭ. Faktyčna prahmatyčnych vyhad ad vakcynacyi — naprykład, pajechać kudyści ŭ adpačynak — niama.
I heta vielmi źnižaje matyvacyju iści pryščeplivacca», — dadaje Taćciana Vadałažskaja.
