U Jeŭrapiejskim Sajuzie da mihrantaŭ staviacca jak da bydła, źbivajučy ich i pazbaŭlajučy narmalnych ahulnačałaviečych umoŭ. Pra heta raspavioŭ dziaržaŭny sakratar Rady biaśpieki Alaksandr Valfovič, pieradaje BiełTA.
Dziaržsakratar adznačyŭ, što apošni čas idzie patok niehatyŭnaj infarmacyi, Biełaruś sprabujuć papraknuć ledź ci nie ŭ spryjańni nielehalnaj mihracyi. «Tut treba hladzieć u korań pytańnia. Tak, my fiksujem pavieličeńnie patoku nielehalnaj mihracyi na zachodnim kirunku. Ale chiba heta navina dla jeŭrapiejskich krain? Pa-mojmu, nie. I ŭžo na praciahu niekalkich hadoŭ patok nielehalnych mihrantaŭ u krainy Jeŭropy, asabliva z krain Blizkaha Uschodu, narastaje. Ci varta ŭ hetym paprakać Biełaruś i razhladać jaje jak centr niejkaha zła. Nie, treba pahladzieć u korań i pašukać pryčyny, čamu heta adbyvajecca», — skazaŭ Alaksandr Valfovič.
Nahadajem, Jeŭropa sutyknułasia z hłybokim mihracyjnym kryzisam u 2015 hodzie. Adnak z tych časoŭ kolkaść mihrantaŭ u krainach značna skaraciłasia. Istotny rost nielehalnaj mihracyi praź biełaruska-litoŭskuju miažu pačaŭsia adnosna niadaŭna, ź leta 2021 hoda, jon nijak nie źviazany ź mihracyjnym kryzisam 2015 hoda ŭ ES. Na inšych učastkach źniešniaj miažy ES nie fiksavaŭ takoha imklivaha rostu nielehalnaj mihracyi.
Jon ličyć, što mienavita krainy kalektyŭnaha Zachadu na padstavie pryŭniasieńnia demakratyčnych kaštoŭnaściaŭ kinuli ŭ stan vajny mnohija krainy Blizkaha Uschodu, jakija niekali kvitnieli.
«Tolki, na žal, da ich staviacca ŭ Jeŭropie jak da bydła. Jak kaliści ŭ kancłahierach da vajennapałonnych. Zahaniajuć na zakrytyja terytoryi, abnosiać kalučym drotam, utrymlivajuć u niečałaviečych umovach. Adsutnaść vady, ježy i inšych narmalnych ahulnačałaviečych elemientarnych kaštoŭnaściaŭ. Ablivajuć ich z vadamiotaŭ, truciać hazam dla taho, kab ludzi, jakija pačynajuć aburacca, maŭčali», — skazaŭ jon pra mihrantaŭ.
