Uładzimiru Mackieviču 65 hadoŭ, jon rodam ź Irkuckaj vobłaści Rasii. Mackievič — mietadołah i fiłosaf, hramadski dziejač. Mackievič vučyŭsia ŭ Leninhradskim dziaržaŭnym univiersitecie na fakultecie psichałohii. U 1982 hodzie, paśla zakančeńnia VNU, pa raźmierkavańni byŭ nakiravany na Vilniuski radyjotechničny zavod. Zatym pracavaŭ u Leninhradskim instytucie inžynieraŭ čyhunačnaha transpartu. Padrychtavaŭ kandydackuju dysiertacyju, ale da jaje abarony nie byŭ dapuščany, bo nie pažadaŭ ustupać u KPSS.
Mackievič mieŭ dačynieńnie da niekalkich prezidenckich kampanij
U 1987 hodzie pa zaprašeńni Ministerstva adukacyi Łatvijskaj SSR pierajšoŭ na pracu ŭ Lijepajski piedahahičny instytut, prapracavaŭ u im da 1989 hoda. U pačatku 1990-ch hadoŭ supracoŭničaŭ pa pytańniach reformy adukacyi ź pieršym ministram adukacyi Rasii Dniaprovym.
Mackievič taksama ŭklučyŭsia ŭ rabotu pa raspracoŭcy prahramy adukacyi ŭ Biełarusi i ciesna supracoŭničaŭ ź Ministerstvam adukacyi Biełarusi.
Uładzimir Mackievič udzielničaŭ u prezidenckich kampanijach, pačynajučy z 1994 hoda. Vyklučeńniem stali tolki 2001 i 2015 hady. U 1994 jon prapanavaŭ svaju dapamohu Zianonu Paźniaku, adnak paśla admovy dałučyŭsia da štaba Stanisłava Šuškieviča ŭ jakaści palittechnołaha. Praź niekatory čas ich supracoŭnictva spyniłasia praz roznahałośsi.
«Tady, u śniežni 1993 hoda, napiaredadni prezidenckich vybaraŭ, ja prapanavaŭ akazać pasilnuju dapamohu kandydatu, jaki, z našaha punktu hledžańnia, moh by pieramahčy i stać pieršym prezidentam Biełarusi, jaki b pavioŭ jaje pa šlachu narmalnaha raźvićcia», — raspaviadaŭ Mackievič pra tyja časy.
Praź niekatory čas jon pačaŭ supracoŭničać z Abjadnanaj demakratyčnaj partyjaj i bałatavaŭsia pa Anharskaj vybarčaj akruzie Minska na parłamienckich vybarach 1995 hoda. Prymaŭ udzieł u stvareńni Abjadnanaj hramadzianskaj partyi i Biełaruskaj chryścijanska-demakratyčnaj partyi.
U 1994-1997 hadach Mackievič byŭ raspracoŭščykam, aŭtaram i viadučym troch pieradač na Biełaruskim telebačańni. Z kanca 2002 hoda pa sakavik 2003 hoda źjaŭlaŭsia pieršym kiraŭnikom i viadučym tok-šou «Vybar» na telekanale ANT.
Z 2012 hoda staŭ viadučym prahramy «Hutarka dnia» na telekanale «Biełsat».
Uładzimir Mackievič źjaŭlajecca aŭtaram vialikaha koła publicystyčnych materyjałaŭ i kala 50 navukovych prac pa pytańniach palityki, kultury, transfarmacy i adukacyi.
U 2020 hodzie abrany delehatam płatformy narodnych pradstaŭnikoŭ «Schod». Taksama jon byŭ pieršym kiraŭnikom Rady Mižnarodnaha kansorcyuma «JeŭraBiełaruś», jakaja abjadnoŭvała hramadskich dziečoŭ i arhanizacyi, što padtrymlivajuć prajeŭrapiejskaje raźvićcio Biełarusi.
Vadałažskaja nazyvaje Mackieviča svaim nastaŭnikam
Taćciana Vadałažskaja — mietadołah i sacyjołah, kandydat sacyjałahičnych navuk i staršy analityk Centra jeŭrapiejskaj transfarmacyi. Ekśpiert Ahienctva humanitarnych technałohij i kaardynatar prahramy stvareńnia «Latučaha ŭniviersiteta».
Taćcianie 47 hadoŭ, jana naradziłasia ŭ Minsku. U 1996 hodzie skončyła adździaleńnie sacyjałohii Biełaruskaha dziaržaŭnaha ŭniviersiteta. U 1996-2007 hadach pracavała ŭ Instytucie sacyjałohii NAN Biełarusi. Daśledavała pytańni stanaŭleńnia i transfarmacyi nacyjanalnaj i hramadzianskaj identyčnaści.
U 2005 hodzie Taćciana dałučyłasia da prahramnaj dziejnaści fiłosafa Uładzimira Mackieviča. Ličyć jaho svaim nastaŭnikam. Akramia hetaha, u 2007 hodzie Taćciana stała stypiendyjatkaj śpiecyjalnaha fondu prezidenta pa padtrymcy talenavitaj moładzi.
Z 2010 hoda źjaŭlajecca staršym analitykam niezaležnaha analityčnaha Centra jeŭrapiejskaj transfarmacyi — jon uvachodzić u kansorcyum «JeŭraBiełarusi». Taćciana — aŭtar daśledavańniaŭ i analityčnych dakumientaŭ, nakiravanych na raźvićcio i ŭzmacnieńnie biełaruskaj hramadzianskaj supolnaści.
Vialička byŭ adnym ź lidaraŭ hramadzianskaj supolnaści Biełarusi
Uład Vialička 12 hadoŭ uznačalvaŭ mižnarodny kansorcyum «JeŭraBiełaruś». Adnak pa infarmacyi jaho kaleh, apošnija hady jon nie zajmaŭsia hramadskaj dziejnaściu i pracavaŭ u kirunku mižnarodnaha kansałtynhu.
Uład naradziŭsia ŭ 1973 hodzie ŭ Minsku, skončyŭ histaryčny fakultet Biełaruskaha dziaržaŭnaha piedahahičnaha ŭniviersiteta. Mieŭ dačynieńnie da stvareńnia šerahu hramadskich arhanizacyj i sietak, pracavaŭ mieniedžaram, zajmaŭsia pytańniami mižnarodnaha supracoŭnictva, arhanizacyjnaha raźvićcia, manitorynhu i acenki, a taksama zabiaśpiečvaŭ udzieł arhanizacyj hramadzianskaj supolnaści ŭ inicyjatyvie ES «Uschodniaje partniorstva».
