Pavieł Vinahradaŭ
Nahadajem, viadoŭcu prahramy «Heta ž Vinahrad!» zatrymali 5 lipienia. Spačatku jamu prysudzili 15 sutak administracyjnaha aryštu, paśla hetaha dadali jašče 30. «Naša Niva» skłała partret aktyvista.
Advučyŭšysia na cyrulnika, pajšoŭ na histaryčny fakultet
Paŭłu Vinahradavu 33 hady, jon naradziŭsia ŭ Minsku, vychoŭvała jaho babula. Skončyŭ prafiesijna-techničny licej pa śpiecyjalnaści «cyrulnik». Z 18 hadoŭ Pavieł žyŭ samastojna i niekatory čas vučyŭsia na historyka-hieahrafičnym fakultecie Minskaha piedahahičnaha ŭniviersiteta.
Darečy, svajo chobi jon nie kinuŭ i zajmaŭsia cyrulnictvam dla dušy. A ŭ 2018 hodzie Vinahradaŭ navat kamientavaŭ pryčoski, ź jakimi chodziać pradstaŭnicy ŭładnaj viertykali.
«Kali ja jašče vučyŭsia ŭ cyrulnickaj vučelni, u nas niekatoryja pryčoski nazyvali pa-asablivamu. Naprykład, kali ŭ chłopcaŭ pastryžana ŭsio koratka pad 6 milimietraŭ i tolki śpieradu zastajecca zabaŭny čubok, to ŭ nas heta byŭ «Barysaŭ». Pa niejkaj niezrazumiełaj pryčynie ŭsie mužčyny, jakija pryjazdžali z Barysava, chadzili z takim čubam», — raspaviadaŭ Pavieł.
Siarod klijentaŭ Vinahradava, darečy, byŭ navat Anton Matolka.
Byŭ fihurantam «spravy 14-ci»
Niekalki hadoŭ Vinahradaŭ byŭ aktyvistam kampanii «Jeŭrapiejskaja Biełaruś». Z-za aktyvisckaj dziejnaści jaho nie raz zatrymlivali. Pieršaje zatrymańnie adbyłosia ŭ 2007 hodzie na akcyi suprać admieny sacyjalnych ilhotaŭ — tady jamu dali 5 sutak aryštu.
U 2008 hodzie Vinahradaŭ staŭ fihurantam «spravy 14-ci», zaviedzienaj pa artykule 342 KK za ŭdzieł u mitynhu pradprymalnikaŭ 10 studzienia 2008 hoda. Za heta jon byŭ asudžany na 2 hady abmiežavańnia voli biez nakiravańnia ŭ papraŭčuju ŭstanovu. Razam ź Vinahradavym za ŭdzieł u toj akcyi byli asudžany Andrej Kim i Alaksandr Barazienka. Mižnarodnaja pravaabarončaja arhanizacyja «Amnesty International» u 2009 hodzie pryznała ŭdzielnikaŭ «spravy 14-ci» viaźniami sumleńnia.
Vinahradaŭ raspaviadaŭ, što ŭpieršyniu pačuŭ pra mitynhi padčas vučoby:
«Ja tady sam pajšoŭ u harderob, adčyniŭ dźviery, uziaŭ kurtku. Harderobščyca niešta kryčyć, ale ja byŭ taki zły, što nie źviartaŭ uvahi. Ja ž pajšoŭ pa svaju kurtku, u rešcie rešt, maju prava. Ale pajechaŭ ja tady nie dadomu, a na toj mitynh — na zło. Mnie stała cikava, što tam takoje adbyvajecca, što mnie nielha pajechać dadomu. Pryjšoŭ, hladžu — niejkija ludzi, niejkija łozunhi. Nu mnie heta było nie cikava, i ja pajechaŭ adrazu damoŭ. Pryjazdžaju, a pa televizary ŭžo pakazvajuć, jak ich tam razahnali, davoli žorstka. Dumaju: «Nichrana sabie, narmalnyja ludzi, ničoha tam takoha nie było».
I ŭžo paźniej Pavieł dadavaŭ, što pajšoŭ u palityku, kab spadabacca dziaŭčynie.
«Pantavaŭsia pierad adnahrupnicaj. Byŭ haračy 2006 hod, i ja joj skazaŭ, što taksama paŭdzielničaŭ by. A ŭ jaje apynuŭsia brat u «Zubry», u brata — siabroŭka. I hetaja siabroŭka mnie ŭžo telefanuje: «Ja tam čuła, ty chacieŭ paŭdzielničać». Admaŭlacca było pozna».
Uziaŭ šlub u kałonii
Ź leta 2010 hoda byŭ aktyvistam kampanii «Havary praŭdu!». Na prezidenckich vybarach 2010 hoda dałučyŭsia da inicyjatyŭnaj hrupy Uładzimira Niaklajeva. Paśla padziej toj zimy Pavieł Vinahradaŭ staŭ fihurantam kryminalnaj spravy ab masavych biesparadkach u Minsku.
U noč z 4 na 5 studzienia 2011 hoda damoŭ da Vinahradava pryjšli ź pieratrusam. Paśla Paŭłu pradjavili abvinavačvańnie pa art. 293 KK — «arhanizacyja i ŭdzieł u masavych biesparadkach». U mai taho ž hoda jamu prysudzili 4 hady kałonii. 22 lipienia 2011 hoda ŭ kałonii «Vaŭčynyja nory» aktyvist uziaŭ šlub sa svajoj niaviestaj Śviatłanaj, a ŭžo ŭ vieraśni byŭ vyzvaleny na padstavie ŭkaza Alaksandra Łukašenki ab pamiłavańni. Nastupnyja 3,5 hoda Vinahradaŭ znachodziŭsia pad previentyŭnym nahladam.
Pieradumaŭ źjazdžać ź Biełarusi i zamiest hetaha pierajechaŭ u Bierazino
Niekalki hod tamu Pavieł razam z žonkaj i dziciom pierajechaŭ u Bierazino. U intervju błohier raspaviadaŭ, što pryzvyčaiŭsia da spakojnaha žyćcia.
«Jechać siudy, u Bierazino, ja trochi pabojvaŭsia. Bajaŭsia, što zdochnu ad tuhi. Ale ničoha takoha. Ja zrazumieŭ, što minski šum — heta pastajannaja napružanaść. Tam ža navat zaparkavacca narmalna składana. A tut kali baćka parkujecca ŭ 20 mietrach ad kramy — heta daloka. Ja tolki śmiajusia nad im. Pryroda iznoŭ ža. Pavietra — da rečki 20 mietraŭ. Tam čysta i niama ludziej. U łapciach možna z domu vyjści — i na rečku. Heta ŭsio vielmi važnyja rečy, paviercie. Na Minsku śviet klinam nie syšoŭsia», — raspaviadaŭ jon «Jeŭraradyjo».
U tym ža intervju Vinahradaŭ dadavaŭ, što chacia raniej jon dumaŭ źjazdžać ź Biełarusi, bolš hetaha nie choča.
«Nie chaču ja adsiul źjazdžać. U mianie ŭ hałavie jašče dumki roznyja, kazki pra rycaraŭ, jakija valać drakonaŭ. Jašče pasprabuju pavalić», — kazaŭ jon.
Staŭ błohieram, vioŭ svaju pieradaču
Apošnim časam Pavieł Vinahradaŭ rabiŭ pieradaču «Heta ž Vinahrad!» dla telekanała «Biełsat». Heta aŭtarskaja prahrama, u jakoj błohier raspaviadaŭ pra padziei ŭ krainie i śviecie, jakija jaho začapili. Čaściej za ŭsio havorka išła pra palityčnyja padziei ŭ Biełarusi, jakija Vinahradaŭ iranična kamientavaŭ.
5 lipienia jon paviedamiŭ, što ŭ jaho dom pryjšli z «ahladam pamiaškańnia».
Praź niekatory čas žonka błohiera raspaviała, što Vinahradaŭ zatrymany za post u fejsbuku, apublikavany 8 maja. U im Vinahradaŭ razvažaje pra situacyju ŭ krainie i pratesty, a taksama adznačaje, što ŭ Biełarusi «prosta na vulicu vyjści strašna».
Žančyna taksama zaznačyła, što z doma zabrali techniku, nalepki z paštovaj skryni i bieła-čyrvonuju šyldu z numaram doma.
Paŭłu Vinahradavu spačatku dali 15 sutak, paśla — jašče 30. U čaćvier 5 žniŭnia stała viadoma, što ŭ dačynieńni da viadoŭcy zaviedzienaja kryminalnaja sprava.
