Praz 10 hadoŭ paśla ŭviadzieńnia ŭ stroj sanatoryj začynili. Pastupova jon pieratvaryŭsia ŭ kłasičnuju «zabrošku». Cełych voknaŭ u budynku nie zastałosia, usie darožki zaraśli chmyźniakom, častka bałkonaŭ i ścien abvaliłasia. Za niekalki hadoŭ roznyja ludzi vynieśli z sanatoryja ŭsio, što mahło spatrebicca ŭ haspadarcy.
Ale pry ŭsim pry hetym miesca hetaje papularnaje: siudy pastajanna zazirajuć bajdaračniki, jakija prapłyvajuć mima, zajazdžajuć amatary strajkbołu i maładyja — dla ramantyčnych fotasiesij.
Niezvyčajnaja architektura budynka pryvabnaja da hetaha času. Vieža (u joj schavany vodanaporny reziervuar) z padvojnym fluhieram u vyhladzie busłoŭ i vasilkoŭ, čyrvony čarapičny dach, adkrytyja bałkony.
Jak piša Realt, sanatoryj ciapier naležyć TAA «Prakryda». Abjekt, pabudavany ŭ 1986 hodzie i zakryty ŭ 1996-m, byŭ nabyty ciapierašnim ułaśnikam pa damovie kupli-prodažu.
Płošča budynka składaje kala 2700 kvadratnych mietraŭ. Usia terytoryja sanatoryja razam z sanitarnaj zonaj achovy padziemnych krynic naličvaje bolš za 9 hiektaraŭ. Ziamla pieradadziena ŭłaśniku ŭ arendu da 2063 hoda.
Jak śćviardžaje aŭtar abjavy, pabudovy sanatoryja možna rekanstrujavać, adnavić abo pierabudavać, atrymaŭšy dla hetaha nieabchodnyja dazvoły ŭ Vałožynskim rajvykankamie. Akramia budynka sanatoryja, u abjekt prodažu ŭvachodziać ačyščalnyja zbudavańni, supraćpažarnyja reziervuary, kacielnia, budynak KNS, haražy i transfarmatarnaja padstancyja.
Košt zakinutaha sanatoryja — 80 tysiač dalaraŭ. Akramia prodažu, ułaśnik hatovy razhledzieć i varyjanty abmienu. Va ŭmovach ździełki taksama ŭdakładniajecca, što abjekt pradajecca razam ź firmaj.
