Ab prapahandzie ŭ kałonii
Navalnaha prymušajuć hladzieć rasiejskaje dziaržaŭnaje telebačańnie i asobnyja prapahandysckija filmy bolš za vosiem hadzin štodzień.
«Čytać, pisać ci rabić niešta inšaje zabaroniena», — skazaŭ Navalny.
Palitviazień abaviazany siadzieć u kreśle i hladzieć televizar. I kali jon zasynaje, achoŭniki kryčać: «Nie śpi, hladzi!»
U siońniašniaj Rasii prahlad dziaržaŭnaha telebačańnia zamianiaje katarhu. Kali raniej palitviaźni pracavali ŭ hornazdabyŭnoj pramysłovaści abo lasnoj haspadarcy, to ciapier apazicyjanieraŭ katujuć psichałahična, prapahandaj.
Ab pierśpiektyvach Rasii
Navalny aptymistyčny adnosna budučych pierśpiektyŭ Rasii i vykłaŭ svaju stratehiju dasiahnieńnia palityčnych źmienaŭ.
«Režym Pucina — heta histaryčnaja vypadkovaść, a nie niepaźbiežnaść», — adznačyŭ jon, dadaŭšy: «Heta byŭ vybar karumpavanaj siamji Jelcyna».
«Rana ci pozna hetaja pamyłka budzie vypraŭlenaja, i Rasieja piarojdzie na demakratyčny, jeŭrapiejski šlach raźvićcia. Prosta tamu, što hetaha chočuć ludzi».
Ab sankcyjach suprać Rasii
Navalny raskrytykavaŭ Jeŭropu i Złučanyja Štaty za ekanamičnyja sankcyi, jakija ŭviali ŭ dačynieńni da Rasii. Palityk skazaŭ, što sankcyi škodziać prostym rasiejcam.
Sankcyi, pa jaho słovach, pavinny być naceleny tolki na aliharchaŭ, jakija padtrymlivajuć Pucina. Pa słovach palityka, sapraŭdy ŭpłyvovyja aliharchi paźbiehli sankcyj.
Ab pucinskaj ideałohii
«Ja dobra razumieju sutnaść ideałohii pucinskaha režymu: sučasnaść i budučynia padmianiajucca minułym — sapraŭdy hieraičnym minułym, abo prycharošanym minułym, abo całkam prydumanym minułym. Usie vidy minułaha pavinny pastajanna znachodzicca ŭ centry ŭvahi, kab vycieśnić dumki ab budučyni i pytańni ab ciapieršanim», — skazaŭ apazicyjanier.
Ab kałonii
«Usio arhanizavana tak, kab ja znachodziŭsia pad maksimalnym kantrolem 24 hadziny ŭ sutki», — skazaŭ Navalny. Jon skazaŭ, što sukamierniki nie napadali na jaho i nie pahražali jamu, ale padličyŭ, što kala traciny ź ich byli infarmatarami načalnika turmy.
Na praciahu pieršych tydniaŭ znachodžańnia ŭ kałonii kaniečnaści Navalnaha byli zdranćviełymi. Palityk 24 dni haładaŭ.
Achoŭniki pazbaŭlali palityka snu.
«Ciapier ja razumieju, čamu pazbaŭleńnie snu źjaŭlajecca adnym ź lubimych katavańniaŭ śpiecsłužbaŭ», — skazaŭ jon. «Nijakich śladoŭ nie zastajecca, ale heta niemahčyma vynieści».
Palityk skazaŭ, što dobra ładzić ź inšymi źniavolenymi ŭ svaim turemnym błoku. Časam jany hatujuć zakuski ŭ mikrachvalevaj piečy.
Ab pratestach i palityčnym režymie
Apazicyjanier vykazaŭ zdahadku, što biełaruskija pratesty napałochali Kreml. Taksama Navalny miarkuje, što Kreml baicca stratehii «Razumnaje hałasavańnie».
U adpaviednaści sa stratehijaj Navalnaha, inicyjatyva padtrymlivaje kandydataŭ, jakija, na jaje dumku, majuć šancy na pieramohu na rehijanalnych i parłamienckich vybarach. Stratehija kansaliduje hałasy tych, chto vystupaje suprać «Adzinaj Rasii».
Navalny adznačaje, što dla taho, kab nie puścić u parłamient apazicyju, Pucinu pryjšłosia całkam źmianić palityčnuju sistemu, pierajści na pryncypova inšy, značna bolš žorstki uzrovień aŭtarytaryzmu.
U doŭhaterminovaj pierśpiektyvie, pavodle Navalnaha, represii źviazanyja z ryzykami, pakolki Pucin robić vorahami rehijanalnyja elity.
«Apazicyja isnuje ŭ Rasiei nie tamu, što Alaksiej Navalny ci niechta inšy kamanduje joju sa štaba, — skazaŭ Navalny, — a tamu, što kala 30 adsotkaŭ krainy — u asnoŭnym adukavanaje haradskoje nasielnictva — nie maje palityčnaha pradstaŭnictva».
Rasieja paśla Pucina vierniecca da demakratyčnaha ładu, skazaŭ Navalny.
«U nas jość svaje asablivaści, jak i ŭ luboj nacyi, ale my Jeŭropa, i my Zachad», — skazaŭ apazicyjanier.
