U tak zvanym pašpartnym stale afarmlać bijamietryju adpravili ŭ inšy kabiniet ź nie samym abnadziejlivym zyčeńniem. Maŭlaŭ, vy pieršaja, jašče ničoha nie abkatana, kali jość mahčymaść pačakać, to lepš heta zrabić. Novy vid dakumientaŭ afarmlajuć u śpiecyjalna abstalavanym kabiniecie, uvachod u jaki z dvara budynka. Abstalavańnie ŭ pamiaškańni vyhladaje futurystyčna: śpiecyjalny skanier dla adbitkaŭ palcaŭ, abstalavańnie dla stvareńnia elektronnaha podpisu, «razumnaja» kamiera dla fatahrafii… I ŭsio heta ŭ adnoj pryładzie dla kožnaha klijenta. A ich u Pinskim adździele pa hramadzianstvie i mihracyi adnačasova moža absłuhoŭvacca da čatyroch čałaviek. Śpiecyjalisty adznačyli, što dla vykarystańnia ŭ krainie dastatkova tolki karty, a dla vyjezdaŭ za miažu patrebny jašče i bijamietryčny pašpart. Kab aformić novyja dakumienty nieabchodna apłacić pasłuhu i pryjści ŭ adździeł sa starym pašpartam.

Unieści hrošy za ID-kartu i pašpart možna samastojna praz ARIP abo ŭ banku, na pošcie. Z telefona ałharytm prosty: ARIP, MUS, hramadzianstva i mihracyja, hramadzianin RB, vobłaść i horad, ID karta, identyfikacyjny numar pašparta. Tolki ni adna z 10 sprobaŭ apłacić nie była paśpiachovaj. Sistema adkazvaje, što pasłuha nie znojdziena.

Žurnalistka sprabavała zapłacić za pašpart. Z rachunku paśpiachova śpisali 58 rubloŭ. Tolki biez ID-karty pašpart nie zrobiać. Źviarnułasia na poštu. Dziaŭčyna paćvierdziła, što i praź ich sistemu apłatu za ID kartu zrabić niemahčyma, choć napisana, što pasłuha dastupnaja z 1 vieraśnia. U pašpartnym stale adkazali, što ŭ hetaj situacyi dapamahčy nie mohuć. Nieabchodna čakać, kali prablema z apłataj vyrašycca.

ID karta i pašpart razam kaštujuć 100 rubloŭ, čverć minimalnaj zarpłaty ŭ krainie. Atrymać novyja dakumienty, jakija kaštujuć u try razy bolš za zvyčajnyja, pry pieršaj mahčymaści niemahčyma.

Nahadajem, z 1-ha vieraśnia ŭ Biełarusi pačali prymać dakumienty na afarmleńnie ID-kartak i bijamietryčnych pašpartoŭ. Jak i raniej, zajavy prymajuć adździeły pa hramadzianstvie i mihracyi. Vydavać novyja dakumienty buduć pa žadańni, to-bok zvykły papiarovy pašpart taksama budzie dziejničać. 

Čytajcie taksama: U Biełarusi pačynajuć vydavać bijamietryčnyja pašparty i ID-kartki. Jak ich atrymać i jak heta źmienić naša žyćcio

Клас
Панылы сорам
Ха-ха
Ого
Сумна
Абуральна