Daśledavańnie, u jakim uziali ŭdzieł kala 14 tysiač čałaviek, pakazała, što dźvie dozy rasijskaj vakcyny źnižajuć ryzyku špitalizacyi paśla zaražeńnia štamam «delta» na 81% i dapamahajuć paźbiehnuć surjoznych paškodžańniaŭ lohkich, piša navukovy časopis Science.
Novyja chvali zaražeńnia karanavirusam i pavieličeńnie kolkaści vypadkaŭ u vakcynavanych ludziej vyklikajuć zaniepakojenaść, što vakcyny nie abaraniajuć ad štama «delta» tak, jak abaraniajuć ad papiarednich štamaŭ.
Hrupa navukoŭcaŭ, jakuju ŭznačalvaje Anton Barčuk ź Jeŭrapiejskaha ŭniviersiteta ŭ Sankt-Pieciarburhu praanalizavali źviestki pra zachvarełych na kavid.
U analiz byli ŭklučanyja 13894 pacyjenty, 1291 ź jakich byli całkam vakcynavanyja. Z usich udzielnikaŭ špitalizavanyja byli 495 čałaviek.
Daśledavańnie pakazała, što rasijskaja vakcyna abaraniaje ad špitalizacyi na 81% paśla zaražeńnia štamam «delta» ŭ vypadku poŭnaj vakcynacyi. Vyznačyć efiekt adnoj dozy nie ŭdałosia, bo ŭ daśledavańnie było ŭklučana zamała ludziej dla hetaha.
«Našy źviestki paćviardžajuć, što siarod pieravah vakcynacyi — pasłableńnie ciažkaści zachvorvańnia», — śćviardžaje Barčuk.
Daśledčyki taksama vyjavili, što Sputnik V na 76% achoŭvaje ad surjoznych paškodžańniaŭ lohkich, jakija vyjaŭlaje kampjutarnaja tamahrafija.
Džon Mur, imunołah z Weill Cornell Medicine, adznačaje, što vyniki daśledavańnia padajucca dakładnymi i adpaviadajuć čakańniam.
Navukoviec dadaje, što rasijskaja vakcyna maje mienšuju achovu ad špitalizacyi, čym jeŭrapiejskija vakcyny, ale jaje vynik usio roŭna ličycca vielmi dobrym.
Daśledavańnie ŭ Sankt-Pieciarburhu było praviedziena niezaležna ad rasijskaha ŭrada i centra Hamalei, jaki raspracoŭvaŭ vakcynu.
