Dźmitry Załomski. Fota: sacyjalnyja sietki
Pavieł Sapiełka, juryst i pravaabaronca, kaža, što ŭ kałonii musiać abapiracca na asabistuju spravu čałavieka. U joj pavinna być prapisanaja hrupa invalidnaści i pryłady ci leki, u jakich čałaviek maje patrebu.
«Adpaviedna, kali čałaviek nie moža funkcyjanavać biez słychavoha aparata — jaho musiać viarnuć, bo nakolki ja viedaju, nijakich surdapierakładčykaŭ u kałonijach niama», — kaža Sapiełka.
«Zvyčajna ŭ luboj kałonii jość atrad dla niepracazdolnych ludziej. Heta i piensijaniery, i ludzi ź invalidnaściu. Kali jany majuć abmiežavańni, ich nie pryciahvajuć da pracy. Kali ž čałaviek maje abmiežavańni, ale moža pracavać — u kałonii pastarajucca pradastavić adpaviednuju pracu», — raskazvaje pravaabaronca.
Anastasija Žyrmont, juryst, člen praŭleńnia Inclusion Europe, arhanizacyi, što abaraniaje pravy i intaresy ludziej ź intelektualnaj invalidnaściu i členaŭ ich siemjaŭ, adznačaje:
«Kanviencyja ab pravach ludziej ź invalidnaściu rehuluje praviły ŭtrymańnia pad vartaj takich ludziej. Biełaruś dałučyłasia da hetaj Kanviencyi ŭ 2016 hodzie. Taksama dziejničajuć tak zvanyja «Praviły Mandeły» — minimalnyja standarty AAN u dačynieńni da abychodžańnia sa źniavolenymi pad redakcyjaj 2015 hoda, dzie jość kankretny momant pra ludziej z asablivymi patrabavańniami, u tym liku i ludziej ź invalidnaściu.
Praviły ŭtrymlivajuć patrabavańnie pradastaŭleńnia tak zvanaha «razumnaha prystasavańnia» dla źniavolenaha ź invalidnaściu. Da hetych «razumnych prystavańniaŭ» datyčycca taksama i słychavy aparat.
Kamitet pa pravach ludziej ź invalidnaściu jašče raniej adznačaŭ, što admova ŭ «razumnym prystasavańni» heta nie tolki forma dyskryminacyi, ale ŭ niekatorych vypadkach heta moža pryraŭnivacca da katavańniaŭ i biesčałaviečnaha abychodžańnia ci abychodžańnia, jakoje prynižaje čałaviečy honar i hodnaść.
Adpaviedna, kali słychavy aparat źniavolenamu nie addaduć, to my majem pierad saboju ceły šerah parušeńniaŭ mižnarodnych kanviencyj».
Ci addali Załomskahu słychavy aparat, pakul nieviadoma. Pa słovach stryječnaha brata, baćki Załomskaha nie chočuć kantaktavać z presaj.
Tamu «Naša Niva» źviarnułasia ŭ Biełaruskaje tavarystva hłuchich — kamu, kali nie im trymać situacyju na kantroli?
«Vam tut na hetaje pytańnie nie adkažuć, — paviedamiła Ała Makaruškina, sakratar Centralnaha praŭleńnia tavarystva hłuchich. — Heta ž, napeŭna, tam pavinny vyrašać, u Śledčym kamitecie. Źviartajciesia tudy».
Pryčym heta nie pieršaja padobnaja historyja. Ź lipienia pa žnivień 51-hadovaja Alena Levina, jakaja maje invalidnaść pa słychu, adbyvała 30 sutak aryštu. Žančyna skardziłasia, što supracoŭniki CIP pryniali ŭ jaje svajakoŭ novyja batarejki dla słychavoha aparata, ale ž nie addali ich joj. Pryčym spačatku jaje asudzili na 15 sutak, paśla — dadali jašče 15. Padčas druhoha suda batarejki Levinaj vydali, kab jana mahła ŭdzielničać u pracesie, ale adrazu paśla prysudu ich zabrali, paviedamlali pravaabaroncy.
