Šachmatyst pavinien byŭ udzielničać u čempijanacie Biełarusi, ale za niekalki hadzin da startu pryniaŭ rašeńnie admovicca ad udziełu ŭ turniry.

«Heta było davoli niečakanaje rašeńnie i dla mianie samoha, — raspaviadaŭ hrosmajstar «Narodnaj Voli». — Jašče zranku ja mieŭ namier udzielničać u čempijanacie, admysłova rychtavaŭsia da jaho i źbiraŭsia stać pieramožcam. Nie było nijakich papiarednich płanaŭ admaŭlacca ad pieršynstva i rychtavać niejki demarš. Ale mianie da hetaha padšturchnuli.

Padčas adkryćcia čempijanatu da mianie padyšła namieśnica dyrektara Respublikanskaha centra alimpijskaj padrychtoŭki i ŭručyła dadatkovaje pahadnieńnie da kantraktaŭ spartsmienaŭ. U dakumiencie byŭ prapisany šerah abmiežavalnych punktaŭ, jakich raniej nie było. Nakolki ja zrazumieŭ, heta było źviazana z padziejami, jakija adbylisia ŭ krainie paśla vybaraŭ i z tym, što mnohija spartsmieny vykazali svaju pazicyju, što adroźnivajecca ad «hienieralnaj».

Naturalna, mianie aburyli hetyja abmiežavańni. My majem Kanstytucyju, a ludzi majuć prava na abaronu svaich kanstytucyjnych pravoŭ. Čamu niejkija spartyŭnyja čynoŭniki abmiažoŭvajuć maje pravy?

Adnym słovam, ja admoviŭsia padpisvać dadatkovaje pahadnieńnie, za što mianie adrazu ž paabiacali zvolnić. Pryjšoŭ dadomu, jašče raz usio ŭzvažyŭ, pra ŭsio padumaŭ i vyrašyŭ, što taki dakumient padpisvać nie budu.

Akramia taho, pryniaŭ rašeńnie naohuł nie ŭdzielničać u čempijanacie. I heta byŭ pravilny chod. Razam sa mnoj admovilisia vystupać na pieršynstvie i jašče niekalki šachmatystaŭ».

Paśla zvalnieńnia z Centra alimpijskaj padrychtoŭki pa pahadnieńni bakoŭ Uładzisłaŭ Kavaloŭ pracavaŭ sam na siabie. Adkryŭ šachmatnuju anłajn-škołu, i heta było peŭnaj krynicaj prybytku.

A na pačatku hetaha hoda šachmatyst paviedamiŭ, što pakinuŭ Biełaruś.

«Adzin spartyŭny čynoŭnik mnie skazaŭ: «Vy ž razumiejecie, što, kali padpisali list suprać hvałtu, vy nie zmožacie tut znachodzicca», — raspavioŭ Uładzisłaŭ. — Ja adkazaŭ: «Razumieju, ale prybirać svoj podpis nie budu». Inšaha varyjanta ŭ mianie nie było, a tamu i źjechaŭ».

Hrosmajstar bolš nie pradstaŭlaje Biełaruś u šachmatnych spabornictvach. Nasuprać jaho proźvišča ŭ aficyjnym rejtynh-liście paznačana: Mižnarodnaja fiederacyja šachmat (FIDE).

Darečy, nie tak daŭno kamanda «Svabodnyja šachmatysty Biełarusi» stała pieramožcam anłajn-turniru ŭ pieršym dyvizijonie bundeślihi na adnoj z šachmatnych hulniavych płatformaŭ. Za kamandu vystupajuć takija viadomyja biełaruskija šachmatysty, jak Uładzisłaŭ Kavaloŭ, Andrej Žyhałka, Jaŭhien Ahrest, Jaŭhien Padolčanka, Dźmitryj Bułanaŭ, Valeryj Kazakoŭski…

— Pa-raniejšamu žyvu ŭ Rasii, zajmajusia svajoj šachmatnaj škołaj, — raspaviadaje Uładzisłaŭ. — Časam na niejkija turniry vyjazdžaju. Pandemija, biezumoŭna, uniesła karektyvy ŭ hrafik spabornictvaŭ, ale niešta prachodzić. Chacia na ŭsie sto pracentaŭ nie možaš być upeŭnieny, što turnir adbudziecca, navat kali raniej pra admienu nichto i nie zajaŭlaŭ. Tamu vielmi składana niešta płanavać na bolš-mienš dalokuju pierśpiektyvu. Jak kažuć, žyviom siońniašnim dniom.

— Za zbornuju Biełarusi vystupać užo nie budziecie?

— Na ciapierašni momant nie źbirajusia, tym bolš što za paŭhoda, jak źjechaŭ z krainy, ź Biełaruskaj fiederacyi šachmat sa mnoj nichto nie vychodziŭ na suviaź. Absalutna nijakich prapanoŭ, tamu ja heta rasceńvaju tak: nie majuć patreby ŭ maich pasłuhach. Dyk navošta mnie vystupać za zbornuju, kali nie majuć ničoha prapanavać?

— Ad inšych krain prapanoŭ nie było?

— Prapanovy byli, ale, skažam tak, nie kankretnyja. Tamu pakul biaru ŭdzieł u turnirach u statusie niejtralnaha ihraka.

— A z pradstaŭnikami Fiederacyi šachmat Rasii nie havaryli?

— Nie baču vialikaha sensu, bo ŭ Rasii chapaje i svaich mocnych šachmatystaŭ. Dumaju, ja im nie vielmi patrebien, dy i mnie heta asabliva nie treba.

Tamu prosta žyvu ŭ Rasii, zajmajusia svaimi spravami, i mnie tut padabajecca. Navat i nie viedaju, ci źbirajusia viartacca ŭ Biełaruś. Pakul takich płanaŭ niama.

Tut mianie ceniać bolš, čym doma, tut i šachmaty bolš papularnyja, čym u Biełarusi. Pastajanna zaprašajuć na roznyja mierapryjemstvy, na samaj spravie staviacca jak da hrosmajstra.

— Adaptacyja da novaha miesca prajšła narmalna?

— Biez usialakich prablem. Ja pastajanna raźjazdžaju pa turnirach, tamu dla mianie žyćcio ŭ inšaj krainie i źmiena miesca dysłakacyi — zvykłaja sprava. Tym bolš što i žonka pierajechała razam sa mnoj, tak što nie sumuju ŭ adzinocie.

Клас
0
Панылы сорам
0
Ха-ха
0
Ого
0
Сумна
0
Абуральна
0