Ihar Šklareŭski i Ryhor Baradulin u Maskvie, 1960-ja.
Ihar Šklareŭski paśla zakančeńnia ŭ 1965 hodzie Litaraturnaha instytuta imia Horkaha zastaŭsia na stałaje miesca žycharstva ŭ Maskvie. Byŭ čalcom redkalehii časopisa «Junosť», hramadskaj rady «Litieraturnoj haziety». Niekatoryja jahonyja tvory pryznavalisia «idejna zahannymi», zdymalisia z druku abo doŭha čakali svajho času.
Pierakłaŭ na rasijskuju movu vialikuju kolkaść biełaruskich paetaŭ: Mikołu Husoŭskaha, Janku Kupału, Maksima Tanka, Anatola Vialuhina, Ryhora Baradulina, Pimiena Pančanku, Alaksieja Pysina, Hienadzia Buraŭkina dy inšych.
Nizku vieršaŭ samoha Ihara Šklareŭskaha na biełaruskuju pierakłaŭ paet Michaś Skobła.
Ihar Šklareŭski naradziŭsia 25 červienia 1938 hoda ŭ Białyničach na Mahiloŭščynie ŭ siamji nastaŭnikaŭ. Skončyŭ Białynickuju siaredniuju škołu, pastupiŭ u Mahiloŭski piedahahičny instytut, ale vučobu kinuŭ.
Pracavaŭ liciejnikam na zavodzie «Strommašina», kamornikam na kazachstanskaj calinie, matrosam rybałoŭnaha traŭlera na Cichim akijanie, žurnalistam rajonnaj haziety ŭ Prymorskim krai. Zatym viarnuŭsia dadomu, uładkavaŭsia ŭ hazietu «Zorka».
U 1962 hodzie vyjšaŭ pieršy zbornik vieršaŭ Ihara Šklareŭskaha «Ja idu», praz dva hady — kniha «Łodka».
Pa nakiravańni Sajuza piśmieńnikaŭ Biełarusi pastupiŭ u Litaraturny instytut imia Horkaha i zastaŭsia ŭ Maskvie. Vydaŭ zborniki vieršaŭ, napisanyja pa-rasijsku: «Fortuna», «Vola», «Rievnosť», «Pochołodanije», «Dozornaja vietka», «Tajnik», «Brat», «Nienazvannaja siła», «Hosť», «Słušaju niebo i ziemlu», «Krasnaja kniha», «Hłazy vody», «Mnie vsio poniatniej obłaka».
U 2018 hodzie ŭ Biblijatečcy časopisa «Dziejasłoŭ» vyjšła jahonaja kniha vybranaha «Ožierielje sušionych hribov».
