Novabudoŭli ekanom-kłasa padniali ceny
Ź minułaha žniŭnia staličny rynak nieruchomaści prasieŭ praz palityčnyja šoki. Ździełak było mała — da hetaj viasny. Ekśpiert pa nieruchomaści Natalla Litoŭskaja kaža, što z krasavika pakupniki ažyvilisia.
«Adkładzieny popyt narešcie vyjšaŭ na rynak. Ludzi adaptavalisia i vyrašyli, što kali chočacca kupić kvateru, to treba kuplać. Plus źjaviłasia choć i darahoje, ale kredytavańnie — Biełarusbank prapanavaŭ kredyty na žyllo pad 21%, i kala 3000 čałaviek skarystalisia hetaj prapanovaj. Siaredniaja suma kredytu była 40 tysiač rubloŭ».
Paŭpłyvała i toje, što ŭ zakonie zamacavali mahčymaść uvodzić Nacbankam valutnyja abmiežavańni.
«Narod pa-svojmu traktavaŭ heta, vyrašyŭ, raptam banki voźmuć i nie addaduć toje, što tam lažyć. Častka pabajałasia pakidać hrošy na rachunkach, zachoŭvać doma bujnyja sumy taksama niebiaśpiečna, tamu vyrašyli ich «zabietanavać», — ličyć ekśpiert.
— Vielmi šmat ździełak, jakija možna nazvać inviestycyjnymi: kali čałaviek układaje kolki jość, zaskokvaje ŭ apošni vahon kredytavańnia i nabyvaje žyllo z raźlikam na toje, što kali ŭsio naładzicca, to jano budzie pradadziena, hrošy nazapašany i vyrašycca pytańnie z kvateraj mary. Plus ludzi, jakija prosta źbirali hrošy, vyrašyli kupić umoŭnuju adnušku kala mietro, jakaja budzie zdavacca».
Usplosk prodažaŭ — u mikrarajonie «Minsk Mir». Jany aktyŭna rekłamujucca ŭ rehijonach, i dla ludziej tam heta pryvabnaja prapanova — pabudavać kvateru ŭ stalicy za 800-900 dalaraŭ za kvadrat.
Kvartał «Minsk Mir»
«Jany nie źviartali ŭvahu, što heta paŭfabrykaty. Paśla, kaniečnie, daviadziecca sutyknucca z tym, što žyllo vielmi darahoje ŭ čarnavym ramoncie. Daviadzieńnie jaho da stanu, kali ŭžo možna rabić zvyčajny ramont, kaštuje da 200 dalaraŭ za kvadratny mietr. I kali tak padličyć, kvatera-paŭfabrykat ad «Minsk Miru» i kvatera ŭ karkasnym domie z čarnavoj adździełkaj prykładna adnolkavyja pa košcie.
Minčuki, jakija razumiejuć roźnicu ŭ jakaści asiarodku, vybieruć, jak ni dziŭna, chruščoŭku. Bo tam mienš prablem z parkoŭkami, budzie zialonaja zona, kramy pracujuć, sadki i palikliniki jość. A ŭ tym ža «Minsk Miry» infrastruktura spaźniajecca».
Na fonie vysokaha popytu novabudoŭli ekanom-kłasa padniali ceny — na 100 dalaraŭ za «kvadrat» (da 1200 dalaraŭ). Zapatrabavany i darahija kvartały. Naprykład, «Lavada» i «Farforavy», dzie kvadratny mietr kaštuje 1400-1500 dalaraŭ.
«Ciapier u siarednim 1200-1300 ździełak u miesiac pry normie dla Minska ŭ 1100-1150. Pramiežkavyja źviestki nacyjanalnaha kadastravaha ahienctva śviedčać, što za žnivień było 1400 ździełak. Heta ŭnušalnaja ličba», — adznačaje Natalla Litoŭskaja.
Adnapakajovuju chruščoŭku ź niadrennym ramontam u abžytym spalniku možna nabyć za 45 tysiač dalaraŭ.
Adnušku ŭ novym karkasnym domie kala mietro (40-45-mietrovuju, hatovuju da pražyvańnia) — za 65 tysiač dalaraŭ.
«Klijentu abrydli standartnyja płaniroŭki»
Adna z tendencyj — padzieńnie prodažaŭ na druhasnym rynku žylla.
«Heta źviazana, napeŭna, ź vialikaj zabudovaj «Dana Holdings»: ciapier cana za kvadratny mietr u novabudoŭlach praktyčna takaja ž, jak na druhasnym rynku. Tamu vybar robicca na karyść kupli bolš sučasnaha žylla, z łobi, kanśjeržkami», — tłumačyć dyrektar ahienctva nieruchomaści «Partnior dla ŭsich» Iryna Dancova.
Kali kazać pra novabudoŭli, to adnapakajovuju kvateru z ramontam ludzi chočuć brać za 50-55 tysiač dalaraŭ, dvuchpakajovuju — da 65 tysiač.
Ekśpiert taksama adznačaje, što jość popyt na elitnuju nieruchomaść. Tak, na kvateru biez adździełki ŭ «Słavianskim kvartale» za 2000 dalaraŭ za mietr u ahienctva było niekalki pakupnikoŭ.
«Klijentu abrydli standartnyja płaniroŭki — voś čamu jany pierakinulisia na novabudoŭli, na A-100 i «Minsk Mir». Ich pryvablivajuć kvatery z francuzskimi voknami, dzie možna rabić sučasnyja prajekty i stvarać pad siabie kuchniu-haścioŭniu. Stary fond zastajecca časovym miescam znachodžańnia dla tych, chto choča chutčej zajechać žyć i nie tracić hrošy na ramont».
Pa nazirańniach Iryny Dancovaj, dastupnaha žylla šmat u Frunzienskim i Maskoŭskim rajonach. Krychu horš situacyja ŭ Zavodskim.
«Katedžy, jakija kaštavali 260-300 tysiač dalaraŭ, vystaŭlajuć za 180»
Mianialisia tendencyi i pa zaharadnaj nieruchomaści.
«Praz pandemiju byŭ aktyŭny rost pakupki damoŭ. Napeŭna, mnohija vyrašyli, čym patracić hrošy na adpačynak, dzie cana na siamju ź dziećmi, skažam, 4000-5000 dalaraŭ, lepš nabyć domik, — kaža Iryna Dancova.
— Ciapier u našaha klijenta popyt na domiki ad 5 da 12 tysiač dalaraŭ. Byli takija, chto chacieŭ kupić domik z praviedzienym hazam, kamunikacyjami ŭ 60-70 kiłamietrach ad Minska za sumu da 10 tysiač dalaraŭ. Chacia my ličym, što heta nizkaja cana dla takoj nieruchomaści».
Pa darahich tradycyjnych katedžach praktyčna niama zvankoŭ.
«Tyja katedžy, jakija kaštavali 260-300 tysiač dalaraŭ, vystaŭlajuć za 180, i jany nie zapatrabavanyja. Zapatrabavany sučasnyja damy ŭ prybałtyjskim styli, naprykład, za 300 tysiač dalaraŭ u miežach horada», — apisvaje stuacyju Iryna Dancova.
Natalla Litoŭskaja naziraje, što ciapier vialiki popyt na ŭčastki ŭ blizkim pryharadzie — Kałodziščach, Baraŭlanach, Fanipali.
«Mnie zdajecca, peŭnaja katehoryja ludziej vyrašyła, što choć što zdarycca, jany buduć žyć tut, tamu buduć kuplać učastak i budavać dom. Na niadaŭnich tarhach učastak u Kałodziščach syšoŭ za 100 tysiač dalaraŭ — składana ŭjavić, što chtości moh za ziamlu addać stolki. Prytym što ŭ tych ža Kałodziščach možna za 150-250 tysiač kupić abžyty katedž. A budaŭnictva siońnia darahoje, bo budmateryjały padaraželi».
«U try razy skaraciŭsia prytok klijentaŭ na rynku arendy»
Na rynku arendnaha žylla ŭ kancy leta nie było ažyjatažu, jak zvyčajna.
«U suviazi z pandemijaj, inšymi abstavinami kolkaść studentaŭ źmienšyłasia. U nas, naprykład, u try razy skaraciŭsia prytok klijentaŭ na rynku arendy žylla», — dzielicca Iryna Dancova,
Za hod kolkaść prapanoŭ u Minsku vyrasła ŭtraja — volnyja 11,2 tysiačy kvater (pa źviestkach Realt.by).
Što nakont cen? Ahienctva nieruchomaści «Tvaja stalica» pryvodzić takija ličby. Adnapakajovuju kvateru ŭ siarednim zdajuć za 220 dalaraŭ, dvuchpakajovuju — za 270, trochpakajovuju — za 330. Kali šukać varyjant pobač ź mietro ci z poŭnym naboram mebli i bytavoj techniki, sumy buduć bolšyja.
Samaja darahaja arenda — u centry, mikrarajonach «Lebiadziny» i «Majak Minska». Tam ceny ŭ dva razy vyšejšyja, čym u siarednim.
«Popyt budzie zadavoleny litaralna za vierasień»
Vierahodna, u bližejšyja miesiacy na rynku budzie zacišša.
«Pa maich adčuvańniach, ludzi ŭžo mienš cikaviacca žyllom. Usie, chto niervavaŭsia i bajaŭsia zachoŭvać hrošy ŭ banku ci doma, vyznačylisia ci ŭ bližejšyja dni vyznačajucca, nabyvajuć nieabchodnyja mietry.
Zastajecca nievialiki pracent, jaki choča žyllo, ale kredytavańnie dla ich darahoje, na pačatkovy ŭznos nie chapaje. Tamu, na moj pohlad, płaciežazdolny popyt budzie zadavoleny litaralna za vierasień», — miarkuje Natalla Litoŭskaja.
Ci varta pačakać z pakupkaj žylla? Iryna Dancova razvažaje: kali ŭ vas jość lišnija hrošy, lepš ukłaści ich ciapier u kvateru i atrymlivać pasiŭny dachod.
«Niadrennaja dvuchpakajovaja kvatera ŭ spalnym rajonie budzie kaštavać 300-350 dalaraŭ u arendu. Ci čałaviek moža ŭkłaści ŭ novabudoŭlu, dzie ciapier arenda kala 400-500 dalaraŭ u ekvivalencie. Biarom «Majak Minska» — u miežach 700-1000 dalaraŭ raźbirajuć. Ja za toje, kab kiravać svaimi inviestycyjami, a nie pakidać hrošy prosta tak lažać».
