Siarod 329 kandydataŭ jość jak asoby, tak i arhanizacyi. Narviežski Nobieleŭski kamitet nazyvaje tolki ahulnuju ličbu vyłučanych, ale nie razhałošvaje ani śpis, ani šort-list. Narviežski paradak adboru vyklučaje lubyja insajdy i łabiravańnie. Poŭnyja śpisy publikujucca, ale tolki praz 50 hadoŭ, kali robiacca historyjaj.
Rašeńnie prymaje kamitet, składzieny ź piaci čałaviek, vybranych narviežskimi parłamientaryjami. Jany tradycyjna reprezientujuć roznyja palityčnyja siły: pravych, levych i centrystaŭ.
Kaniečnie, Nobieleŭskaja premija miru — nie taja tema, jakuju lohka pradbačać bukmiekieram. Tym nie mienš staŭki na sajtach adlustroŭvajuć ujaŭleńni ludziej pra toje, što i chto ciapier u trendach.
Na hety momant absalutnym favarytam ličycca Suśvietnaja arhanizacyja achovy zdaroŭja za jaje rolu ŭ baraćbie z pandemijaj kavidu. Abo, mahčyma, bolš vuzka — COVAX, prahrama pastavak vakcyn ad karanavirusa niebahatym krainam.
Na druhim miescy ŭ śpisie favarytaŭ idzie źniavoleny rasijski antykarupcyjny błohier Alaksiej Navalny.
Siarod favarytaŭ nazyvajuć taksama ekałahičnuju aktyvistku Hretu Tunbierh i Džasindu Ardern, premjer-ministarku Novaj Ziełandyi — krainy, jakaja najbolš paśpiachova prajšła pandemiju.
Śviatłana Cichanoŭskaja znachodzicca ŭ nizie śpisu. Jaje nie ličać favarytkaj.
Zrešty, śpisy bukmiekieraŭ na Nobiel miru zaŭsiody trochi śmiešnyja. U ich fihurujuć i asoby, jakija na słychu, ale šancaŭ na premiju nie majuć nijakich — siarod takich, da prykładu, Donald Tramp, Uładzimir Pucin i Emaniuel Makron.
U 2012 hodzie ŭ list pretendentaŭ na Nobiela ŭvachodziŭ biełaruski pravaabaronca Aleś Bialacki. Tady jon byŭ źniavoleny — farmalna abvinavačany ŭ niaspłacie padatkaŭ, ale faktyčna za svaju dapamohu represavanym u Biełarusi. Sioleta Bialacki aryštavany nanoŭ, razam z kalehami pa pravaabarončym centry «Viasna».
U 2020 hodzie łaŭreatam premii stała Charčovaja prahrama AAN — za jaje rolu ŭ likvidacyi hoładu ŭ biednych krainach.
Budzie niezvyčajna, kali dva hady zapar premiju buduć atrymlivać prahramy AAN. Zrešty, SAAZ, pry ŭsioj pavazie da jaje, traplała i pad krytyku za pavolnaść u svajoj reakcyi na pandemiju kavidu.
U 2019 hodzie, apošnim pierad pandemijaj, Nobiela atrymaŭ prezident Efiopii Abij Achmied Ali — za mirnaje vyrašeńnie kanfliktu z Erytrejaj, jaki dziesiacihodździami zabiraŭ žyćci z dvuch bakoŭ.
Łaŭreata Nobieleŭskaj premii miru abviaščajuć u piatnicu pieršaha poŭnaha tydnia kastryčnika — sioleta heta 8 kastryčnika. Ale rašeńnie kamitet prymaje da kanca vieraśnia.
